យោងតាមដំបូន្មានរបស់សម្ដេចព្រះសង្ឃរាជ ជួន ណាត បានមានព្រះបន្ទូលអំពីទម្លាប់ដែលគួរធ្វើ និងមិនគួរធ្វើ ឬហៅថាទម្លាប់ប្រក្រតីប្រចាំថ្ងៃ ដែលជាទម្លាប់ពិបាកនឹងកែបានដូចជា៖
ការប្រព្រឹត្តជាប់ដោយកាយវាចាចិត្តគ្រប់ពេលវេលាយូរៗទៅ អាចជាប់ទៅជាទម្លាប់ ហៅថា ចរិតប្រក្រតី, ដូចយ៉ាងសម្ដីគ្រោតគ្រាត ដែលធ្លាប់និយាយជាប់ជាទំនៀម ហៅថា ចរិតគ្រោតគ្រាត, ការនិយាយកុហកលេង ចំពោះមិត្តសម្លាញ់យូរៗទៅក៏អាចធ្លាប់មាត់ជាទំនៀម នេះហៅថា ចរិតកុហក ។
ការជក់បារី ដំបូងឃើញគេជក់ ក៏ជក់លេងតាមគេ យូរៗទៅក៏អាចជាប់ជាទំនៀមជក់បារី ញៀនជក់បារី ។ ការដេកថ្ងៃ ដំបូងឃើញគេដេកថ្ងៃ ក៏ដេកតាមគេ លុះដេកថ្ងៃយូរៗទៅក៏អាចក្លាយជាទំនៀម នេះហៅថា ចរិតដេកថ្ងៃ ។
ការប្រព្រឹត្តទាល់តែជាប់ជាទម្លាប់ បើបុគ្គលចង់លះបង់ចេញគឺពិបាកនឹងលះចេញខ្លាំងណាស់ ដែលហៅថា ចរិតប្រក្រតី សម្ដេចព្រះសង្ឃរាជ ព្រះអង្គក៏មានចរិតប្រក្រតីដែរ ប៉ុន្តែចរិតរបស់សម្ដេចជាចរិតធូរស្រាល ពុំមែននាំឲ្យខូចខាតពេលវេលា ខូចខាតប្រយោជន៍នោះឡើយ ។
មនុស្សខ្លះមានចរិតប្រក្រតីជាប់ជោកធ្ងន់ណាស់ ដូចយ៉ាងចរិតប្រក្រតីផឹកស្រាទាល់តែផឹកជាប់ ដែលអាចលះបង់ចេញមិនបាន។ ចរិតប្រក្រតីបែបនេះ ឈ្មោះថាជាចរិតនាំឲ្យខូចខាតទាំងជីវិតខ្លួនឯងទាំងទ្រព្យសម្បត្តិរបស់ខ្លួន ។
ការជក់អាភៀន ញៀនថ្នាំក៏អាចនាំឲ្យជាប់ញៀនដែរ ដែលបុគ្គលលះចេញបានដោយកម្រណាស់។ ការញៀនអាភៀន ញៀនថ្នាំនេះ ហៅថា ចរិតប្រក្រតីជក់អាភៀន ញៀនថ្នាំ។ មនុស្សអ្នកមានចរិតបែបនេះ នាំឲ្យខូចខាតទាំងជីវិត ទាំងទ្រព្យសម្បត្តិ ជាងចរិតអ្នកផឹកសុរាច្រើនណាស់ ។
ដូច្នេះសម្រាប់អ្នកដែលកាន់ទម្លាប់មិនល្អផ្សេងៗ ឬកំពុងតែប្រព្រឹត្តក្តី មេត្តាលះបង់ចេញឲ្យអស់ កាន់ចាប់យកអ្វីដែលជាទំនៀមល្អក្នុងជីវិត និងធ្វើឲ្យជាប់ជាប្រចាំឲ្យក្លាយជា ចរិតប្រក្រតី របស់ខ្លួនតែម្តងទៅ ។ ជៀសវាងទម្លាប់មិនល្អមានឱកាសជ្រៀតចូលក្នុងខ្លួន ដូចជាទម្លាប់ខ្ជិល ដេកច្រើន ញៀនស្រា ឬញៀនអាភៀនជាដើម ដែលនាំឲ្យបំផ្លាញជីវិតរបស់មនុស្សយើង និងខូចអនាគតថែមទៀតផង ។ ដោយសាន សារិន
ចែករំលែកព័តមាននេះ