សូម្បីតែតួអង្គព្រះសម្មាសម្ពុទ្ធក៏ធ្លាប់មានកំហុស ចុះទម្រាំសាមញ្ញជនលែងអីនឹងមានចំណុចខ្វះខាត ហេតុនេះហើយបានជាលោកពោលថា នៅក្នុងចក្កវាឡទ្វីបលោកនេះរកមនុស្សល្អបរិសុទ្ធទាំងស្រុងថាមិនឲ្យមានចំណុចខ្វះខាតសោះតែម្តងនោះមិនបានទេ មនុស្សយើងម្នាក់ៗចៀសមិនផុតពីមានចំណុចល្អខ្លះ និងចំណុចអាក្រក់ខ្លះមិនខាន ។បុគ្គលដែលយល់ពីលក្ខណៈពិតបែបនេះរមែងមិនមើលទោសអ្នកដទៃឡើយ ។
មែនហើយបើយើងសង្កេតមើលចិត្តរបស់មនុស្សយើងពិតជាមានចរន្តមិនដូចគ្នាទេ ព្រោះថា ចំណុចខ្លះយើងថាល្អ តែអ្នកដទៃគេថាមិនល្អ ចំណុចខ្លះទៀត យើងថាមិនល្អ តែអ្នកផ្សេងគេថាល្អ នេះក៏ព្រោះតែគំនិតផ្ទុយគ្នាទើបចេះតែមានចិត្តថ្នាំងថ្នាក់នឹងគ្នារហូតពេលខ្លះធ្វើឲ្យយើងខឹងក្រោធព្រោះតែទស្សនៈមិនត្រូវនឹងចិត្តយើងក៏មាន ។
ហេតុនេះដើម្បីរំសាយចិត្តខឹងគឺយើងមិនគួរនឹកនាដល់មតិផ្ទុយទាំងនោះទេ គប្បីបែរទៅមើលឬរលឹកដល់សេចក្ដីល្អរបស់គេវិញ ព្រោះមនុស្សយើងមិនមែនប្រព្រឹត្តតែអំពើអាក្រក់ទាំងអស់ទេ អំពើសុចរិតក៏គេធ្វើខ្លះដែរ បុថុជ្ជនគឺវាតែយ៉ាងហ្នឹងឯង គ្មានអ្នកណាល្អគ្រប់ដប់ឡើយ ។ ដោយសាន សារិន
ចែករំលែកព័តមាននេះ