រាជធានីភ្នំពេញ ៖ រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រ វិស័យអប់រំ ២០១៩-២០២៣ ដែលឯកសារទាំងពីរនេះបានជំរុញឱ្យមានការកសាងសមត្ថភាព និងការអភិវឌ្ឍធនធានមនុស្ស ជាពិសេសការបណ្តុះបណ្តាលយុវជនឱ្យមានគុណភាព សមត្ថភាព…
រាជធានីភ្នំពេញ ៖ រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រ វិស័យអប់រំ ២០១៩-២០២៣ ដែលឯកសារទាំងពីរនេះបានជំរុញឱ្យមានការកសាងសមត្ថភាព និងការអភិវឌ្ឍធនធានមនុស្ស ជាពិសេសការបណ្តុះបណ្តាលយុវជនឱ្យមានគុណភាព សមត្ថភាព ចំណេះដឹងចំណេះធ្វើ ។
លោកជំទាវ ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច តំណាង សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងក្នុងពិធីប្រគេនប្រគល់សញ្ញាបត្រថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់គរុកោសល្យដល់សមណនិស្សិត និស្សិតគរុសមណនិស្សិត គរុនិស្សិត គរុសមណសិស្ស និងគរុសិស្ស នៃពុទ្ធិកសាកលវិទ្យាល័យព្រះសីហនុរាជ នាព្រឹកថ្ងៃទី០៥ ខែធ្នូនេះ នៅវិទ្យាស្ថានជាតិអប់រំរាជធានីភ្នំពេញ ។
លោកជំទាវកម៉ែន សំអន បានបន្តថា ការបណ្តុះបណ្តាលយុវជនឱ្យមានគុណភាព សមត្ថភាព ចំណេះដឹង ចំណេះធ្វើ សហគ្រិនភាព ការច្នៃប្រឌិត និងនវានុវត្តន៍ មានគុណធម៌ សីលធម៌ ស្មារតីទទួលខុសត្រូវ និងមានមនសិការស្នេហាជាតិ ដែលជាកត្តាគន្លឹះសម្រាប់ទ្រទ្រង់ និងជំរុញកំណើនសេដ្ឋកិច្ចជាតិ និងជាសក្តានុពលក្នុងការប្រកួតប្រជែងជាអន្តរជាតិ ទាំងពេលបច្ចុប្បន្ន និងអនាគត ។
លោកជំទាវបានបន្តថា រាជរដ្ឋាភិបាលកម្ពុជាបានកំណត់យ៉ាងច្បាស់ថា វិស័យអប់រំមានតួនាទីយ៉ាងសំខាន់ក្នុងការអភិវឌ្ឍជាតិលើគ្រប់វិស័យ និងធានានូវនិរន្តរភាពជាតិ ទាំងសេដ្ឋកិច្ច សង្គម និងវប្បធម៌ ។ ការទទួលបានអប់រំ គឺជាការដុះខាត់ផ្នែកបញ្ញាញ្ញាណបានបង្កើតឲ្យមានសមត្ថភាពវិជ្ជាជីវៈ មានសមត្ថភាពស្រាវជ្រាវ ក្នុងការបង្កើតនូវគោលការណ៍ទ្រឹស្ដី គំនិត និងមូលដ្ឋានសម្ភារៈថ្មីៗ ដើម្បីបម្រើសេចក្ដីត្រូវការរបស់សង្គមមនុស្ស ក្នុងបរិបទនៃអច្ឆរិយៈបច្ចេកវិទ្យា និងវិទ្យាសាស្ត្រទំនើប ។
លោកជំទាវកិត្តិសង្គហបណ្ឌិត ម៉ែន សំអន បានថ្លែងបន្តថា ផលិតផល និងសម្ភារៈគ្រប់ប្រភេទ សុទ្ធតែត្រូវបានបង្កើតឡើងដោយខួរក្បាលរបស់មនុស្ស ដែលមានការអប់រំបណ្តុះបណ្ដាលប្រកប ដោយគុណធម៌ គុណភាព និងមានការច្នៃប្រឌិតខ្ពស់ ។ ធនធានមនុស្សជាមូលដ្ឋានគ្រឹះមិនអាចខ្វះបានក្នុងការធ្វើឱ្យអរិយធម៌មនុស្សជាតិមានការអភិវឌ្ឍ និងផ្លាស់ប្តូរឥតឈប់ឈរ ហើយធនធានមនុស្សនេះ គឺបានមកពីការអប់រំបណ្ដុះបណ្ដាលនេះឯង ។
លោកជំទាវ ម៉ែន សំអន បានថ្លែងថា ការអប់រំបណ្ដុះបណ្ដាលដែលធ្វើឱ្យមនុស្សមានតម្លៃ និងមានសមត្ថភាពវិជ្ជាជីវៈពិតប្រាកដនោះ គឺការអប់រំប្រកបដោយគុណភាពពោល គឺ «ត្រូវរៀន ឲ្យចេះមិនមែនរៀនឱ្យចប់នោះទេ» ។ ក្នុងន័យនេះលោកជំទាវ ម៉ែន សំអន ចង់និយាយថា អ្នកដែលបញ្ចប់ការសិក្សាដោយទទួលបានសញ្ញាបត្រនោះត្រូវមានសមត្ថភាពអាចបំពេញការងារក្នុងជំនាញរបស់ខ្លួនបានល្អ និងមានការពេញចិត្តពីនិយោជកពីស្ថាប័នដែលជាកន្លែងយើងត្រូវបម្រើការងារ ៕
ចែករំលែកព័តមាននេះ