ប្រព័ន្ធសង្គមបានអនុញ្ញាតឲ្យមនុស្សចែករំលែកពីខ្លួនឯង និងអនុញ្ញាតឲ្យអ្នកដទៃស្គាល់គ្នាទៅវិញទៅមកកាន់តែងាយ និងលឿនជាងមុន ។ ជាក់ស្តែងអាជីវករមួយចំនួនបានយកភាពល្បីល្បាញរបស់ខ្លួន ដើម្បីរកលុយបន្ថែមដូចជា ចាប់ផ្តើមអាជីវកម្មថ្មី ឬចាប់ផ្តើមលក់ផលិតផលផ្សេងៗលើប្រព័ន្ធសង្គមជាដើម ។
ប៉ុន្តែតើអ្នកត្រូវការភាពល្បីល្បាញដាច់ខាតទេ ប្រសិនបើអ្នកចង់រកលុយ ? សម្រាប់អ្នកដែលមិនសូវមានវត្តមានលើប្រព័ន្ធសង្គម អ្នកក៏នៅតែអាចរកលុយបានមានស្តុកស្តម្ភដែរ ព្រោះមានពេលខ្លះការដែលមិនមែនជាអ្នកល្បីល្បាញមានអ្នកស្គាល់ច្រើនអាចជួយឲ្យអ្នកក្លាយជាអ្នកមានបាន ។
១. អ្នកអាចផ្តោតស្មារតីលើអ្វីដែលសំខាន់សម្រាប់អ្នក ៖
ពេលដែលអ្នកញៀននឹងការទទួលបានចំណាប់អារម្មណ៍ពីអ្នកដទៃ ឬពីភាពល្បីល្បាញ អ្នកមិនអាចផ្តោតស្មារតីលើការងារ ឬកិច្ចការដែលសំខាន់សម្រាប់ជីវិតរបស់អ្នកទេ ។ បើអ្នករស់នៅពីមួយថ្ងៃទៅមួយថ្ងៃដើម្បីបារម្ភពីអ្វីដែលអ្នកត្រូវចែករំលែកដើម្បីទទួលបានការ Like និង Comment ពីអ្នកដទៃនោះអ្នកមានតែខ្ជះខ្ជាយលុយដើម្បីបង្ហាញពីជីវិតស៊ីវីល័យខ្លួនប៉ុណ្ណោះ ។ ផ្ទុយមកវិញ សួរខ្លួនឯងសាជាថ្មីថាអ្នកត្រូវធ្វើអ្វីដើម្បីឲ្យខ្លួនជោគជ័យពិតប្រាកដ និងក្លាយជាអ្នកមានបាន?
២. អ្នកអាចរស់នៅដោយសុខសន្តិភាព ៖
ពេលដែលអ្នកក្លាយជាអ្នកល្បីឈ្មោះ មនុស្សជាច្រើនអាចនឹងមករកអ្នកព្រោះគេចង់បានអ្វីមួយពីអ្នក មិនថាពេលវេលា ឬលុយអ្នកឡើយ ។ ពេលខ្លះពេលវេលាមានតម្លៃជាងលុយទៅទៀត ហើយពេលដែលអ្នកល្បី អ្នកនឹងត្រូវខ្ជះខ្ជាយពេលវេលាជាច្រើនដូចជាចូលរួមពិធីដែលអ្នកមិនចាប់អារម្មណ៍ជាដើម ។
៣. អ្នកដទៃមិនរំពឹងអ្វីពីអ្នកទេ៖
ពេលដែលអ្នកជាមនុស្សសាមញ្ញទូទៅ មិនមាននរណាដែលចាំរំពឹងអ្វីពីអ្នកឡើយ ។ អ្នកមិនចាំបាច់បង្ខំខ្លួនឲ្យទិញរថយន្តដើម្បីបង្ហាញពីភាពស្តុកស្តម្ភរបស់ខ្លួន ឬរស់នៅផ្ទះវីឡា ឬរក្សាសម្រស់ឲ្យស្អាតបាតគ្រប់ពេលឡើយ ។ ហើយចំណុចនេះអាចជួយឲ្យអ្នកសន្សំថវិកាជាច្រើនដែលមនុស្សភាគច្រើនខ្ជះខ្ជាយដើម្បីអ្នកដទៃដែលមិនសំខាន់ ។
៤. កូនអ្នកអាចធំដឹងក្តីបានល្អ៖
កូនៗរបស់តារាៗភាគច្រើនមិនមានជីវិតឯកជនទេ ហើយពេលខ្លះពួកគេជួបនឹងសម្ពាធក្នុងការព្យាយាមឲ្យជោគជ័យដូចឪពុកម្តាយជាដើម ។ កូនៗរបស់អ្នកនឹងអាចធំធាត់លូតលាស់ដោយល្អនិងជ្រើសរើសផ្លូវដើរក្នុងជីវិតដោយខ្លួនឯង ៕ កែសម្រួលដោយ ៖ សុឃាក់
ចែករំលែកព័តមាននេះ