រាជធានីភ្នំពេញ ៖ សមាគមអន្តរជាតិនៃអភិបាលក្រុងនិយាយភាសាបារាំងហៅកាត់ AIMF ដែលកម្ពុជាធ្វើជាម្ចាស់ផ្ទះបានបិទបញ្ចប់ដោយជោគជ័យហើយ ដោយបានប្រកាសគាំទ្រដល់សមាជិកទាំងអស់ឱ្យលើកជាគម្រោងល្អៗបំរើដល់ជីវភាពរស់នៅប្រជាពលរដ្ឋ និងលើកកម្ពស់បរិស្ថានក្នុងទីក្រុង ។ ថ្លែងក្នុងសន្និសីទសារព័ត៌មានបិទបញ្ចប់កិច្ចប្រជុំមហាសន្និបាតលើកទី៣៩ នៃសមាគមអន្តរជាតិនៃអភិបាលក្រុង ប្រើប្រាស់ភាសារបារាំងនារសៀល ថ្ងៃទី០៤ ខែធ្នូ នៅសណ្ឋាគាសុខាភ្នំពេញ ។
លោក Robert Beugre MAMBE អគ្គលេខាធិការ AIMF បានលើកឡើងថា អង្គប្រជុំបានឯកភាពជួយគាំទ្រទាំងថវិកា និងបច្ចេកទេសដល់បណ្តាទីក្រុងជាសមាជិកដែលមានគម្រោងការពារបរិស្ថាន ការជួយជនភៀសខ្លួន បច្ចេកវិទ្យាព័ត៌មានវិទ្យាជាដើម ។ អង្គប្រជុំបានយកចិត្តទុកដាក់ចំពោះភាពធនរបស់រាជធានី ឬក្រុងណាមួយដែលក្រោយពីរងការខូចខាត គ្រោះថ្នាក់ដោយសង្គ្រាម ឬធម្មជាតិ ហើយធ្វើឱ្យមានការអភិវឌ្ឍឡើងវិញបាន ។
លោក អគ្គលេខាធិការ AIMF ក៏បានវាយតម្លៃខ្ពស់ចំពោះរាជរដ្ឋាភិបាលកម្ពុជាទទួលធ្វើជាម្ចាស់ផ្ទះកិច្ចប្រជុំមហាសន្និបាតនេះផងដែរ ដោយរក្សាបានសន្តិសុខសណ្តាប់ធ្នាប់ បច្ចេកទេស និងការទទួលបដិសណ្ឋារកិច្ចភ្ញៀវជាដើម ។
លោក ឃួង ស្រេង អភិបាលរាជធានីភ្នំពេញបានមានប្រសាសន៍ថា ក្នុងការរៀបចំធ្វើជាម្ចាស់ផ្ទះកិច្ចប្រជុំ AIMFលើកទី៣៩ ជាមោទនភាពខ្ពស់សម្រាប់ប្រទេសកម្ពុជាឱ្យប្រាប់ពិភពលោថា រាជធានីភ្នំពេញមានការអភិវឌ្ឍខ្ពស់បន្ទាប់ពីរងគ្រោះដោយសារសង្គ្រាម ។ ប្រទេសកម្ពុជា បានទទួលធ្វើជាម្ចាស់ផ្ទះរៀបចំកិច្ចប្រជុំនៃសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF)លើកទី៣៩ និងដើម្បីអបអរសាទរខួបលើកទី៤០នៃសមាគមនេះ នៅរាជធានីភ្នំពេញ ពីថ្ងៃទី៣-៤ ខែធ្នូ ឆ្នាំ២០១៩នេះ មានគណៈប្រតិភូនៃទីក្រុង និងសមាគមរដ្ឋបាលថ្នាក់ក្រោមជាតិចូលរួមចំនួន៤០២នាក់ មកពី៤១ប្រទេស ដូចជា៖ ប្រទេសបារាំង ប្រទេសហៃទី ប្រទេសកុងហ្គោ ប្រទេសរ៉ូវ៉ាន់ដា និងប្រទេសកាំម៉ារ៉ូន ជាដើម ។
សូមបញ្ជាក់ថា បន្ទាប់ពីបានចូលរួមប្រជុំនៅរាជធានីភ្នំពេញហើយ គណៈប្រតិភូនៃ សមាគមអន្តរជាតិអភិបាលក្រុងប្រើប្រាស់ភាសាបារាំងបានអញ្ជើញទៅទស្សនកិច្ចប្រាសាទតាព្រហ្ម ប្រាសាទបាយ័ន ប្រសាទអង្គរវត្ត ដើម្បីបានឃើញពីសម្បត្តិវប្បធម៌ និងអរិយធម៌របស់ខ្មែរ មុនពេលត្រឡប់ទៅប្រទេសរបស់ពួកគេវិញ ហើយនឹងជួយផ្សព្វផ្សាយតំបន់ទេសចរណ៍កម្ពុជាទៅកាន់ពិភពលោកឱ្យកាន់តែទូលំទូលាយផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ