ខេត្តកំពង់ឆ្នាំង ៖ មន្ត្រីខណ្ឌរដ្ឋបាលជលផល នៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង បានបញ្ជាក់ថា ត្រីសម្រាប់ធ្វើប្រហុកបានត្រូវជាបណ្ដើរៗហើយ ក្នុងខ្នើតខែមិគសិរនេះ ។ ចំណែកត្រីចង្កែង ដែលជាត្រី ត្រូវមងក្រឡា៣ហ៊ុន កន្លះ ក៏ត្រូវច្រើនណាស់ដែរ ពេលនេះប្រជាពលរដ្ឋ កំពុងបណ្តែតមកចាប់ត្រី នៅតាមបណ្តាស្រុកក្រុងចំនួន៤ ជាប់ដងទន្លេសាប ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្មរុក្ខាប្រមាញ់ និងនេសាទ នៅរសៀលថ្ងៃទី ៥ ខែធ្នូ ឆ្នាំ ២០១៩ បានបញ្ជាក់តាមទូរស័ព្ទថា សម្រាប់ខេត្តកំពង់ឆ្នាំង ត្រីបានត្រូវជាបណ្ដើរៗហើយ ក្នុងនោះមាននៅក្នុងឃុំឆ្នុកទ្រូ ស្រុកបរិបូណ៌ នៅសង្កាត់កំពង់ឆ្នាំង ក្រុងកំពង់ឆ្នាំង ឃុំសែប ឃុំតាជេស ស្រុកកំពង់ត្រឡាច ។ ត្រីបានចាប់ផ្តើមត្រូវនៅ ក្នុងខ្នើតខែមិគសិរនេះ ហើយបានសំបូរខ្លាំងនៅថ្ងៃ ៨កើតម្សិលមិញត្រូវនឹងថ្ងៃទី ៤ ខែធ្នូ ។
លោកបានបញ្ជាក់ថា ប្រជាពលរដ្ឋបាននាំគ្នាបណ្ដែតម៉ងចាប់ត្រីនៅទីកន្លែងដែលពួកគាត់រក ដូចជានៅ ស្រុកបរិបួរណ៌ ក្រុងកំពង់ឆ្នាំង ស្រុកកំពង់លែង និងស្រុកកំពង់ត្រឡាច។ បើគិតជាមធ្យមក្នុងទូកមួយគ្រឿង បណ្តែតមក ដោយប្រើក្រឡា២ ហ៊ុន ចាប់ត្រីប្រហុក គឺចាប់ត្រីបាន ពី៨០ ទៅ១២០គីឡូក្រាម ក្នុង១ថ្ងៃ។
ចំណែកទូកបណ្តែត មងក្រឡា៣ហ៊ុន កន្លះ ចាប់ត្រីចង្កែង គឺបានពី៣០ គីឡូទៅ ៥០គីឡូក្រាម ក្នុងទូកមួយគ្រឿង ។ តាមការប្រមាណ នៅសែនខ្នើតខែក្រោយ (ខែបុស្ស) ត្រីនឹងត្រូវច្រើនជាងនេះ ។ ហេតុនេះហើយក្នុងនាមលោកជាមន្ត្រីជលផល សូមអំពាវនាវប្រជាពលរដ្ឋដែលមានបំណងមកកាត់ក្បាលត្រីប្រហុក នៅខ្នើតនេះ និងខ្នើតខែក្រោយក្តី សូមរួសរាន់មកធ្វើត្រីប្រហុកឱយបានគ្រប់ៗគ្នា ។
នាយខណ្ឌរដ្ឋបាលជលផល បានបន្ថែមថា ត្រីប្រហុក និងត្រីស្លឹកឬស្សី ១គីឡូក្រាមថ្លៃពី៨រយ ទៅ ១ពាន់រៀល (សម្រាប់តម្លៃថ្ងៃទី៤ និងទី៥ ខែធ្នូ ) ចំណែកត្រីចង្កែង ថ្លៃ៤ពាន់ទៅ៥ពាន់រៀល ក្នុង១គីឡូក្រាម។
សូមបញ្ជាក់ថា សម្រាប់ត្រីប្រហុកក្នុងខេត្តកំពង់ឆ្នាំង គឺចាប់ផ្ដើមត្រូវនៅខែមិគសិរ ខែបុស្ស និងខែមាឃ ទើបអស់ ។ សម្រាប់ពេលនេះ គឺជាខ្នើតខែទីមួយ ដែលត្រីប្រហុកចាប់ផ្ដើមត្រូវ ។ ប្រជាពលរដ្ឋអាចមកធ្វើត្រីប្រហុកបានមានទីតាំងដូចជានៅស្រុកបរិបូណ៌ នៅក្រុងកំពង់ឆ្នាំង និងស្រុកកំពង់ត្រឡាចជាដើម ៕ (កែសម្រួលដោយ ៖ បុប្ផា)
ចែករំលែកព័តមាននេះ