ខេត្តកំពង់ចាម ៖ ក្រោមការចង្អុលបង្ហាញពីសំណាក់លោកអ៊ុន ចាន់ដា អភិបាលខេត្ត ប្រធានគណៈបញ្ជាការឯកភាពខេត្ត និងលោកព្រះរាជអាជ្ញាអមសាលាដំបូងខេត្ត ។ តបតាមការណែនាំកម្លាំង សមត្ថកិច្ចបានបើកប្រតិបត្តិការបង្ក្រាបសង្វៀនបញ្ជល់មាន់ដោយខុសច្បាប់ចំនួន២កន្លែងផ្សេងគ្នា…
ខេត្តកំពង់ចាម ៖ ក្រោមការចង្អុលបង្ហាញពីសំណាក់លោកអ៊ុន ចាន់ដា អភិបាលខេត្ត ប្រធានគណៈបញ្ជាការឯកភាពខេត្ត និងលោកព្រះរាជអាជ្ញាអមសាលាដំបូងខេត្ត ។ តបតាមការណែនាំកម្លាំង សមត្ថកិច្ចបានបើកប្រតិបត្តិការបង្ក្រាបសង្វៀនបញ្ជល់មាន់ដោយខុសច្បាប់ចំនួន២កន្លែងផ្សេងគ្នា ក្នុងនោះនៅស្រុកជើងព្រៃ និងក្រុងកំពង់ចាម ត្រូវបានបង្ក្រាបក្នុងថ្ងៃតែមួយ គឺថ្ងៃទី៧ ធ្នូ ឆ្នាំ២០១៩ ដោយរឹបអូសបានម៉ូតូជាច្រើនគ្រឿង និងរថយន្តម៉ាកហាយឡិនឌ័រ១គ្រឿង ចំណែកក្រុមអ្នកលេងល្បែងបញ្ជល់មាន់បាននាំគ្នារត់បាតជើងសព្រាតគេចខ្លួនអស់។
លោកឧត្តមសេនីយ៍ទោ ឯម កុសល ស្នងការនគរបាលខេត្តបានឲ្យដឹងថា ក្នុងរយៈពេលប៉ុន្មានថ្ងៃនេះ មានប្រជាពលរដ្ឋនៅមូលដ្ឋានបានរាយការណ៍មករូបលោកថា មានគេលួចបើកបញ្ជល់មាន់ដោយខុសច្បាប់ ហើយមានមនុស្សជាច្រើននាក់ពពាក់ពពូនទៅភ្នាល់ដាក់លុយនិងស្រែកហ៊ោកញ្ជ្រៀវនៅជាយក្រុងកំពង់ចាម។
លោកស្នងការនគរបាលខេត្តបានបន្តថា ក្រោយពីទទួលបាននូវព័ត៌មានខាងលើនេះភ្លាម នៅវេលាម៉ោង៩ និង៥៥នាទីព្រឹកថ្ងៃទី៧ ខែធ្នូ ឆ្នាំ២០១៩ បានបញ្ជាដល់កម្លាំងជំនាញអធិការដ្ឋាននគរបាលក្រុងកំពង់ចាម សហការជាមួយកំលាំងប៉ុស្តិ៍ទាំង៤ និងកម្លាំងការិយាល័យអន្តរាគមន៍ដឹកនាំដោយលោកវរសេនីយ៍ទោ អុឹង ប៊ុន អធិការនគរបាលក្រុងកំពង់ចាម ចុះបង្ក្រាបករណីលួចលេងល្បែងស៊ីសង១កន្លែងនៅចំនុចក្នុងព្រៃស្ថិតក្រោយភូមិបឹងបាសាក់ សង្កាត់សំបួរមាស ក្រុងកំពង់ចាម ខេត្តកំពង់ចាម ។ ពេលសមត្ថកិច្ចចុះទៅដល់ទីតាំងខាងលើ ក្រុមអ្នកលេងបញ្ជល់មាន់ឃើញសមត្ថកិច្ចភ្លាម ក៏នាំគ្នារត់គេចខ្លួនបាត់អស់តែម្តង ដោយបន្សល់ទុកវត្ថុតាងរួមមាន រថយន្តមួយគ្រឿងម៉ាកហាយលែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២AD-៥៤៨៥ និងម៉ូតូចំនួន២១គ្រឿង មាន់ជល់ចំនួន២ក្បាល កន្ត្រកដាក់មាន់ជល់ចំនួន៣ និងកៅស៊ូតង់ពទ្ធ័ជុំសង្វៀនមាន់១។
លោកស្នងការនគរបាលខេត្តបានបញ្ជាក់ថា ចំពោះករណីទី២-កាលពីវេលាម៉ោង១២និង៣០នាទីថ្ងៃត្រង់ថ្ងៃទី៧ ខែធ្នូ ២០១៩ កម្លាំងជំនាញរបស់អធិការដ្ឋាននគរបាលស្រុកជើងព្រៃ ដឹកនាំដោយលោកវរសេនីយ៍ឯក ប្រាក់ សុខគុណ អធិការនគរបាលស្រុកជើងព្រៃ ចុះបង្ក្រាបទីតាំងលួចលេងល្បែងស៊ីសងខុសច្បាប់បញ្ជល់មាន់នៅចំណុចព្រៃកប់ខ្មោច ស្ថិតនៅភូមិបឹងជ្រោយ ឃុំសូរទិព្វ ស្រុកជើងព្រៃ ខេត្តកំពង់ចាម ។ ដោយស្ថានភាពផ្លូវឆ្ងាយពីភូមិផ្លូវលំបាកពេលកម្លាំងសមត្ថកិច្ចចុះទៅដល់ ស្រាប់តែអ្នកលេងល្បែងនាំគ្នារត់គេចបាត់អស់ ដោយបន្សល់ទុកវត្ថុតាងមួយចំនួន រួមមានម៉ូតូចំនួន២៧គ្រឿង និងមាន់ជល់ចំនួន២ក្បាល ។
ចំពោះវត្ថុតាងទាំងអស់ខាងលើត្រូវបានបញ្ជូនមកកាន់អធិការដ្ឋាននគរបាលនីមួយៗ ដើម្បីចាត់ការតាមនីតិវិធីច្បាប់និងតាមស្រាវជ្រាវរកម្ចាស់លួចលេងល្បែងបញ្ជល់មាន់ដែលខុសច្បាប់។
ពាក់ព័ន្ធនឹងករណីខាងលើ លោកស្នងការនគរបាលខេត្តសូមស្វាគមន៍ចាំទទួលសេចក្តីរាយការណ៍ពីប្រជាពលរដ្ឋនៅមូលដ្ឋាន ប្រសិនបើឃើញមានការបើកលេងល្បែងស៊ីសងដោយខុសច្បាប់នៅតំបន់ណាមួយ សូមប្រញាប់រាយការណ៍មករូបលោកជាបន្ទាន់ដើម្បីមានវិធានការចុះបង្ក្រាប៕ (កែសម្រួលដោយ ៖ ធីតា)
ចែករំលែកព័តមាននេះ