រាជធានីភ្នំពេញ ៖ លោក កែប ជុតិមា តំណាងរាស្ត្រ និងជាអតីអភិបាលរាជធានីភ្នំពេញ បានបង្ហាញពីការដោះស្រាយបញ្ហាប្រឈមនានាក្នុងការអភិវឌ្ឍទីក្រុង ដើម្បីបង្កលក្ខណៈងាយស្រួលដល់ប្រជាពលរដ្ឋ និងលើកកម្ពស់សោភ័ណ្ឌភាពទីក្រុងឱ្យកាន់តែល្អប្រសើរ។
ថ្លែងក្នុងសន្និសីទពេញអង្គស្តីពី«សកម្មភាពក្នុងការស្ថាបនាឡើងវិញ និងការអភិវឌ្ឍទីក្រុង»នាឱកាសកម្ពុជាធ្វើជាម្ចាស់ផ្ទះរៀបចំកិច្ចប្រជុំនៃសមាគមអន្តរជាតិអភិបាលក្រុងប្រើប្រាស់ភាសាបារាំង(AIMF) នៅសណ្ឋាគាសុខាភ្នំពេញ កាលពីថ្ងៃទី៣-៤ ខែធ្នូ ឆ្នាំ២០១៩នេះ លោក កែប ជុតិមា តំណាងរាស្ត្រ និងជាអតីអភិបាលរាជធានីភ្នំពេញបានលើកឡើងថា បញ្ហាប្រឈមនៅក្នុងរាជធានីភ្នំពេញ មានដូចជា ការកកស្ទះចរាចរណ៍, ជំនន់ទឹកភ្លៀងធ្វើឱ្យស្ទះលូ និងកង្វក់បរិស្ថាន ។
លោកបញ្ជាក់ថា ដើម្បីដោះស្រាយបញ្ហានេះ សាលារាជធានីភ្នំពេញបានខិតខំប្រឹងប្រែងក្នុងការពង្រីកផ្លូវថ្នល់ ផ្លូវថ្មើជើង កសាងស្ពានអាកាស ផ្លូវក្រោមដីជាបន្តបន្ទាប់ដោយប្រើប្រាស់ថវិការាជរដ្ឋាភិបាល និងកម្ចីពីដៃគូអភិវឌ្ឍនានា។ ជាមួយគ្នានោះក៏មានការស្តារ និងពង្រីកប្រព័ន្ធលូដើម្បីកាត់បន្ថយការជន់លិចទីក្រុងពី២៤ម៉ោងមកត្រឹមតែ៦ម៉ោងវិញ។
សូមបញ្ជាក់ថា ការចែករំលែកបទពិសោធន៍ និងដោះស្រាយបញ្ហាប្រឈមនានានៅក្នុងទីក្រុងនាពេលនេះ ក្នុងគោលបំណងឱ្យគណៈប្រតិភូ នៃសមាគមទីក្រុងប្រើប្រាស់ភាសារបារាំងបានយល់ដឹង និងយកទៅអនុវត្តនៅតាមបណ្តាប្រទេសរបស់ពួកគេរៀងៗខ្លួនតាមស្ថានភាពជាក់ស្តែង៕ (កែសម្រួលដោយ ៖ ធីតា)
ចែករំលែកព័តមាននេះ