ខេត្តបាត់ដំបង ៖ យ៉ាងហោចណាស់មនុស្ស៣០នាក់បានរងរបួសធ្ងន់ និងស្រាល នៅក្នុងឧប្បតិ្តហេតុក្រឡាប់រថយន្តច្នៃពេលកំពុងធ្វើដំណើរនៅវេលាម៉ោង៦និង៣០នាទីព្រឹក ថ្ងៃទី០៥ ធ្នូ ឆ្នាំ២០១៩ នេះនៅចំណុចផ្លូវយុទ្ធសាស្ត្រមួយកន្លែង ស្ថិតក្នុងភូមិទួលខ្វាវ ឃុំបារាំងធ្លាក់ ស្រុកភ្នំព្រឹក ។
យោងតាមព័ត៌មានបឋមរបស់មន្ត្រីកងរាជអាវុធហត្ថបានឲ្យដឹងថា ឧប្បតិ្តហេតុគ្រោះថ្នាក់ចរាចរណ៍នោះ បង្កទ្បើងដោយរថយន្តច្នៃគ្មានផ្លាកលេខដែលបើកបរដោយឈ្មោះ សឹង្ហ រ័ត្នអាយុ៣១ឆ្នាំ រស់នៅភូមិទ្បុងផាត់ ឃុំអូរដា ស្រុកកំរៀង ។ រថយន្តច្នៃនោះបានដឹកកម្មករចំនួន៣០នាក់ហើយបានជួបគ្រោះថ្នាក់ពេលកំពុងធ្វើដំណើរតាមផ្លូវបណ្ដាលឱ្យកម្មករទាំងអស់រងរបួស ។
បើតាមរបាយការណ៏បានបញ្ជាក់ថា ក្រុមកម្មករទាំង៣០នាក់ដែលរងរបួស មានស្ត្រី២០នាក់ ហើយក្នុងនោះមានកម្មករចំនួន៦នាក់ ដែលភាគច្រើនជាស្ត្រីបានរងរបួសធ្ងន់ ។ បើតាមការសាកសួរអ្នកបើកបររថយន្តច្នែនេះឈ្មោះ សឹង្ហ រ័ត្ន បាននិយាយប្រាប់សមត្ថកិច្ចថា មូលហេតុដែលនាំឱ្យមានគ្រោះថ្នាក់នេះដោយសាររថយន្តដាច់កាទ្បេ ។
អ្នកបើកបររូបនេះបានប្រាប់ថា ពេលកំពុងធ្វើដំណើរស្រាប់តែដាច់កាឡេកង់មុខហើយជ្រុលទៅបុកក្បាលស្ពានពេញទំហឹងបណ្ដាលឱ្យក្រឡាប់ធ្លាក់មនុស្សពេញផ្លូវតែម្ដង ។ មន្ត្រីចរាចរណ៏បានចុះទៅកាន់កន្លែងកើតហេតុ ជាមួយនឹងរថយន្តសង្គ្រោះរបស់មណ្ឌលសុខភាព ដើម្បីជួយដឹកជញ្ជូនជនរងគ្រោះទៅកាន់មន្ទីរពេទ្យ ។
សមត្ថកិច្ចបានបញ្ជាក់ថា ជនរងគ្រោះទាំងនោះត្រូវបានបញ្ជូនភ្លាមៗទៅពេទ្យពេទ្យបង្អែក ស្រុកសំពៅលូន ដោយឡែករថយន្តត្រូវបាននាំយកទៅរក្សាទុកនៅអធិការនគរបាលស្រុកភ្នំព្រឹកដើម្បីដោះស្រាយតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ