រាជធានីភ្នំពេញ ៖ ពាក្យចាស់ពោលថា «ការសិក្សាគ្មានដែនកំណត់ គ្មានទីបញ្ចប់ គឺជាការសិក្សាមួយជីវិត» ដូច្នេះអាយុគ្រាន់តែជាតួលេខដែលមិនអាចបញ្ឈប់ដូនជីមួយរូបវ័យដល់ទៅ៧១ឆ្នាំឲ្យបំភ្លេចចោលការសិក្សានោះទេ ។
ជាក់ស្តែងលោកយាយ អៀរ សុខា បានធ្វើឲ្យមហាជនស្ងើចសរសើរចំពោះការតស៊ូរៀនសូត្ររហូតទទួលបានបញ្ចប់ការសិក្សាថ្នាក់បរិញ្ញាបត្រ និងទទួលបានសញ្ញាបត្រថ្នាក់បរិញ្ញាបត្រ ឯកទេស ទស្សនវិទ្យា ទៀតផង ដែលនេះសបញ្ជាក់ថា លោកយាយគឺជាធនធានមួយដ៏កម្រ និងជានិស្សិតគំរូប្រចាំឆ្នា២០១៩ របស់ពុទ្ធិកសាកលវិទ្យាល័យព្រះសីហនុរាជ។
លោកយាយ អៀរ សុខា បានបញ្ចប់ការសិក្សាថ្នាក់បរិញ្ញាបត្រ ឯកទេស ទស្សនវិទ្យា និងបានចូលរួមពិធីប្រគេននិងប្រគល់សញ្ញាបត្ររបស់ពុទ្ធិកសាកលវិទ្យាល័យព្រះសីហនុរាជ នៅវិទ្យាស្ថានអប់រំជាតិ ភ្នំពេញនាថ្ងៃទី៥ ខែធ្នូ ឆ្នាំ២០១៩នេះ ។ សូមចូលរួមត្រេកអរជាមួយលោកយាយផងដែរ។
លោកបានឲ្យដឹងថាលោកយាយ មានស្រុកកំណើតនៅស្រុកកោះសុទិន ខេត្តកំពង់ចាម សព្វថ្ងៃលោកយាយជាមនុស្សដែលរស់នៅម្នាក់ឯង គ្មានកូនចៅនោះទេ ។ លោកយាយមានកូនប្រុសម្នាក់ប៉ុន្តែត្រូវបានស្លាប់នៅអាយុ៣៣ឆ្នាំ ។ លោកយាយនិយាយថា គាត់តស៊ូតាមបែបធម្មជាតិ ដោយខិតខំប្រឹងប្រែងដោយខ្លួនឯងស្ទើរទាំងស្រុង ទម្រាំមានថ្ងៃនេះលោកយាយទ្រាំហូបខ្វះខាតដើម្បីរៀនអោយចប់ចុងចប់ដើម។
លោកយាយបន្តថា គាត់ខិតខំប្រឹងរៀនតាំងពីថ្នាក់បឋមសិក្សា រហូតដល់បញ្ចប់ថ្នាក់បរិញ្ញាបត្រ នៅសាកលវិទ្យាល័យសីហនុរាជខេត្តកំពង់ឆ្នាំង ។ ពិតជាគួរអោយសរសើរមែនទេសម្រាប់លោកយាយដែលមានអាយុរហូតដល់៧១ឆ្នាំទៅហើយ តែនៅតែខិតខំប្រឹងរៀនសូត្ររហូតទទួលបានលទ្ធផលល្អបែបនេះ ។ លោកយាយអំពាវនាវដល់ពុទ្ធបរិស័ទ ឬដូនជីត្រូវខិតខំតស៊ូរៀនសូត្រទាំងអស់គ្នាដើម្បីទ្រទ្រង់ព្រះពុទ្ធសាសនា ។
លោកយាយ អៀរ សុខា បានប្រាប់ឲ្យដឹថា « ខ្ញុំព្រះករុណាឈ្មោះ អ៊ា សុខា រៀននៅសកលវិទ្យាល័យព្រះសីហនុរាជខេត្តកំពង់ឆ្នាំង ។ ខ្ញុំសប្បាយចិត្តបានទទួលសញ្ញាបត្រនៅថ្ងៃនេះ។ តែបញ្ហាត្រង់ខ្ញុំករុណាជាដូនជីទុរគត មានតែម្នាក់ឯងគត់ អត់មានកូនចៅទេ» ។ ខ្ញុំករុណាតស៊ូយកសញ្ញាបត្របរិញ្ញាបត្របានតាមកម្លាំងធម្មជាតិ អត់មានអ្នកឧបត្ថម្ភទេ ។ កាលពីរៀននៅវិទ្យាល័យរាជបូរណ៍ ខ្ញុំករុណាហូបត្រីតម្លៃ១០០០រៀល សម្រាប់២ថ្ងៃ ខ្ញុំករុណាបេះត្រកូន បេះស្លឹកអំពិល តាមផ្លូវ »។ ដូនជីខាងលើក៏បានផ្ញើសារកូនចៅខ្មែរថា «ខ្ញុំករុណាសូមអំពាវដល់ពុទ្ធបរិស័ព ឬមួយក៏ដូនជីដែលមានភេទជាស្ត្រី ទទួលបាននូវយេនឌ័រក្នុងការសិក្សា ។ខ្ញុំករុណា តស៊ូរៀនសូត្រគឺដើម្បីទ្រទ្រង់ពុទ្ធសាសនានិងមានសទ្ធា និងឆន្ទៈពិតប្រាកដ មិនមានអ្នកណាបង្ខំទេ» ៕ (កែសម្រួលដោយ ៖ ធីតា)
ចែករំលែកព័តមាននេះ