កីឡាការិនី​តេ​ក្វា​ន់​ដូ ស៊ន សៀវ​ម៉ី ឈ្នះ​មេដាយមាស​១​គ្រឿង


ហ្វី​លី​ពី​ន​៖ ​តាម​សេចក្ដីរាយការណ៍​ពី​ទីក្រុង​ម៉ានីល​បានឱ្យ​ដឹង​ថា កីឡាការិនី ស៊ន សៀវ​ម៉ី ​ដណ្ដើម​បាន​មេដាយមាស​១​គ្រឿង ​ពី​ការ​ប្រកួត​កីឡា​ស៊ី​ហ្គេ​ម​លើក​ទី​៣០​នៅ​ប្រទេស​ហ្វី​លី​ពី​ន លើ​ប្រភេទ​កីឡា​តេ​ក្វា​ន់​ដូ​បន្ទាប់​ពី​បាន​ប្រកួត​ឈ្នះ​ម្ចាស់ផ្ទះ​កាលពី​ថ្ងៃ​ទី​៨​ ធ្នូ​ ។

កីឡាការិនី ស៊ន សៀវ​ម៉ី ជា​អតីត​ម្ចាស់​មេដាយមាស​ក្នុង​ព្រឹត្តិការណ៍​កីឡា​ស៊ី​ហ្គេ​ម​លើក​ទី​២៩​ឆ្នាំ​២០១៧ ដែល​បាន​ធ្វើ​ឡើង​នៅ​ប្រទេស​ម៉ា​ឡេ​ស៊ី ក្នុង​ប្រភេទ​ទម្ងន់​៧៣​គីឡូក្រាម​។​ ដូច្នេះ ​ការ​ឈ្នះ​មេដាយមាស​ពី​ការ​ប្រកួត​កីឡា​ស៊ី​ហ្គេ​ម​ នៅ​ប្រទេស​ហ្វី​លី​ពី​ន​លើក​ទី​៣០​កាលពី​ថ្ងៃ​ទី​៨​ធ្នូ​ឆ្នាំ​២០១៩ លើក​នេះ​ទៀត ជា​ជ័យជម្នះ​ក្នុង​ការ​ការពារ​នូវ​តំណែងជា​ម្ចាស់​មេដាយមាស​។

ស្រប​ពេល​ជាមួយ​គ្នា​នេះ​ដែរ ​មិត្ត​រួម​ជាតិ​កីឡាការិនី ឈឿ​ង អា​លី​ហ្សា​ បាន​ប្រកួត​ចាញ់​ម្ចាស់ផ្ទះ​ហ្វី​លី​ពី​ន​ក្នុង​លទ្ធផល​ពិន្ទុ​១២​ ទល់​និង​៣​នៅ​វគ្គ​ប្រកួត​ផ្ដាច់ព្រ័ត្រ ដណ្ដើម​បាន​ត្រឹម​មេដាយ​ប្រាក់​ប៉ុណ្ណោះ​។ ​ចំណែក​កីឡា​ការិ​នី​កូនកាត់​អា​មេ​រិ​ក ថិ​ប​កា​សាន់ ទ្រេ​នី​កូ​ល​ដណ្ដើម​បាន​ត្រឹម​មេដាយ​ប្រាក់​១​គ្រឿង​ដូច​គ្នា​បន្ទាប់​ពី​ប្រកួត​ចាញ់ កីឡាការិនី​វៀតណាម​នៅ​វគ្គ​ពាក់កណ្ដាល​ផ្ដាច់ព្រ័ត្រ​។

តាម​ការ​ឱ្យ​ដឹង​បន្ថែម​គិត​ត្រឹម​ថ្ងៃអាទិត្យ​ទី​៨​ធ្នូ​កម្ពុជា​ទទួល​បាន​មេដាយ​ជា​បណ្ដោះ​អាស​ន្ត​ពី​ការ​ប្រកួត​កីឡា​ស៊ី​ហ្គេ​ម​លើក​ទី​៣០​នៅ​ប្រទេស​ហ្វី​លី​ពី​ន ចំនួន​៣៥​គ្រឿង ក្នុង​នោះ ​មេដាយមាស​ច​នួន​៣​គ្រឿង មេដាយ​ប្រាក់​ចំនួន​៦​គ្រឿង ​និង​មេដាយ​សំរឹទ្ធ​ចំនួន​២៦​គ្រឿង ​៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ