រាជធានីភ្នំពេញ៖ ខណៈដែលកម្ពុជាកំពុងខិតខំពង្រីកទីផ្សារអន្តរជាតិបន្ថែមទៀតសម្រាប់ការនាំចេញស្រូវអង្ករនោះ ថ្មីនេះប្រតិភូមកពីប្រទេសស៊ីរ៉ាលីអូនបានបង្ហាញនូវគម្រោងក្នុងការនាំចូលអង្ករកម្ពុជាទៅកាន់ប្រទេសរបស់ខ្លួន ។ ថ្លែងនៅក្នុងកិច្ចប្រជុំមួយកាលពីរសៀលថ្ងៃទី០៤ ខែធ្នូ ឆ្នាំ២០១៩ ជាមួយនឹងលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជានោះ លោក អើនេស្ត ដុមម៉ាហ៊ីណា (Ernest M. Ndomahina) ឯកអគ្គរដ្ឋទូតប្រទេសស៊ីរ៉ាលីអូន (Sierra Leone) ប្រចាំប្រទេសចិន ដែលបានមកបំពេញទស្សនកិច្ចសិក្សាលើទីផ្សារកសិកម្មនៅប្រទេសកម្ពុជា បានឲ្យដឹងថាទស្សនកិច្ចរបស់លោកនាពេលនេះ គឺមាន «គោលបំណងស្វែងយល់ពីទីផ្សារកសិកម្មរបស់កម្ពុជា ជាពិសេសដើម្បីសិក្សាអំពីការនាំចូលអង្ករពីកម្ពុជាទៅកាន់ប្រទេសស៊ីរ៉ាលីអូន»។
លោកបានបញ្ជាក់ថា អង្ករជាអាហារចម្បងរបស់ស៊ីរ៉ាលីអូន ប៉ុន្តែហេដ្ឋារចនាសម្ព័ន្ធកសិកម្មរបស់ប្រទេសស៊ីរ៉ាលីអូនមិនទាន់បានស្ដារបានជាស្ថាពរនៅឡើយ «ដូចនេះការនាំចូលអង្ករពីប្រទេសកម្ពុជានឹងពង្រឹងស្ថេរភាពចំណីអាហាររបស់ប្រទេសស៊ីរ៉ាលីអូន»។
ជាការឆ្លើយតប លោក ប៉ាន សូរស័ក្ដិ បានបញ្ជាក់ជូនខាងប្រតិភូពិប្រទេសស៊ីរ៉ាលីអូនថា ផលិតកម្មស្រូវនៅកម្ពុជាមានចំនួនលើសតម្រូវការប្រមាណ ៤ លានតោនជារៀងរាល់ឆ្នាំ ដែលអាចប្រើប្រាស់សម្រាប់ផ្គត់ផ្គង់ជូនទៅប្រទេសស៊ីរ៉ាលីអូនបាន។ ជាអនុសាសន៍លើការងារនេះ លោកបានលើកទឹកចិត្តឲ្យសហគមន៍ធុរកិច្ច ឬក្រុមហ៊ុននាំចូលនៃប្រទេសស៊ីរ៉ាលីអូន ចុះអនុស្សរណៈយោគយល់គ្នាជាមួយនឹងសហគមន៍ធុរកិច្ច ឬក្រុមហ៊ុននាំចេញនៃប្រទេសកម្ពុជា ដើម្បីបង្កើតទំនាក់ទំនងផ្លូវការ និងបង្កភាពងាយស្រួលក្នុងធ្វើពាណិជ្ជកម្មរវាងគ្នា និងគ្នា។
យោងតាមរបាយការណ៍ច្រកចេញចូលតែមួយសម្រាប់បំពេញបែបបទនាំចេញអង្ករ គិតត្រឹមនៅថ្ងៃទី១៣ ខែវិច្ឆិកា ឆ្នាំ២០១៩នេះ បានបញ្ជាក់ថា នៅរយៈពេល១០ខែ ឆ្នាំ២០១៩នេះ កម្ពុជាបាននាំចេញអង្ករចំនួន៤៥៧,៩៤០តោន កើនឡើងជាង៥ភាគរយ ដែលក្នុងនោះប្រទេសចិន នៅតែនាំមុខគេ ក្នុងការទិញអង្ករពីកម្ពុជា ដោយរយៈពេល១០ខែមកនេះ ចិនបានទិញអង្ករពីកម្ពុជា ជាង១៧ម៉ឺនតោន, ប្រទេសបារាំង ជាង៦ម៉ឺនតោន, ប្រទេសម៉ាឡេស៊ីជិត២.៥ម៉ឺនតោន និងប្រទេស Gabon ជាង២ម៉ឺនតោន។
សូមបញ្ជាក់ថាការនាំចេញអង្ករទៅកាន់ទីផ្សារអឺរ៉ុបបានធ្លាក់ចុះជាង៣២ភាគរយ គិតមកត្រឹមរយៈពេលប្រាំបួនខែដើមឆ្នាំ២០១៩នេះ ដោយសារតម្លៃពន្ធខ្ពស់ ជាហេតុនាំឲ្យសមាគមអ្នកនាំអង្ករកម្ពុជាគ្រោងនឹងចរចាជាមួយសហភាពអឺរ៉ុបឡើងវិញអំពីការយកពន្ធអង្ករកម្ពុជានេះដើម្បីឲ្យការនាំចេញមានកំណើនឡើងវិញ ។ យ៉ាងណាមិញ ដោយសារតែសម្ពាធនៃការយកពន្ធលើការនាំចូលអង្ករពីកម្ពុជាទៅកាន់សហភាពអឺរ៉ុប បានធ្វើឲ្យកម្ពុជាខិតខំចរចារកទីផ្សារលក់អង្ករទៅកាន់ប្រទេសចិនឲ្យបានច្រើនជាងមុនផងដែរ ។
សូមរម្លឹកថាកាលពីដើមឆ្នាំ២០១៩នេះ សហភាពអឺរ៉ុបបានសម្រេចយកពន្ធអង្ករកម្ពុជាចំនួន១៧០អឺរ៉ូ ឬស្មើនឹងប្រមាណ១៨៥ដុល្លារអាមេរិកក្នុងមួយតោន ដើម្បីការពារផលប្រយោជន៍ទីផ្សារអង្ករនៅអឺរ៉ុបរបស់ប្រទេសអ៊ីតាលី៕
ចែករំលែកព័តមាននេះ