រាជធានីភ្នំពេញ ៖ ចាប់ពីឆ្នាំ១៩៩៤ មកប្រទេសអូស្ត្រាលីបានផ្តល់អាហារូបករណ៍ដល់និស្សិតកម្ពុជាជិត៣ពាន់កន្លែង ហើយទំហំពាណិជ្ជកម្មទ្វេភាគីវិញបានកើនដល់ជិត៩០០ពាន់ដុល្លារ ។ នេះបើតាមឯកអគ្គរដ្ឋទូតប្រទេសនេះប្រចាំនៅកម្ពុជា ។ ក្នុងឱកាសចូលជួបសម្តែងការគួរសម និងជម្រាបលាសម្តេច…
រាជធានីភ្នំពេញ ៖ ចាប់ពីឆ្នាំ១៩៩៤ មកប្រទេសអូស្ត្រាលីបានផ្តល់អាហារូបករណ៍ដល់និស្សិតកម្ពុជាជិត៣ពាន់កន្លែង ហើយទំហំពាណិជ្ជកម្មទ្វេភាគីវិញបានកើនដល់ជិត៩០០ពាន់ដុល្លារ ។ នេះបើតាមឯកអគ្គរដ្ឋទូតប្រទេសនេះប្រចាំនៅកម្ពុជា ។ ក្នុងឱកាសចូលជួបសម្តែងការគួរសម និងជម្រាបលាសម្តេច ហេង សំរិន ប្រធានរដ្ឋសភានាព្រឹកថ្ងៃទី០៥ ខែធ្នូ នៅវិមានរដ្ឋសភា។
លោកជំទាវ អានជីឡា ខូកូរ៉ាន់ (H.E.Mrs. Angela Corcoran) ឯកអគ្គរដ្ឋទូតនៃប្រទេសអូស្ត្រាលីប្រចាំនៅកម្ពុជាដែលត្រូវចប់អាណត្តិបានសម្តែងក្តីរីករាយចំពោះកិច្ចសហប្រតិបត្តិការដ៏ល្អរវាងប្រទេសកម្ពុជា និងអូស្រា្តលី ទាំងខាងស្ថាប័ននីតិប្បញ្ញត្តិ និងនីតិប្រតិបត្តិ ។ ហើយប្រទេសអូស្ត្រាលីនៅតែបន្តគាំទ្រដល់ការអភិវឌ្ឍរបស់កម្ពុជាទៅមុខទៀត ។
លោកស្រីទូតបានលើកឡើងឲ្យដឹងថា ចាប់តាំងពីឆ្នាំ១៩៩៣មកអូស្ត្រាលីបានចូលរួមចំណែកអភិវឌ្ឍន៍នៅកម្ពុជាជាច្រើនវិស័យដូចជា វិស័យអប់រំ កសិកម្ម ការបោសសំអាតមីនជាដើម ។ កម្ពុជា និងអូស្ត្រាលីមានកិច្ចសហប្រតិបត្តិការល្អក្នុងការប្រយុទ្ធប្រឆាំងអំពើភេវរកម្មនានាដូចការជូញដូរមនុស្ស និងគ្រឿងញៀនជាដើម ។
លោកស្រីឯកអគ្គរដ្ឋទូតបានគូសបញ្ជាក់ថា ៖« ចាប់ពីឆ្នាំ១៩៩៤មកមាននិស្សិតកម្ពុជាបានទៅសិក្សានៅប្រទេសអូស្ត្រាលីចំនួន២៩០០កន្លែង ។ ក្នុងនោះនិស្សិតកម្ពុជាចំនួន៨៥០នាក់ ទទួលបានអាហារូបករណ៍ពីរដ្ឋាភិបាលអូស្ត្រាលី ។ ចំណែកទំហំពាណិជ្ជកម្មប្រទេសពីរវិញបានកើនដល់៨៥០ពាន់លានដុល្លារ» ។
លោកឯកអគ្គរដ្ឋទូតបានលើកឡើងទៀតថា ប្រទេសអូស្ត្រាលីបន្តគាំទ្រ និងបង្កើនកិច្ចសហប្រតិបត្តិការជាមួយកម្ពុជានៅលើគ្រប់វិស័យ ។ ដោយឡែកនៅក្នុងឆ្នាំ២០២០នេះអូស្ត្រាលីនឹងខិតខំជំរុញឲ្យមានដំណើរទស្សនកិច្ចផ្លាស់ប្តូរបទពិសោធន៍របស់តំណាងរាស្ត្រវ័យក្មេងកម្ពុជា ទៅកាន់ប្រទេសអូស្ត្រាលី ។
ប្រទេសអូស្រា្តលីក៏បានត្រៀមស្វាគមន៍យ៉ាងកក់ក្តៅចំពោះវត្តមាននៃការអញ្ជើញចូលរួមកិច្ចប្រជុំប្រចាំឆ្នាំលើកទី២៨ នៃវេទិកាសភាអាស៊ី-ប៉ាស៊ីហ្វិក (APPF) ដែលសម្តេចប្រធានរដ្ឋសភា និងគណៈប្រតិភូសភាកម្ពុជានឹងចូលរួមនៅប្រទេសអូស្ត្រាលី នាដើមខែមករា ឆ្នាំ២០២០ខាងមុខនេះផងដែរ ។
ក្នុងជំនួបនោះដែរ សម្តេចហេង សំរិន បានវាយតម្លៃខ្ពស់ចំពោះកិច្ចខិតខំប្រឹងប្រែងក្នុងអាណត្តិ ការទូតរបស់លោកស្រី អានជីឡា ខូកូរ៉ាន់ ដែលបានរួមចំណែកដល់ការបន្តថែរក្សាទំនាក់ទំនង មិត្តភាពជាប្រពៃណី និងកិច្ចសហប្រតិបត្តិការរវាងកម្ពុជា-អូស្ត្រាលី ឲ្យមានការរីកចម្រើនថែមមួយកម្រិតទៀត ។
សម្តេចជឿជាក់ថា ក្នុងរយៈពេល៣ឆ្នាំ ដែលលោកស្រីស្នាក់នៅកម្ពុជាលោកជំទាវពិតជាបានឃើញជាក់ស្តែងនូវការអភិវឌ្ឍន៍រីកចម្រើនជាបន្តបន្ទាប់របស់កម្ពុជា រួមទាំងសភាពការណ៍ពិតនៅកម្ពុជាដែលផ្ទុយពីការបំពងសំឡេងពីខាងក្រៅ ដើម្បីកេងចំណេញប្រយោជន៍នយោបាយបុគ្គលមួយចំនួនតូច ។
សម្តេចប្រធានរដ្ឋសភាមានក្តីសង្ឃឹមថា ទោះបីលោកស្រី អានជីឡា ខូកូរ៉ាន់ បានចប់បេសកកម្មនៅកម្ពុជា តែលោកស្រី នៅតែមនោសញ្ចេតនា និងទំនាក់ទំនងល្អជាមួយប្រជាជាតិកម្ពុជាជានិច្ច ៕ កែសម្រួលដោយ ៖សុឃាក់
ចែករំលែកព័តមាននេះ