ខេត្តកំពង់ចាម ៖នៅក្នុងរយៈពេលប៉ុន្មានថ្ងៃនេះ អាកាសធាតុបានចុះត្រជាក់រហូតដល់អ្នកខ្លះត្រូវក្រោកពីងងឹត ដើម្បីអាំងភ្នក់ភ្លើងឱ្យមានភាពកក់ក្តៅ ។ ជាមួយគ្នានោះដែរអាវរងាជជុះលក់ដូរនៅផ្សារបឹងកុក ក្រុងកំពង់ចាម កំពុងត្រូវប៉ាន់ដោយលក់ដាច់ទៀតផង មិនថាក្មេង ឬចាស់នាំគ្នាមកទិញព្រោះមានតម្លៃថោក ។
អាជីវករម្នាក់ឈ្មោះ ស៊ា សៀងលី ភេទស្រី អាយុ៣៤ឆ្នាំ បានប្រាប់ឲ្យដឹងនៅព្រឹកថ្ងៃទី០៥ ធ្នូនេះថា គាត់បានចាប់យកអាជីពប្រកបរបរលក់ខោអាវជជុះនៅផ្សារបឹងកុករហូតមកដល់ពេលនេះមានរយៈពេល១៥ឆ្នាំហើយ ។ ចំពោះកម្រៃដែលទទួលបានត្រូវយកផ្គត់ផ្គង់ជីវភាពគ្រួសារ និងឲ្យកូនចំនួន២នាក់បានរៀនសូត្រនៅសាលាផងដែរ ។
អាជីវករឈ្មោះ សៀង លី បានប្រាប់បន្តថា នៅដើមខែធ្នូ ឆ្នាំ២០១៩ ស្របពេលដែលអាកាសធាតុនៅក្នុងប្រទេសកម្ពុជាបានចុះត្រជាក់ក៏បានទិញអាវរងាសម្រាប់ក្មេងពាក់លក់មួយតម្លៃ៤.០០០រៀល ហើយនៅព្រឹកថ្ងៃទី៥ ខែធ្នូ មានប្រជាពលរដ្ឋបាននាំគ្នាមកទិញសម្រាប់ឱ្យកូនៗរបស់ពួកគាត់ពាក់ដើម្បីឱ្យមានភាពកក់ក្តៅ ។
ក្រៅពីអាវរងាក៏គេឆ្លៀតទិញខោអាវជជុះធម្មតាយកទៅស្លៀកពាក់ ព្រោះតែលក់ក្នុងតម្លៃថោកហើយតាមការកត់សម្គាល់នៅក្នុងឆ្នាំ២០១៩នេះ អាកាសធាតុត្រជាក់រាងយូរធ្វើឱ្យការលក់អាវរងារបស់គាត់លក់ដាច់គ្រាន់បើ ។ មុខរបរនេះរៀងហត់បន្តិចក៏ពិតមែន ក៏ប៉ុន្តែទទួលបានប្រាក់ចំណេញសម្រាប់ផ្គត់ផ្គង់ជីវភាពគ្រួសារដោយឲ្យកូនៗរបស់គាត់ចំនួន២នាក់បានរៀនសូត្រនៅសាលាក្នុងក្រុងកំពង់ចាម ដោយកូនបងគេរៀនបានថ្នាក់ទី៧ ហើយ ។ ទោះជាបែបណាក៏ដោយគាត់នឹងប្ដីនៅតែបន្តការលក់ខោអាវជជុះនេះបន្តទៀត ។
ចាប់តាំងពីលក់នៅផ្សារបឹងកុកនេះ រហូតដល់បច្ចុប្បន្នមានរយៈពេល១៥ឆ្នាំ ហើយថែមទាំងមានម៉ូយច្រើនតែងតែនាំគ្នាជួយគាំទ្រមកទិញសំលៀបំពាក់របស់គាត់ជាមួយនោះអ្នកដែលមកទិញគេតែងតែសរសើរខោអាវជជុះលក់តម្លៃថោកក៏ពិតមែន ប៉ុន្តែមានគុណភាពល្អប្រើបានយូរ ។
អ្នកស្រីគឹម អេង បន្តថា គាត់បានលក់ខោអាវជជុះដែលទិញមកពីរាជធានីភ្នំពេញ និងបានដាក់ម៉ាស៊ីនដេរមួយគ្រឿងសម្រាប់កាត់ជើងខោដែលម៉ូយមកទិញវែងត្រូវកាត់ចេញ ដើម្បីឱ្យសមល្មម ។ គាត់មិនបានចុះចាញ់ និងព្រហ្មលិខិតនោះទេ គឺបានប្រឹងប្រែងតស៊ូពុះពាររាល់ការលំបាកចិញ្ចឹមកូនរហូតដល់រៀនចាប់ថ្នាក់សាកលវិទ្យាល័យ ។ ហើយពេលទំនេរកូនស្រីក៏បានឆ្លៀតមកជួយលក់ដូរគាត់ថែមទៀត សម្រាប់អាវរងាជជុះលក់បានមួយតម្លៃពី ១ម៉ឺនទៅ១៥.០០០រៀល នេះជាអាវធុនកណ្ដាលងាយស្រួលលក់ ប្រសិនបើយកតម្លៃលើសនេះនោះនឹងពិបាកលក់ពេលដែលអាកាសធាតុបានចុះត្រជាក់អាវរងារបស់គាត់បានលក់ដាច់គ្រាន់បើ ។
ដោយឡែកលោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្តមានប្រសាសន៍ឲ្យដឹងដែរថា ក្នុងពេលដែលកម្ពុជាយើងអាកាសធាតុបានចុះត្រជាក់រូបលោកសូមក្រើនរំលឹកដល់ពូមីងលោកតា លោកយាយ ធ្វើយ៉ាងណាស្លៀកពាក់ខោអាវឲ្យបានក្រាស់បង្កើតភាពកក់ក្តៅនៅក្នុងខ្លួន ។ ហើយរាល់ការទទួលទានអាហារមិនឲ្យមានជាតិខ្លាញ់ច្រើនផ្អែមពេក ឬប្រៃពេកដែលងាយបង្កជំងឺផ្សេងៗធ្វើយ៉ាងណា សូមថែទាំសុខភាពឲ្យបានល្អប្រសើរពោល គឺស្លៀកពាក់ឲ្យបានជិត ដើម្បីបង្កើតភាពកក់ក្តៅប្រឆាំងនឹងភាពត្រជាក់ពេលត្រូវធ្វើដំណើរទៅណាមកណា ៕ កែសម្រួលដោយ ៖ សុឃាក់
ចែករំលែកព័តមាននេះ