ខេត្តឧត្តរមានជ័យ ៖ ដោយសារសីតុណ្ហភាពរដូវរងាត្រជាក់ខ្លាំងពេកពីរនាក់ប្តីប្រពន្ធ បាននាំគ្នាបង្កាត់ភ្លើងដេកឆ្អើរក្នុងផ្ទះតៀមដោយសារតែការកក់ក្តៅ ក៏ដេកលង់លក់ក្នុងដំណេក ភ្លេចមើលភ្លើងដែលដុតឆ្អើរ ស្រាប់តែភ្លើងរាលដាលឆេះផ្ទះហ្មត់នៅវេលាម៉ោង៤និង២០នាទីទៀបភ្លឺឈានចូលថ្ងៃទី៥ ធ្នូ នៅក្នុងភូមិក្រសាំង សង្កាត់បុស្សូវ ក្រុងសំរោង ។
គ្រួសាររងគ្រោះដោយអគ្គិភ័យបុរសជាប្តីឈ្មោះព្រឿយ ជួន អាយុ២៤ឆ្នាំ ប្រពន្ធឈ្មោះ ម៉ន សុផា អាយុ២២ឆ្នាំ មានកូនប្រុសមួយទើបតែមានអាយុ៣ខែ រស់នៅក្នុងភូមិសង្កាត់កើតហេតុខាងលើ ។ លោកប្តីបានរៀបរាប់ថា ផ្ទះរបស់ខ្លួនមួយខ្នងនេះមានទំហំ៤,៥០ម៉ែត្រគុណនឹង៨ម៉ែត្រ ដំបូលប្រក់ស័ង្កសី ជញ្ជាំងក្តារ លក្ខណៈជាផ្ទះតៀម ។
ទាំងពីរនាក់ប្តីប្រពន្ធបានបញ្ជាក់ថា មុនពេលកើតហេតុខ្លួនទាំងពីរនាក់ប្តីប្រពន្ធរងាពេកក៏នាំគ្នាបង្កាត់ភ្លើងដេកឆ្អើរហើយក៏លង់លក់ទាំងពីរនាក់ស្រាប់តែភ្នក់ភ្លើងនោះបានឆេះរាលដាល ចេញជាអណ្តាតភ្លើងយ៉ាងសន្ធោសន្ធៅ ទើបភ្ញាក់និងបានត្រឹមតែនាំប្រពន្ធនិងកូនរត់ចេញពីអណ្តាតភ្លើង ដែលកំពុងលេបត្របាក់ផ្ទះ រួចផុតពីសេចក្តីស្លាប់ ។
ប៉ូលិសរដ្ឋបាលសង្កាត់បុស្សូវបានឱ្យដឹងថា ក្រោយមានគ្រោះអគ្គិភ័យកើតឡើង ម្ចាស់ផ្ទះទាំងពីរនាក់ប្តីប្រពន្ធបានស្រែកឱ្យអ្នកភូមិជិតខាងនឹងសមត្ថកិច្ចជួយពន្លត់ដែរ តែទោះជាបែបណាមិនអាចជួយពន្លត់បានដោយសារតែមានខ្យល់បក់បោកយ៉ាងខ្លាំង ធ្វើឱ្យព្រះអគ្គីលេបត្របាក់ផ្ទះមួយខ្នងនេះហ្មត់ទាំងស្រុងតែប៉ុន្មាននាទីតែប៉ុណ្ណោះ ។
បានជាមេរៀនមួយសម្រាប់បងប្អូនប្រជាពលរដ្ឋក្នុងរដូវរងានេះ បើមានការបង្កាត់ភ្លើងអាំងយកកម្តៅគប្បីមានការប្រុងប្រយ័ត្នចំពោះអគ្គិភ័យដែលអាចកើតមានឡើងជាយថាហេតុ ៕
ចែករំលែកព័តមាននេះ