ខេត្តកណ្តាល ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបទេស និងស ហប្រតិបត្តិការអន្តរជាតិ និងជាប្រធានគណៈពង្រឹងស្រុកស្អាងបានបញ្ជាក់ថា ផ្លូវមួយខ្សែដែលមានភាពលំបាកខ្លាំងពីមុន នឹងសាងសង់រួលរាល់មុនឆ្នាំខ្មែរខាងមុននេះ។
លោក ប្រាក់ សុខុន បានថ្លែងក្នុងពិធីបើកការដ្ឋានសាងសង់ផ្លូវបេតុងប្រវែង១០៨០០ម៉ែត្រ និងទទឹក៦ម៉ែត្រ ឬជាង១០គីឡូម៉ែត្រ កាលពីព្រឹកថ្ងៃទី៧ ខែធ្នូ ឆ្នាំ២០១៩នេះ បានអបអសាទជាមួយប្រជាពលរដ្ឋរស់នៅក្នុងឃុំព្រែកអំបិល ស្រុកស្អាង ដែលទទួលបានផ្លូវមួយខ្សែចាក់បេតុងនេះ ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រី ដែលតែងតែគិតពីភាពលំបាករបស់ប្រជាពលរដ្ឋ។
លោកឧបនាយករដ្ឋមន្ត្រីបានលើកឡើងថា នៅពេលផ្លូវសាងសង់រួចរាល់ហើយ នឹងលែងពិបាកទៀតហើយ ពិសេសនោះក្មួយៗសិស្សានុសិស្សធ្វើដំណើរទៅរៀន លែងប្រឡាក់ភក់ ដីហ៊ុយ ដូចមុនទៀតហើយ ។ ជាងនេះ ប្រជាពលរដ្ឋក៏មានភាពងាយស្រួលក្នុងការដឹកជញ្ជូនកសិផលទៅកាន់ទីផ្សារ និងទៅកាន់បណ្តាខេត្តនានាដែលជាប់គ្នាបានស្រួលដែរ។
លោកបញ្ជាក់ថា «ខ្ញុំអបអសាទរជាមួយប្រជាពលរដ្ឋក្នុងឃុំព្រែកអំបិល នៅពេលធ្វើ យើងលែងប្រឡាក់ ឬហ៊ុយទៀតហើយ ។ ពេលចូលឆ្នាំ យើងអាចធ្វើដំណើរស្រួល ឬនិយាយបានទៀតថា អាចចាក់ធុងបាស់រាំលើផ្លូវក៏ថាបាន»។
ចំពោះមុខប្រជាពលរដ្ឋលោកឧបនាយករដ្ឋមន្ត្រីលើកឡើងថា ប្រទេសមានសុខសន្តិភាព ទើបធ្វើផ្លូវបានបែបនេះ មិនដូចការចោទប្រកាន់របស់មនុស្សមួយចំនួចតូចនោះទេ។ ហើយសម្តេចតេជោ បានគិតគូណាស់ រឿងផ្លូវ ទឹក ភ្លើងសម្រាប់ប្រជាជនយើងទាំងអស់គ្នា ។
ជាមួយគ្នានោះដែរ លោកឧបនាយករដ្ឋមន្ត្រីបានអំពាវនាវឲ្យប្រជាពលរដ្ឋនាំគ្នាចេះថែរក្សាផ្លូវ ដោយកុំដឹកទំនិញធ្ងន់បណ្តាលឲ្យឆាប់ខូចផ្លូវ កុំបើកបរលឿនពេក និងមានការប្រុង ប្រយ័ត្នចំពោះកូនៗពេលឆ្លងកាត់ផ្លូវោងដែរ។
លោកឧបនាយករដ្ឋមន្ត្រីបានបញ្ជាក់ថា៖ «សូមកុំបើកបរលឿនពេកពេលបានផ្លូវស្អាត ហើយបើកបរត្រូវពាក់មួយសុវត្ថិភាពផង ដើម្បីការពារនៅពេលដួល ឬគ្រោះថ្នាក់ ។កុំអាងអត់ប៉ូលិសចាប់អត់ពាក់មួក ព្រោះវាជាសុវត្ថិភាពរបស់យើង ហើយគោរពច្បាប់ទាំងអស់គ្នា។ ពេលគ្រោះថ្នាក់ខ្លួនឯងទេ មិនមានអ្នកណាមកជំនួសយើងនោះទេ»។
លោកក៏បានអរគុណចំពោះគណៈអភិបាលខេត្តកណ្តាលលោក ម៉ៅ ភិរុណ ក៏ដូចជាប្រ ធានគណៈពង្រឹងឃុំព្រែកអំបិល ដែលមានលោក កែវ រ៉េមី ថ្នាក់ដឹកនាំផ្សេងទៀត ដែលបានខិតខំចុះជួយប្រជាពលរដ្ឋនៅក្នុងឃុំព្រែកអំបិល។
សូមជម្រាបថា ផ្លូវមួយខ្សែដែលនឹងចាប់ផ្តើមសាងសង់ដោយចាក់បេតុងនេះ មានភាពលំបាកជាច្រើនឆ្នាំមកហើយ ផ្លូវនេះបានតភ្ជាប់រវាងខេត្តកណ្តាល ជាមួយខេត្តតាកែវផងដែរ ។ ផ្លូវនេះជាផ្លូវសេដ្ឋកិច្ចមួយរបស់ប្រជាពលរដ្ឋរស់នៅក្នុងឃុំនៅពេលប្រមូលផង ស្រូវប្រាំង ឬដំណាំនានាដឹកជញ្ជូនទៅទីផ្សារធំៗនៅខេត្តតាកែវ និងទៅផ្សារភ្នំពេញ ជាពិសេសជាងនេះ គឺដឹកទៅប្រទេសវៀតណាមផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ