ខេត្តសៀមរាប ៖ ទិវារត់ប្រណាំងអន្ដរជាតិពាក់កណ្ដាលម៉ារ៉ាតុងលើកទី២៤ ឆ្នាំ២០១៩ នៅអង្គរវត្ត បានដំណើរការការប្រកួតហើយ នា ព្រឹកថ្ងៃទី៨ ខែធ្នូ ក្រោមវត្តមានលោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា(NOCC) និងមានការចូលរួមពីភ្ញៀវជាតិ-អន្ដរជាតិចំនួន ១២.១៧៥នាក់ មកពី៨៥ប្រទេសលើពិភព លោក ។
អ្វីដែលគួរឲ្យកត់សម្គាល់ក្នុងព្រឹត្តិការណ៍កីឡាទេសចរណ៍ដ៏ធំប្រចាំឆ្នាំនេះ គឺមានវត្តមានលោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាចូលរួមផងដែរ ស្របពេលដែលពលរដ្ឋអាមេរិក បានឈរលេខ៣ ក្នុងនាមជនបរទេសចូលរួមព្រឹត្តិការណ៍នេះច្រើនជាងគេ។
នេះគឺជាលើកដំបូងហើយ ដែលឯកអគ្គរដ្ឋទូតសហរដ្ឋអាមេរិកបានចូលរួម ស្របពេលដែល ព្រឹត្តិការណ៍នេះកំពុងល្បីល្បាញ និងទាក់ទាញអ្នកស្រឡាញ់កីឡាបរទេសមកពីគ្រប់ទិសទីលើ ពិភពលោក។ បើតាមការបញ្ជាក់របស់គណៈ កម្មការរៀបចំ លោក W. Patrick Murphy នឹងត្រូវរត់ចម្ងាយ១០គីឡូម៉ែត្រ ។
ថ្លែងក្នុងឱកាសនោះ លោករដ្ឋមន្ត្រី ថោង ខុន បានបង្ហាញនូវសុទិដ្ឋិនិយមចំពោះទិវារត់ ប្រណាំងអន្ដរជាតិពាក់កណ្ដាលម៉ារ៉ាតុងឆ្នាំនេះ ផងដែរ ដែលបានទាក់ទាញថ្នាក់ដឹកនាំ ឯកអគ្គ រដ្ឋទូត និងភ្ញៀវជាតិ-អន្ដរជាតិរហូតដល់១២.១៧៥នាក់ មកពី៨៥ប្រទេសចូលរួម ។ ចំនួននេះមានកំណើនប្រមាណ២០% បើប្រៀបធៀបនឹងឆ្នាំ២០១៨ ហើយជនបរទេសដែលចូលរួមច្រើនជាងគេគឺ អង់គ្លេសឈរលេខ១ មាន៦៤៦នាក់ ជប៉ុននិងអាមេរិកមាន៤៨៨នាក់ដូចគ្នា អូស្ដ្រាលី៤០២នាក់ បារាំង៣៩៨នាក់ និងកម្ពុជា ៧.៥៧៣នាក់ ។
លោករដ្ឋមន្ដ្រីថ្លែងថា «ខ្ញុំពិតជាមានមោទនភាពណាស់ ដែលព្រឹត្តិការណ៍កីឡាទេសចរណ៍នេះ បានក្លាយជាដែកឆក់ថ្មីនៃផលិតផលទេសចរណ៍ច្នៃបង្កើតថ្មីមួយដ៏មានសារៈសំខាន់ រួមចំ ណែកទាក់ទាញភ្ញៀវទេសចរជាតិ និងអន្ដរជាតិរ៉ាប់ម៉ឺននាក់ក្នុងរយៈពេលតែមួយ ។ ក្រសួងទេស ចរណ៍ និងគ្រប់ភាគីពាក់ព័ន្ធ បានខិតខំប្រឹងប្រែងការធ្វើពិពិធកម្មផលិតផលទេសចរណ៍ឲ្យកាន់តែមានភាពទាក់ទាញថ្មីៗ ប្លែកៗបន្ថែមទៀត ដើម្បីសម្រេចគោលដៅកំណើនទេសចរអន្ដរជាតិដល់ ៧លាននាក់ក្នុងឆ្នាំ២០២០» ។
គួរបញ្ជាក់ថា នេះគឺជាលើកទី២៤ហើយ ដែលទិវារត់ប្រណាំងអន្ដរជាតិពាក់កណ្ដាលម៉ារ៉ាតុង ត្រូវបានរៀបចំឡើង ដោយរាជរដ្ឋាភិបាលបានលើកទឹកចិត្តដល់ក្រសួងទេសចរណ៍សហការជាមួយ NOCC និងអាជ្ញាធរពាក់ព័ន្ធ រៀបចំព្រឹត្តិការណ៍កីឡាទេសចរណ៍ដ៏ធំប្រចាំឆ្នាំនេះឡើង ក្នុងគោលបំណងធ្វើពិពិធកម្មកីឡាទេសចរណ៍ឲ្យក្លាយជាផលិតផលទេសចរណ៍ថ្មីៗ ដើម្បីទាក់ ទាញកំណើនភ្ញៀវទេសចរកាន់តែច្រើនមកកាន់ប្រទេសកម្ពុជានាពេលបច្ចុប្បន្ន និងថ្ងៃអនាគត៕ (កែសម្រួលដោយ ៖ បុប្ផា)
ចែករំលែកព័តមាននេះ