ដីទីតាំងប៉ុស្តិ៍នគរបាលរដ្ឋបាលព្រែកលៀប ខណ្ឌជ្រោយចង្វា ដែលជា«ដីត្រូវប៉ាន់» ត្រូវបានគេលួចខ្សឹបប្រាប់ថា មានក្រុមហ៊ុនលួចរត់ការទិញយកបាត់ទៀតហើយ ក្រោមរូបភាពដោះដូរ«យកឆ្នាំងមាសដូរយកឆ្នាំងស្ពាន់»ហើយសល់លុយមិនដឹងទុកនៅថតតុណាឡើយ ដោយគ្រោងនឹងដេញមន្ត្រីនគរបាលចេញពីទីតាំងនោះទៅនៅទីតាំងថ្មី ដែលជាផ្ទះល្វែងមានកម្ពស់២ជាន់នៅបុរីប៊ុន ជេស្ឋ ដែលស្ថិតនៅភូមិព្រែកលៀប…
ដីទីតាំងប៉ុស្តិ៍នគរបាលរដ្ឋបាលព្រែកលៀប ខណ្ឌជ្រោយចង្វា ដែលជា«ដីត្រូវប៉ាន់» ត្រូវបានគេលួចខ្សឹបប្រាប់ថា មានក្រុមហ៊ុនលួចរត់ការទិញយកបាត់ទៀតហើយ ក្រោមរូបភាពដោះដូរ«យកឆ្នាំងមាសដូរយកឆ្នាំងស្ពាន់»ហើយសល់លុយមិនដឹងទុកនៅថតតុណាឡើយ ដោយគ្រោងនឹងដេញមន្ត្រីនគរបាលចេញពីទីតាំងនោះទៅនៅទីតាំងថ្មី ដែលជាផ្ទះល្វែងមានកម្ពស់២ជាន់នៅបុរីប៊ុន ជេស្ឋ ដែលស្ថិតនៅភូមិព្រែកលៀប ដែលបានទិញទុកមុនរួចស្រេចហើយ ។ ទោះបីយ៉ាងនេះក្តី នគរបាលប៉ុស្តិ៍ ដែលជាម្ចាស់កំពុងជ្រួលគ្រប់គ្នាព្រោះពុំទាន់បានចំណែកនៅឡើយនោះទេ ដែលខ្លះអួតថាមិនចេញទេ ។
តាមព័ត៌មានបានឱ្យដឹងថា ដីស្នាក់ការនគរបាលប៉ុស្តិ៍ព្រែកលៀបនោះ ត្រូវបានគេដឹងថា ក្បាលដី
មានទំហំប្រមាណ២៨ម៉ែត្រគុណនឹង៣០ ម៉ែត្រ ព្រមទាំងចំណីទន្លេមេគង្គជាច្រើនម៉ែត្រទៀត ស្ថិត
នៅស្របតាមមាត់ទន្លេមេង្គក្នុងភូមិព្រែកលៀប សង្កាត់ព្រែកលៀប ដែលអាចធ្វើកន្លែងលំហែ
កាយសម្រាប់អ្នកមានស្តុកស្តម្ភហើយក៏ជាដីត្រូវប៉ាន់ធំ ដែលក្រុមហ៊ុននិងអ្នកមានព្យាយាមរកខ្សែពួររត់ការ លេបត្របាក់យកជាយូរមកហើយ ទើបតែបានសម្រេចនិងសង្ស័យថាមានខ្នងក្រាស់ៗហើយមើលទៅ ។
ថ្មីៗនេះមានការភ្ញាក់ផ្អើល ឈុលរញ្ជួយដល់មន្ត្រីនគរបាលប៉ុស្តិ៍ បន្ទាប់ពីក្រុមហ៊ុនដែលមានសំណាង យកឯកសារដោះដូរមកបង្ហាញព្រមទាំងបានចរចាមួយគ្រួសារ ដែលបានរស់នៅតាំងពីស្នាក់ការប៉ុស្តិ៍ នៅជាមណ្ឌលសុខភាពស្រុកមុខកំពូលម្ល៉េះ ឱ្យចាកចេញជាថ្នូរប្រាក់៤ម៉ឺនដុល្លារ ។ តាមព័ត៌មានឱ្យដឹងទៀតថា ក្រុមហ៊ុនដែលមានភ័ព្វសំណាងឈ្មោះ ឡុង ម៉ាអុិនវេសមេន រៀលអុីស្ទេច ដែលគេអះអាងថា ជាក្រុមហ៊ុនមួយដែលមានខ្សែពួរធំៗ ។
នៅក្នុងការដោះដូរស្នាក់ការប៉ុស្តិ៍ត្រូវទម្លាយថាក្រុមហ៊ុន នេះបានរត់ការរួចហើយ និងបានទិញផ្ទះមួយល្វែងទុកជាស្រេចមានតម្លៃប្រមាណជាងដប់ម៉ឺនដុល្លារ នៅសល់តែការដោះស្រាយ ដល់មន្ត្រីនគរបាលពីប៉ុស្តិ៍ដល់ខណ្ឌតែប៉ុណ្ណោះ ។ ការលក់ស្នាក់ការប៉ុស្តិ៍នគរបាលរដ្ឋបាលព្រែកលៀបនេះ ធ្វើឱ្យមន្ត្រីនគរបាលប៉ុស្តិ៍ខ្លះ មានប្រតិកម្មផងដែរ តែហាក់មិនហ៊ានចេញស្តី ព្រោះបើមិនមានភ្លើងខៀវពីមេៗឬថ្នាក់ក្រសួងនោះទេ ប្រហែលជាមិនអាចទៅរួចឡើយ ។
តាមព័ត៌មានពីក្រុមហ៊ុនអចលនទ្រព្យល្បីឈ្មោះមួយបានប្រាប់ឱ្យដឹងទៀតថា ដីប៉ុស្តិ៍ចាស់មានតម្លៃប្រមាណជិត២លានដុល្លារ តម្លៃទីផ្សារបច្ចុប្បន្ន ។ ចំណែកមន្ត្រីនគរបាលនៅប៉ុស្តិ៍និងនគរបាលខណ្ឌរាប់រយនាក់ មិនទាន់បានទទួលផលចំណែកណាមួយនៅឡើយនោះទេ ។
ជុំវិញការដោះដូរនេះត្រូវបានគេរិះគន់ថា ក្រោមរូបភាពដោះដូរឆ្នាំងមាស ដូរយកឆ្នាំស្ពាន់ ហើយ ? តាមលិខិតស្នើសុំរបស់ក្រុមហ៊ុនឡុងម៉ា អុិនវេសមេន រៀលអុីស្ទេច បានឱ្យដឹងថា «ទីតាំងស្នាក់ការប៉ុស្តិ៍ព្រែកលៀប បានសភាពចាស់ទ្រុឌទ្រោម ពុកផុយ តូចចង្អៀត ហើយមានប្រជាពលរដ្ឋមួយគ្រួសាររស់នៅក្នុងទីតាំងប៉ុស្តិ៍នេះផងដែរ ។ ម្យ៉ាងទៀតក្រុមហ៊ុននាងខ្ញុំ មានបំណងចូលរួមចំណែកអភិវឌ្ឍន៍ កែលម្អសោភ័ណភាពទីក្រុងឱ្យស្រស់បំព្រង…» ។
នៅ ក្នុង លិខិត ក៏បាន ឱ្យ ដឹងទៀតថា «នៅក្នុងការ ដោះដូរទីតាំងប៉ុស្តិ៍ជាថ្នូរផ្ទះ មួយល្វែង ដែលមានទំហំ៤,១០ម៉ែត្រគុណនឹង១៦ម៉ែត្រ ជាន់ (E0 E1 E2) ដែលស្ថិតនៅសង្កាត់ព្រែកលៀប ខណ្ឌជ្រោយចង្វា និងដោះស្រាយគោលនយោបាយជូនគ្រួសារដែលរស់នៅប៉ុស្តិ៍ព្រែកលៀបចំនួន៤ម៉ឺនដុល្លារទៀតផង» ។នៅក្នុងលិខិតនោះត្រូវគេរិះគន់ថា អភិវឌ្ឍមែនពីដីធំទូលាយមកផ្ទះល្វែងមិនសមជាទីតាំងរដ្ឋបាបម្រើប្រជាជនសោះ ។
លោកវរសេនីយ៍ឯក សៀម សុត្ថាវុធ អធិការនគរបាលខណ្ឌជ្រោយចង្វា បានឱ្យដឹងថា «ការដោះដូរស្នាក់ការប៉ុស្តិ៍នគរបាលរដ្ឋបាលព្រែកលៀបនេះ លោកបានឃើញឯកសារ និងសជណ ប្រគល់ឱ្យក្រុមហ៊ុនមួយ ហើយ តែពុំទាន់ដឹងថាស្នាក់ការថ្មីនៅកន្លែងណាមួយពិតប្រាកដឡើយ» ។ទោះបីជាយ៉ាងណា កោះសន្តិភាពពុំទាន់ទទួលការបំភ្លឺណាមួយ ពីក្រុមហ៊ុនដ៏មានសំណាងនេះបាននៅឡើយទេ ម្សិលមិញនេះ ។
បើតាមមន្ត្រីនគរបាលប៉ុស្តិ៍ច្រើននាក់ដែលខ្លះខឹងមុខក្រហមសុំមិនបញ្ចេញឈ្មោះ បានប្រាប់កោះសន្តិភាពថា ពួកគេអត់សប្បាយចិត្តទេ ព្រោះទីតាំងធ្លាប់បំពេញការងារមានដីធំទូលាយមានខ្យល់អាកាសពីមាត់ទន្លេមេគង្គដ៏ត្រជាក់ មានកន្លែងសម្រាប់ ប្រជាជនដែលមកទំនាក់ទំនងការងារ និងការចតយានយន្តក៏ងាយស្រួល ស្រាប់តែត្រូវទៅនៅប៉ុនបាតដៃទៅវិញ ។ ពួកគេថា អភិវឌ្ឍពីធំទៅតូច រួមទៅៗ តើអភិវឌ្ឍស្អីទៅ ?
តាមកត់សម្គាល់កន្លងមក ការដោះដូរទីតាំងរបស់រដ្ឋ ដូចជាទីតាំងនគរបាល៣អង្គភាពរួមគ្នាក្នុងសង្កាត់
បឹងសាឡាងច្រើនខែកន្លងមកពុំុទាន់ស្ងប់បាតុភាពនៅឡើយទេទោះបីបានចែកមន្ត្រីប៉ូលិសជាម្ចាស់ម្នាក់ៗ២០០ដុល្លារក៏ដោយ ។ ព្រោះមានដំណឹងក្រៅៗថា មេៗត្រូវបាន២ពាន់ដុល្លារ ហេតុអីក៏ឃើញតែ២០០ដុល្លារដូចគ្នាអីចឹង តើវាជ្រុះឬវាស្ទះចរាចរណ៍នៅស្តុបមួយណា ហេតុអីក្រចេញភ្លើងខៀវម្ល៉េះ ?
ចែករំលែកព័តមាននេះ