រាជធានីភ្នំពេញ ៖ ស្ត្រី៣នាក់ ក្នុងនោះ២នាក់ជាប់ចោទជាមេកន្ទុយលេខដែលក្លាហានហ៊ានកត់កន្ទុយលេខនៅលើចិញ្ចើមផ្លូវសាធារណៈ ហើយត្រូវប៉ូលិសខណ្ឌសែនសុខក្រសោបចាប់កាលពីរសៀលម៉ោង៣ និង១៥នាទី ថ្ងៃទី២៦ ឧសភា ២០១៤ នៅក្បែរផ្សារបុរីទឹកថ្លា សង្កាត់ទឹកថ្លា ខណ្ឌសែនសុខរួមជាមួយវត្ថុតាងមួយចំនួនផងដែរ។
ទោះបីជាយ៉ាងណាប្រតិបត្តិការចាប់ស្ត្រី៣នាក់ខាងលើត្រូវបានមហាជនរិះគន់សមត្ថកិច្ចថា ចាប់បានតែមេកន្ទុយលេខតូចតាច ចំណែកមេកន្ទុយលេខធំៗជាច្រើនកន្លែងនៅខណ្ឌសែនសុខបែរជាដំណើរការលេងយ៉ាងរលូន វាមិនខុសពីគេហៅថា អារ.កមាន់បន្លាចស្វានោះទេ។
យោងតាមរបាយការណ៍ប៉ូលិសបានបញ្ជាក់ថា មេកន្ទុយលេខដែលសមត្ថកិច្ចឃាត់ខ្លួនឈ្មោះផេន គីនរុន ភេទស្រី អាយុ៣២ឆ្នាំ ស្នាក់នៅជិតផ្សារបុរីទឹកថ្លា និងឈ្មោះស៊ីន ស៊ីណេន ភេទស្រី អាយុ៤២ឆ្នាំ ស្នាក់នៅជិតផ្សារបុរីទឹកថ្លា ចំណែកឈ្មោះសឿន រ៉ុម អាយុ៣១ឆ្នាំ ស្នាក់នៅផ្សាររតនាផ្លាហ្សាជាអ្នកចាក់កន្ទុយលេខ។
ជុំវិញករណីបង្ក្រាបមេកន្ទុយលេខ និងឆ្លើយតបនឹងការរិះគន់របស់មហាជនខាងលើ លោកម៉ក់ ហុង អធិការប៉ូលិសខណ្ឌសែនសុខបានបញ្ជាក់ថា ជាជំហានដំបូងសមត្ថកិច្ចបង្ក្រាបអ្នកកត់កន្ទុយលេខដែលថ្លើមធំមិនខ្លាចសមត្ថកិច្ច ដោយហ៊ានកត់កន្ទុយលេខនៅតាមចិញ្ចើមផ្លូវ។ លោកបន្តថា ពុំមែនមិនបង្ក្រាបមេកន្ទុយលេខធំផ្សេងៗដែលមាននៅក្នុងផ្ទះដូចមហាជនចោទប្រកាន់នោះទេ ពោលគឺប៉ូលិសកំពុងតែមានវិធានការចាត់ការជាបន្តបន្ទាប់ចំពោះមេកន្ទុយលេខទាំងអស់នោះនៅថ្ងៃណាមួយមិនខាន៕
ចែករំលែកព័តមាននេះ