ខេត្តព្រះសីហនុ ៖ យ៉ាងហោចណាស់លំនៅឋានជាង៦០០ខ្នង នៅក្នុងឃុំមួយចំនួនក្នុងស្រុកព្រៃនប់ បានរងគ្រោះដោយខ្យល់ព្យុះរដូវបោកបក់ ចាប់ពីវេលាទៀបភ្លីថ្ងៃទី៣ ខែធ្នូមក ។ តាមមន្ត្រីមូលដ្ឋានបានឱ្យដឹងថា ទោះបីជាមិនមានខូចខាតធ្ងន់ តែបានប៉ះពាល់ដល់ពលរដ្ឋដែលរងគ្រោះ ព្រោះក្នុងចំណោមលំនៅឋានដែលប៉ះពាល់មួយចំនួនធំគឺចំលើគ្រួសារដែលមានជីវភាពមិនសូវធូរធារ និងជាផ្ទះខ្ទមតូចៗដែលងាយនឹងរងគ្រោះដោយខ្យល់រដូវ ដែលតែងតែកើតមានស្ទើររាល់ឆ្នាំ ឱ្យតែដល់រដូវច្រូតកាត់មកដល់ ។
នៅតាមឃុំមួយចំនួន ក្នុងស្រុកព្រៃនប់ ដែលមានភូមិសាស្ត្រតាមបណ្តោយផ្លូវជាតិលេខ៣ចាប់ពីវាលរេញទៅកំពត កំពុងទទួលរងនូវឥទ្ធិពលខ្យល់ព្យុះរដូវដែលបោកបក់ខ្លាំងៗមកពីភ្នំកំចាយ និងភ្នំបូកគោ ។ បណ្តាឃុំដែលរងប៉ះពាល់មាន ឃុំវាលរេញ ឃុំសាមគ្គី ឃុំទឹកល្អក់ឃុំទឹកថ្លា និងឃុំខ្លះទៀតនៅក្នុងខេត្តកំពតដែលនៅក្បែរគ្នា ក៏ទទួលរងឥទ្ធិពលពីព្យុះរដូវនេះដែរ ។
ត្រឹមតែរយៈពេល២ថ្ងៃចាប់ពីថ្ងៃទី៣ ខែធ្នូមកមានផ្ទះប្រជាពលរដ្ឋរាប់រយខ្នងរងការខូចខាត ដែលតាមរបាយការណ៍បឋមពីមន្ត្រីមូលដ្ឋានគិតត្រឹមយប់ថ្ងៃទី៣ ខែធ្នូ មានផ្ទះជាង៦០០ខ្នងរងការខូចខាត ដូចជារបើកដំបូល និងរបើកជញ្ជាំងជាដើម ។ នៅថ្ងៃទី៤ ខែធ្នូ ខ្យល់នៅតែបន្តធ្លាក់ ដែលធ្វើឱ្យលំនៅឋានរងការខូចខាតមានការកើនឡើងថែមទៀត ។ បើខ្យល់នៅតែបន្តបោកបក់ច្រើនថ្ងៃទៀត តាមការសន្និដ្ឋាន ផ្ទះពលរដ្ឋដែលរងការខូចខាតអាចឡើងដល់ជិត១.០០០ខ្នង ក្នុងនោះក៏មានផលដំណាំមួយចំនួនរងការខូចខាតដែរ ប៉ុន្តែទោះជាបែបណាមិនមានមនុស្សរងគ្រោះថ្នាក់ទេ ។
សូមបញ្ជាក់ថា បណ្តាឃុំជាប់ផ្លូវជាតិលេខ៣ វាលរេញ-កំពត តែងទទួលរងនូវឥទ្ធិពលខ្យល់ព្យុះរដូវដែលបោកបក់មកពីភ្នំកំចាយ និងភ្នំបូកគោជារៀងរាល់ឆ្នាំមិនដែលអាក់ខានឡើយ ភាគច្រើននៅចុងឆ្នាំ ដោយគ្រាន់តែឆ្នាំខ្លះមានទំហំធំ ប៉ះពាល់ធ្ងន់ និងឆ្នាំខ្លះប៉ះពាល់តិចតួច។ បាតុភូតធម្មជាតិនេះ តែងកើតឡើងតាំងពីសម័យបុរាណមក មិនមែនទើបតែកើតមានថ្មីៗនេះទេដែលអាចនិយាយបានថា អ្នកភូមិនៅតំបន់នោះមានទម្លាប់ជាមួយខ្យល់ព្យុះរដូវនេះ តកូន តចៅ មិនមានអ្វីប្លែកឡើយ តែអ្វីដែលប៉ះពាល់ក្រោយពីនោះគឺការខូចខាតផ្ទះសម្បែង ៕
ចែករំលែកព័តមាននេះ