សហរដ្ឋអាមេរិក-ចិន ៖ កាលពីថ្ងៃទី៤ធ្នូប្រធានាធិបតីអាមេរិក លោកដូណាល់ត្រាំថ្លែងថា ការចរចាពាណិជ្ជកម្មជាមួយចិនប្រព្រឹត្តទៅយ៉ាងល្អបំផុត។ លោកត្រាំហាក់ប្រកាន់វោហាសាស្ត្រដែលវិជ្ជមានបំផុតជាងពេលមុន ដោយលោកលើកពីការចុះហត្ថលេខា លើកិច្ចព្រមព្រៀងមួយបន្ទាប់ពីការបោះឆ្នោត ប្រធានាធិបតីអាមេរិកនាខែវិច្ឆិកាឆ្នាំ២០២០។
ក្រោយការជួបគ្នាកំពូលរបស់អូតង់ជិតទីក្រុងឡុងដ៏លោកត្រាំអះអាងថា ការពិភាក្សាគ្នា ប្រព្រឹត្តទៅដ៏ល្អបំផុត ហើយយើងនឹងឃើញអ្វីដែលនឹងកើតឡើង។ ខណៈគេកត់សម្គាល់ឃើញសុទិដ្ឋិនិយមមួយចំនួន ចាប់តាំងពីច្រើនសប្ដាហ៍មកហើយ ក្នុងមជ្ឈដ្ឋានសេដ្ឋកិច្ចនិងហិរញ្ញវត្ថុលោកត្រាំកាលពីថ្ងៃទី៣ធ្នូបានដាក់ក្ដីសង្ឈឹមលើកិច្ចព្រមព្រៀងពាណិជ្ចកម្មមួយ ក្នុងពេលដ៏ឆាប់ រវាងសហរដ្ឋអាមេរិកនិងចិន ដោយលោកថ្លែងថា លោកមិនទាន់កំណត់ពីកាលបរិច្ឆេទច្បាស់ណាមួយ តែលោកហាក់ចង់និយាយយោង ដល់ការរង់ចាំលទ្ធផលនៃការបោះឆ្នោតប្រធានាធិបតីអាមេរិកនាខែវិច្ឆិកាឆ្នាំ២០២០។
ទោះបីយ៉ាងណាទីភ្នាក់ងារព័ត៌មានBLOOMBERG រាយការណ៍នាថ្ងៃទី៤ធ្នូថា ក្រុងវ៉ាស៊ិនតោននិងក្រុងប៉េកាំងបានខិតជិតគ្នាកាន់តែខ្លាំង ទៅរកការសម្របសម្រូលគ្នាមួយលើទឹកប្រាក់បង់ពន្ធគយ ដែលនឹងត្រូវលុបចោលក្នុងក្របខណ្ឌនៃកិច្ចព្រមព្រៀងពាណិជ្ជកម្មមួយផ្នែក៕ (កែសម្រួលដោយ ៖ បុប្ផា)
ចែករំលែកព័តមាននេះ