រាជធានីភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល មានប្រសាសន៍ថា បន្ទាប់ពីមានការរិះគន់ពីមហាជនពាក់ព័ន្ធនឹងអ្នកគ្រប់គ្រងកន្លែងថ្លឹងរថយន្ត រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថាត្រូវធ្វើការផ្លាស់ប្តូរឬបង្វែរអ្នកគ្រប់គ្រងកន្លែងថ្លឹងរថយន្ត ដោយមិនត្រូវទុកយូរឆ្នាំនោះទេ…
រាជធានីភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល មានប្រសាសន៍ថា បន្ទាប់ពីមានការរិះគន់ពីមហាជនពាក់ព័ន្ធនឹងអ្នកគ្រប់គ្រងកន្លែងថ្លឹងរថយន្ត រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងថាត្រូវធ្វើការផ្លាស់ប្តូរឬបង្វែរអ្នកគ្រប់គ្រងកន្លែងថ្លឹងរថយន្ត ដោយមិនត្រូវទុកយូរឆ្នាំនោះទេ ។ ការថ្លែងបែបនេះក្នុងកិច្ចប្រជុំបូកសរុបលទ្ធផលការងារចរាចរណ៍ផ្លូវគោករយៈពេល១០ខែឆ្នាំ២០១៩នារសៀលថ្ងៃទី៣ ធ្នូ នៅទីស្តីការក្រសួង ។
លោកទេសរដ្ឋមន្ត្រី និងជារដ្ឋមន្ត្រីក្រសួងសាធារណការនិងដឹកជញ្ជូនបានលើកឡើងទៀតថា ត្រូវពង្រឹងការថ្លឹងរថយន្តនេះបន្ថែមទៀត ។ ដូចជាត្រូវមាននីតិវិធី ប្តូរប្រធានគ្រប់គ្រងការងារថ្លឹងជញ្ជីងតាមផ្លូវដោយកុំដាក់ នៅកន្លែងនឹង៥ឬ១០ឆ្នាំដូចបច្ចុប្បន្ន ។ លោកបានកំណត់ថា ត្រូវដាក់តែ២ឆ្នាំត្រូវបង្វិលឬដូរ ចេញ កុំទុកឱ្យនៅយូរ នាំឲ្យមានការរិះគន់ ។លោកបន្តថា ជាក់ស្តែងបណ្តាញសង្គមហ្វេសប៊ុកកាលពេលថ្មីៗនេះបានបង្ហោះច្រើនណាស់ចំពោះការដាក់ជញ្ជីងថ្លឹងរថយន្តថាកន្លែងមិនបានការ ហើយជាកន្លែងយកលុយ ដោយមិនបានថ្លឹងត្រឹមត្រូវ ។
លោកបញ្ជាក់ថា៖ «ករណីថ្លឹងរថយន្តនេះយើងមិនអាចទទួលយកបានទេ ពីការរិះគន់ពី មហាជន គឺយើងត្រូវតែឲ្យមានការថ្លឹងរថយន្តឲ្យបានត្រឹមត្រូវ ។ ត្រូវផ្លាស់ប្តូរប្រធានគ្រប់គ្រង ត្រូវតែប្តូរ មិនត្រូវអនុញ្ញាតឲ្យធ្វើបែបនេះ ធ្វើឲ្យខូចមុខមាត់ក្រសួង និងរាជរដ្ឋាភិបាលនោះទេ ។ គ្រាន់តែថ្លឺងហើយមិនដឹងអ្វីផងយកលុយហើយទៅបាត់រឿងនឹងមានច្រើន តែខ្ញុំមិនដឹងថា ការពិតឬមិនពិត ។ ដូច្នេះត្រូវតាមដានថែមទៀតចំពោះករណីនេះ» ។
លោកទេសរដ្ឋមន្ត្រី ក៏បានឲ្យដឹងថាចំពោះជញ្ជីងថ្លឹងរថយន្តនេះដែលក្រសួង បានកំពុង តែរៀបចំបំពាក់ប្រព័ន្ធកាមេរ៉ា ថ្លឹងទម្ងន់ជាមុន មុននឹងដល់កន្លែងថ្លឹង ។ ពាក់ព័ន្ធនឹងជញ្ជីងថ្លឹងរថយន្តនេះដែរលោករដ្ឋមន្ត្រីក៏បានស្នើឲ្យយកជញ្ជីងចល័តទៅដាក់នៅមុខរោងចក្រស៊ីម៉ង់ត៍ដោយកុំឲ្យដឹង ។លោករដ្ឋមន្ត្រីក៏បានលើកឡើងថា ត្រូវកោះអញ្ជើញក្រុមហ៊ុនដឹកស៊ីម៉ង់ត៍ទាំងអស់មកជជែកគ្នាថាបើនៅតែដឹកលើសទម្ងន់ទៀត នឹងត្រូវបិទអាជ្ញា ប័ណ្ណកុំរកស៊ីបាន ។ យើងនឹងពិភាក្សាជា មួយក្រសួងឧស្សាហកម្ម និងសិប្បកម្ម ក្រសួងរ៉ែ និងថាមពល ដែលជាម្ចាស់គ្រប់គ្រងពីលើស ថារោងចក្រនេះមិនគោរពច្បាប់ទេនៅតែដឹកលើសទម្ងន់ ។
លោកបញ្ជាក់ថា៖«យើងដាក់ជញ្ជីងចល័តមួយខែនៅកន្លែងនឹង ដើម្បីចាំចាប់ ហើយ អញ្ជើញក្រុមហ៊ុននឹងមកជជែកគ្នា ហើយបើនៅតែបន្តទៀត គឺយើងស្នើបិទអាជ្ញាប័ណ្ណតែម្តង ។ យើងមិនអាចធ្វើម្នាក់ឯងបានទេ រត់ចុះរត់ឡើង តែយើងទៅចាប់នៅគោលដៅតែម្តងទើបបាន» ៕
ចែករំលែកព័តមាននេះ