ខេត្តព្រៃវែង ៖ «អភិបាលស្រុកត្រូវចេះគ្រប់គ្រង និងបែងចែកតួនាទីភារកិច្ចមន្ត្រីក្រោមឱវាទអោយបានច្បាស់លាស់ ហើយមិនត្រូវលូកលាន់លើតួនាទីភារកិច្ចគ្នានោះទេ ជាពិសេសដាច់ខាតកុំអោយមានការបែងចែកបក្ខពួកឱ្យសោះ ព្រោះវាជាមូលហេតុ ធ្វើអោយការងារទាំងអស់បរាជ័យ»។ នេះគឺជាប្រសាសន៍របស់លោក ជា សុមេធី អភិបាលខេត្តព្រៃវែង ដែលបានលើកឡើងនៅក្នុងពិធីប្រកាសតែងតាំង និងផ្ទេរភារកិច្ចអភិបាលស្រុកពាមជរ កាលពីព្រឹកថ្ងៃទី៤ ធ្នូ នៅក្នុងសាលប្រជុំសាលាស្រុកពាមជរ ខេត្តព្រៃវែង។
លោក ជា សុមេធី បានបន្តទៀតថា អភិបាលស្រុកពាមជរដែលត្រូវបានតែងតាំងថ្មី ត្រូវខិតខំបំពេញភារកិច្ច និងមិនត្រូវសម្ងំនៅតែក្នុងបន្ទប់នោះទេ ត្រូវចុះពិនិត្យមើលនៅតាមមូលដ្ឋានអោយបានច្រើន ស្វែងយល់អោយបានច្បាស់ពីសុខទុក្ខ និងបញ្ហារបស់ប្រជាពលរដ្ឋ ដើម្បីងាយស្រួលក្នុងការដោះស្រាយ។
លោកអភិបាខេត្តបានបញ្ជាក់ផងដែរថា សំរាប់ស្រុកពាមជរ នៅខ្វះអភិបាលរងស្រុកម្នាក់ទៀត ហើយតាមដែលដឹងគឺមានអ្នកស្នើសុំតំណែងនេះច្រើននាក់ណាស់ ប៉ុន្តែលោកមិនអោយនោះទេ គឺទុកអាទិភាពនេះជូនមន្ត្រីរាជការនៅក្នុងស្រុកពាមជរនេះតែម្តង ហើយលោកប្រគល់សិទ្ធិជូនលោកអភិបាលស្រុកថ្មីធ្វើការពិនិត្យមើលមន្ត្រីនៅក្នុងសាលាស្រុក តើនរណាមានសមត្ថភាពអាចទទួលតំណែងនេះបាន ដើម្បីចាត់ចែងតែងតាំងនៅពេលក្រោយ។
គួរបញ្ជាក់ផងដែរថា លោក សេង សុធា អភិបាលរងស្រុកពាមជរ ត្រូវបានប្រកាសតែងតាំងជាអភិបាលស្រុកថ្មី ជំនួសអោយលោក សៅ ប្រសិដ្ឋ ដែលត្រូវបានផ្ទេរភារកិច្ចអោយទៅទទួលតួនាទីថ្មីនៅសាលាខេត្តព្រៃវែង៕ (កែសម្រួលដោយ ៖ ធីតា)
ចែករំលែកព័តមាននេះ