ថ្លើម គឺជាសរីរាង្គដ៏សំខាន់មួយនៃរាងកាយដែលរវល់ជាប់ពេញមួយថ្ងៃ ហើយដំណើរការមុខងារយ៉ាងល្អឥតខ្ចោះដោយគ្មានកំហុស។វាដើរតួនាទីចាំបាច់ក្នុងការរក្សាឱ្យរាងកាយក៏ដូចជាប្រព័ន្ធរំលាយអាហារមានសុខភាពល្អ។ លើសពីនេះទៅទៀត ថ្លើម គឺមានមុខងារបន្សាបជាតិពុលក្នុងរាងកាយ និងរក្សាឲ្យកម្រិតនៃការរំលាយអាហារមានតុល្យភាព។ អ្វីដែលអ្នកទទួល និងទម្លាប់ផ្សេងៗរបស់អ្នក គឺសុទ្ធតែមានឥទ្ធិពលលើសុខភាពថ្លើម។ ខាងក្រោម Health.com.kh នឹងបង្ហាញនឹងបង្ហាញឱ្យដឹងពីទម្លាប់ទូទៅបំផុតមួយចំនួនដែលអាចបង្កផលប៉ះពាល់ដល់សុខភាពថ្លើម ហើយអ្នកគួរតែបញ្ឈប់ ឬផ្លាស់ប្ដូរចេញភ្លាម ៖
១. ទទួលទានគ្រឿងស្រវឹងច្រើន ៖ ថ្លើម គឺមានតួនាទីសំខាន់ក្នុងការបញ្ចេញនូវរាល់ជាតិពុលដែលបង្កគ្រោះថ្នាក់ដល់រាងកាយ។ ការទទួលទានជាតិអាល់កុល ឬគ្រឿងស្រវឹងច្រើនហួសពេកជាប្រចាំអាចធ្វើឱ្យមានការបំផ្លាញដល់សមត្ថភាពនៃថ្លើម។ ប្រសិនបើអ្នកទទួលទានស្រាច្រើនរាល់ថ្ងៃនោះថ្លើមនឹងរវល់តែធ្វើការកម្ចាត់នូវជាតិពុលនៃស្រា ហើយគ្មានពេលដើម្បីបំពេញមុខងារផ្សេងទៀតឡើយ។
គ្រឿងស្រវឹងសម្លាប់កោសិកាថ្លើមដែលមានសុខភាពល្អ ហើយកាត់បន្ថយថាមពលថ្លើម បន្ទាប់មកថ្លើមនឹងប្រែជាងាយកើតមានជំងឺផ្សេងៗ រួមទាំងការរលាកជាច្រើនផងដែរ។ ដូច្នេះសូមព្យាយាមជៀសវាងទទួលទានគ្រឿងស្រវឹងច្រើនលើសពេក បើអ្នកចង់ឱ្យថ្លើមមានសុខភាពល្អ។
២. ជក់បារី ៖ ការជក់បារីជាប្រចាំអាចបណ្ដាលឲ្យមានផលប៉ះពាល់ចំពោះសុខភាពថ្លើម ក៏ដូចជាសមត្ថភាពក្នុងការបំពេញមុខងារ។ ការជក់បារីផលិតនូវសារធាតុគីមីគ្រោះថ្នាក់ដែលបំផ្លាញកោសិកាថ្លើម និងពន្យឺតដំណើរការនៃមុខងាររបស់ថ្លើមដែលធ្វើឲ្យថ្លើមប្រែជាគ្មានប្រយោជន៍ ហើយបណ្ដាលឲ្យខ្សោយថ្លើម។ ដូច្នេះចូរព្យាយាមបញ្ឈប់ ឬកែប្រែទម្លាប់នៃការជក់បារីរបស់អ្នក ដើម្បីរក្សាបាននូវសុខភាពល្អ។
៣. គេងមិនគ្រប់ ៖ ការគេងមិនគ្រប់មិនត្រឹមតែធ្វើអោយអ្នកបាក់សម្រស់ប៉ុណ្ណោះទេ ប៉ុន្តែក៏ជះឥទ្ធិពលខ្លាំងក្លាចំពោះសុខភាពរាងកាយទាំងមូល រួមទាំងថ្លើម។ ក្រៅពីបង្កភាពស្ត្រេសលើថ្លើមហើយនោះ ការគេងមិនគ្រប់ក៏អាចបង្កជាជំងឺធាត់ជ្រុលដែលផ្សារភ្ជាប់នឹងបញ្ហាខ្លាញ់រុំថ្លើមផងដែរ។
៤. របបអាហារមិនល្អ ៖ ទម្លាប់នៃការទទួលទានអាហារកែច្នៃ ឬការទទួលទានអាហារកំប៉ុង និងកញ្ចប់ច្រើនបង្កឱ្យប្រព័ន្ធភាពស៊ាំចុះខ្សោយ ហើយបង្កើនជាតិខ្លាញ់ក្នុងរាងកាយធ្វើឱ្យអ្នកធាត់។ ការទទួលទានអាហារមិនត្រឹមត្រូវដែលគ្មានសារធាតុចិញ្ចឹមអាចបង្កើតជាតិខ្លាញ់ព័ទ្ធជុំវិញថ្លើមហៅថាជំងឺខ្លាញ់រុំថ្លើមដែលមិនមែនបណ្ដាលមកពីជាតិអាកុល។ ថ្លើមត្រូវប្រឹងធ្វើការកាន់តែខ្លាំងឡើងដើម្បីកម្ចាត់ខ្លាញ់នេះដែលបណ្ដាលឱ្យកោសិកានៃថ្លើមទទួលរងការខូចខាត ហើយវាក៏អាចបង្កឱ្យខ្សោយថ្លើមផងដែរ។ ដូច្នេះចូរព្យាយាមទទួលទានបន្លែបៃតង និងផ្លែឈើឲ្យបានច្រើនជំនួសអាហារកែច្នៃវិញទើបប្រសើរ។
៥. ធាត់ជ្រុល ៖ ភាពធាត់ជ្រុលក៏ប៉ះពាល់ដល់សុខភាពថ្លើមផងដែរ ដោយវត្តមាននៃជាតិខ្លាញ់ច្រើនពេកក្នុងថ្លើមអាចបង្កអោយកើតមានផលវិបាកធ្ងន់ធ្ងរផ្សេងៗ រួមទាំងជំងឺខ្លាញ់រុំថ្លើម។
៦. ទទួលទានថ្នាំច្រើនពេក ៖ ហេតុផលដ៏សំខាន់មួយផ្សេងទៀតដែលអាចធ្វើឱ្យខូចថ្លើមនោះ គឺការទទួលទានថ្នាំច្រើនលើសពេក។ មនុស្សមួយចំនួនតែងទទួលទានថ្នាំពេទ្យដោយគ្មានវេជ្ជបញ្ជា ឬការយល់ដឹងផ្នែកវេជ្ជសាស្ត្រច្បាស់លាស់ ហើយពួកគេមិនចាប់អារម្មណ៍ដឹងទេថាការធ្វើបែបនេះ គឺផ្ដល់ផលប៉ះពាល់គួរឱ្យព្រួយបារម្ភចំពោះសុខភាពថ្លើម។
៧. ទប់នោម ៖ នៅពេលអ្នកមានអារម្មណ៍ឈឺនោម ចូរប្រញាប់ទៅនោមភ្លាម កុំព្យាយាមទប់ ឬទ្រាំក៏ព្រោះវាអាចបង្កគ្រោះថ្នាក់ដល់ថ្លើមនិងតម្រងនោមបាន។ ជាពិសេសចំពោះការឈឺនោមនៅពេលព្រឹក គឺអ្នកមិនគួរទប់ឡើយ។
៨. ឧស្សាហ៍ទទួលទានប្រៃ ៖ ការទទួលទានអំបិល ឬអាហារប្រៃច្រើងជាងពី ២០០០ ទៅ ២៤០០ មីលីក្រាមជាប្រចាំអាចបង្កផលប៉ះពាល់ដល់ថ្លើមគួរឱ្យព្រួយបារម្ភ។ ជាតិសូដ្យូម ឬអំបិលជាកត្តាចម្បងនៃការរលាកក្នុងរាងកាយ រួមទាំងការរក្សាជាតិទឹកលើសកម្រិតដែលបង្កើនបន្ទុកលើមុខងារនៃថ្លើម (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ