ខេត្តព្រៃវែង ៖ បច្ចុប្បន្ននេះ តម្លៃខ្សាច់ទន្លេ បានឡើងរហូតដល់៤ដុល្លារហើយ គឺស្មើនឹង១ម៉ឺន៦ពាន់រៀល ក្នុង១ម៉ែត្រគូប បើប្រៀបធៀបទៅនឹងឆ្នាំមុនៗ គឺខុសគ្នាគុណនឹង២ដង ចំណុចនេះបានធ្វើឱ្យប្រជាពលរដ្ឋមួយចំនួននៅខេត្តព្រៃវែង ដែលមានជីវភាពខ្សត់ខ្សោយមិនសូវធូរធាបានត្អូញត្អែថា វាថ្លៃខ្លាំង រហូតពួកគាត់គ្មានលទ្ធភាពធ្វើផ្ទះថ្មរស់នៅនឹងគេទេ។
ប្រជាពលរដ្ឋនៅស្រុកពាមរក៌ បាននិយាយថា បើទោះបីជាពួកគាត់រស់នៅជិតទន្លេ ដែលជាប្រភពខ្សាច់សំណង់ក៏ដោយ ប៉ុន្តែពួកគាត់មួយចំនួនមិនមានលទ្ធភាពធ្វើផ្ទះថ្មរស់នៅនឹងគេទេ ព្រោះដែកក៏ថ្លៃ ស៊ីម៉ង់តិ៍ក៏ថ្លៃ ហើយខ្សាច់ក៏ថ្លៃ ឯជីវភាពពួកគាត់មិនសូវធូរធា អ្នកខ្លះចង់បានផ្ទះថ្មនៅពេក ប្លង់ដី ប្លង់ផ្ទះផ្ញើធានាគារអស់ហើយ។
ពួកគាត់បានលើកឡើងថា រឿងដែក និងស៊ីម៉ង់តិ៍វាថ្លៃ គឺពួកគាត់មិនថាទេ ព្រោះត្រូវទិញពីក្រៅប្រទេសមក ថ្លៃផលិត ថ្លៃដឹកជញ្ជូនមកអស់ច្រើនណាស់ ប៉ុន្តែសំរាប់ខ្សាច់សំណង់វិញ គឺបូមយកពីទន្លេមេគង្គក្បែរផ្ទះរបស់ពួកគាត់សោះ បែរជាលក់ថ្លៃដូចមាស គឺក្នុង១ម៉ែត្រគូប៤ដុល្លារ ស្មើនឹង១ម៉ឺន៦ពាន់រៀល ទាំងដែលឆ្នាំមុនៗ១ម៉ែត្រគូបតែ៨ពាន់រៀលប៉ុណ្ណោះ។
ដោយឡែកក្រុមអាជីវករលក់ខ្សាច់វិញ បាននិយាយថា ពួកគាត់មិនចង់លក់ខ្សាច់ក្នុងតម្លៃថ្លៃបែបនេះទេ ប៉ុន្តែធ្វើម៉េច បើគាត់ទិញខ្សាច់ពីក្នុងទន្លេមកក្នុងតម្លៃថ្លៃដែរ គឺ២ដុល្លារ២កាក់៨សេន ក្នុង១ម៉ែត្រគូប ដែលស្មើនឹង៩១២០រៀល ហើយបូកថែមទាំងតម្លៃប្រេងសាំង គ្រឿងចក្រ និងកម្មករថែមទៀត គឺឡើងដល់ជាង១ម៉ឺនរៀលទៅហើយ ដូច្នេះពួកគាត់ត្រូវតែលក់ក្នុងតម្លៃ១ម៉ឺន៦ពាន់រៀលដូចរាល់ថ្ងៃនេះ ទើបអាចចំណេញ។
អាជីវករទាំងនោះបញ្ជាក់ថា បើចង់ឱ្យតម្លៃខ្សាច់ចុះថោកជាងនេះ គឺទាល់តែឱ្យក្រុមហ៊ុនឡូខ្សាច់ក្នុងទន្លេ លក់ខ្សាច់ក្នុងតម្លៃថោកដែរ បើគាត់ទិញមកថោក លក់ចេញក៏ថោកដែរ។
ចំណែកខាងមន្ត្រីជំនាញរ៉ែ បានឱ្យដឹងដែរថា ខ្សាច់ទន្លេនេះ ក្រុមដែលមានអាជ្ញាប័ណ្ណពីក្រសួង បង់សួយសារអាករ ចូលរដ្ឋក្នុង១ម៉ែត្រគូបតម្លៃតែ៦កាក់៨សេនប៉ុណ្ណោះ ដែលស្មើនិង២៧២០រៀល ប៉ុន្តែគេលក់ទៅឱ្យខាងអាជីវកររហូតដល់១ម៉ែត្រគូប តម្លៃ៩១២០រៀលនោះ គឺជាសិទ្ធិរបស់គេ ព្រោះគ្មានច្បាប់ណាហាមឃាត់ ឬកំណត់ឱ្យគេលក់ក្នុងតម្លៃណាមួយនោះទេ វាជារឿងទីផ្សារសេរី៕ (កែសម្រួលដោយ ៖ បុប្ផា)
ចែករំលែកព័តមាននេះ