ប្រទេសមីយ៉ាន់ម៉ា ៖ អ្នកគាំទ្រលោកស្រីអ៊ូងសាន់ស៊ូជីជាច្រើនពាន់នាក់ កាលពីថ្ងៃទី៧ធ្នូបានចូលរួមក្នុងការប្រមូលផ្ដុំគ្នាជួយទ្រទ្រង់ដ៏ធំមួយ នៅរដ្ឋធានីមីយ៉ាន់ម៉ាក្រុងណៃពិដោ មុនការចេញដំណើររបស់លោកស្រីទៅកាន់ក្រុងឡាអេ ដើម្បីការពារប្រទេសលោកស្រីចំពោះការចោទប្រកាន់ ពីបទប្រល័យពូជសាសន៍ ប្រឆាំងពួកអ៊ិស្លាមរ៉ួហ៊ីងយ៉ា នៅមុខតុលាការជាន់ខ្ពស់បំផុតរបស់អ.ស.ប។
ការប្រមូលផ្ដុំមនុស្សនេះកើតមានពេលដែលរដ្ឋមន្ត្រីការបរទេសចិនមកដល់មីយ៉ាន់ម៉ា តាមការអញ្ជើញរបស់លោកស្រីស៊ូជី ដែលតាមពិតជាប្រមុខរដ្ឋាភិបាលមីយ៉ាន់ម៉ា។ យោងតាមពួកអ្នកវិភាគថា សិទិ្ធវេតូដែលចិនមានក្នុងឋានៈជាសមាជិកអចិន្ត្រៃយ៍ក្រុមប្រឹក្សាសន្តិសុខអ.ស.ប ពិតណាស់នឹងប្រើជួយសម្ព័ន្ធមិត្តមីយ៉ាន់ម៉ា ដែលកំពុងប្រឈមមុខនឹងការគាបសង្កត់ខាងផ្លូវច្បាប់កាន់តែខ្លាំង លើភ័ព្វវាសនារបស់ជនជនជាតិភាគតិចអ៊ិស្លាមរ៉ូហ៊ីងយ៉ា។
លោកស្រីស៊ូជីនឹងទៅកាន់ក្រុងឡាអេ ដើម្បីការពារប្រទេសលោកស្រី នៅមុខតុលាការយុត្តិធម៌អន្តរជាតិ។ នារីជនជាតិហ្គំប៊ីម្នាក់ដែលត្រូវបានប្រទេស៥៧ជាសមាជិកអង្គការកិច្ចសហប្របត្តិការអ៊ិស្លាមចាត់តាំង បានចាប់ផ្ដើមសកម្មភាពខាងផ្លូវតុលាការ ប្រឆាំងមីយ៉ាន់ម៉ាពីបទប្រល័យពូជសាសន៍ នៅមុខតុលាការអន្តរជាតិនោះ។ សវនាការនេះគ្រោងធ្វើពីថ្ងៃទី១០ដល់១២ធ្នូនៅក្រុងឡាអេ។
ភាពល្បីលើឆាកអន្តរជាតិរបស់លោកស្រីស៊ូជី ដោយសារលោកស្រីជាអតីតអ្នកតស៊ូដើម្បីលទ្ធិប្រជាធិបតេយ្យនៅមីយ៉ាន់ម៉ាបានស្រអាប់ ដោយសារតែការធ្វើទុក្ខបុកម្នេញលើពួករ៉ូហ៊ីងយ៉ា ប៉ុន្តែនៅក្នុងប្រទេស លោកស្រីទទួលការគាំទ្រខ្លាំងក្នុងចំណោមប្រជាជន ដែលភាគច្រើនចាត់ទុកពួករ៉ូហ៊ីងយ៉ាថា ជាពួកអន្តោប្រវេសន៍ខុសច្បាប់។
បណ្ដាអ្នកចូលរួមក្នុងបាតុកម្មគាំំទ្រដ៏ធំនោះនិយាយថា យើងមានមោទនភាព ដែលលោកស្រីស៊ូជីជាអ្នកចេញមុខរ៉ាប់រងការពារមីយ៉ាន់ម៉ា ដោយលោកស្រីធ្វើដំណើរផ្ទាល់ទៅកាន់ក្រុងឡាអេ ការពារមុខមាត់របស់ប្រទេស។ គេមិនចោទប្រកាន់ត្រឹមតែមនុស្សម្នាក់នៅមីយ៉ាន់ម៉ាទេ តែចោទប្រទេសយើងទាំងមូល៕ (កែសម្រួលដោយ ៖ បុប្ផា)
ចែករំលែកព័តមាននេះ