រាជធានីភ្នំពេញ ៖ មនុស្សប្រុស-ស្រី៤នាក់ត្រូវបានឃាត់ខ្លួន និងថ្នាំញៀនជិត១០០គីឡូក្រាម ត្រូវបានដកហូតក្នុងកិច្ចប្រតិបត្តិការបង្ក្រាបទីតាំងកែច្នៃផលិតនិងរក្សាទុកគ្រឿងញៀនខុសច្បាប់ ពីកម្លាំងសមត្ថកិច្ចនគរបាលមន្ទីរប្រឆាំងគ្រឿងញៀន សហការជាមួយនគរបាលមូលដ្ឋានខណ្ឌបឹងកេងកង និងខណ្ឌច្បារអំពៅ ក្រោមការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ កាលពីយប់ថ្ងៃទី៣…
រាជធានីភ្នំពេញ ៖ មនុស្សប្រុស-ស្រី៤នាក់ត្រូវបានឃាត់ខ្លួន និងថ្នាំញៀនជិត១០០គីឡូក្រាម ត្រូវបានដកហូតក្នុងកិច្ចប្រតិបត្តិការបង្ក្រាបទីតាំងកែច្នៃផលិតនិងរក្សាទុកគ្រឿងញៀនខុសច្បាប់ ពីកម្លាំងសមត្ថកិច្ចនគរបាលមន្ទីរប្រឆាំងគ្រឿងញៀន សហការជាមួយនគរបាលមូលដ្ឋានខណ្ឌបឹងកេងកង និងខណ្ឌច្បារអំពៅ ក្រោមការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ កាលពីយប់ថ្ងៃទី៣ រហូតដល់ថ្ងៃទី០៤ ធ្នូ នេះ ។
លោកឧត្តមសេនីយ៍ឯក ឡឹក វណ្ណៈ នាយកមន្ទីប្រឆាំងគ្រឿងញៀនបានថ្លែងឲ្យដឹងថា ដោយមានការចង្អុលបង្ហាញពីនាយឧត្តមសេនី ម៉ក់ ជីតូ អគ្គស្នងការរងនគរបាលជាតិទទួលបន្ទុកការងារប្រយុទ្ធប្រឆាំគ្រឿងញៀន កាលវេលាម៉ោង១១និង៥០នាទីយប់ថ្ងៃទីថ្ងៃទី៣ ធ្នូ កម្លាំងការិយាល័យជំនាញ(ក៣) នៃមន្ទីរប្រឆាំងគ្រឿងញៀន បានចុះទៅចំណុចផ្ទះជួលគ្មានលេខ ផ្លូវ១១៣ ក្រុម២៣ ភូមិ៣ បានធ្វើការឃាត់ខ្លួនមនុស្ស៤នាក់ ប្រុស២នាក់ និងស្រី២នាក់ជាជនជាតិវៀតណាម ។
ជនសង្ស័យទាំង៤នាក់ ១-ឈ្មោះ ទួន អាញ់ ភេទប្រុស អាយុ២៤ឆ្នាំ ២-ឈ្មោះហ័ង វៀត ភេទប្រុស អាយុ២២ឆ្នាំ ៣-ឈ្មោះ ធី ងុក ភេទស្រី អាយុ២១ឆ្នាំ និង៤-ឈ្មោះ ធី ងីន ភេទស្រី អាយុ ៣០ឆ្នាំ ពួកគេស្នាក់នៅផ្ទះជួលគ្មាន លេខផ្លូវ១១៣ ក្រុម២៣ ភូមិ៣ សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ ។
លោកន្តថា ក្រោយពីឃាត់ខ្លួនជនសង្ស័យទាំង៤ នាក់ ទើបពួកគេបានសារភាពបង្ហាញពីទីតាំងកែច្នៃផលិត នឹងរក្សាទុកគ្រឿងញៀនដោយខុសច្បាប់មួយកន្លែង ស្ថិតនៅផ្ទះលេខ១៦៨ ផ្លូវលេខ១១២ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។ ជាលទ្ធផល សមត្តកិច្ចបង្ក្រាបចាប់យកវត្ថុតាង ១-សារធាតុញៀនប្រភេទម៉េតំហ្វេតាមីន ICE ទម្ងន់១០គីឡូក្រាម ។
ចំណែកមេខ្លោងឈ្មោះ វ៉ូ ង៉ុកទូ (VO NGOC TU) ជនជាតិវៀតណាម គេចខ្លួនបាត់ ។ ក្រោយកិច្ចបង្ក្រាប នាវេលាព្រឹកថ្ងៃទី៤ ខែធ្នូ គណៈកម្មការរួមក្រោមការដឹកនាំដោយលោក គុជ គឹមឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះទៅបិទ(ប្លុមបេ)ទីតាំងផលិតគ្រឿងញៀន ផ្ទះលេខ១៦៨ ផ្លូវលេខ១១២ ស្ថិតនៅភូមិរបោះអង្កាញ់ សង្កាត់ព្រែកឯង ជាបណ្តោះអាសន្ន ដើម្បីរង់ចាំបើកការស៊ើបអង្កេតលើករណីកែឆ្នៃ ផលិត នឹងរក្សាទុកគ្រឿងញៀនដោយខុសច្បាប់នេះ ។ រីឯជនសង្ស័យ៤នាក់ នឹងវត្ថុតាង សមត្តកិច្ចបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕
ចែករំលែកព័តមាននេះ