តម្លៃផ្ទះក្នុងប្រទេសកម្ពុជា ជាពិសេសក្នុងទីក្រុងភ្នំពេញប្រហែលជាមិនមានថ្ងៃដែលអាចធ្លាក់ចុះវិញលឿនឡើយ ។ មានន័យថា អ្នកដែលមានក្តីប្រាថ្នាចង់ទិញផ្ទះសម្រាប់ស្នាក់នៅដោយខ្លួនឯងប្រហែលជាត្រូវសន្សំលុយអស់មួយជីវិតទើបមានលទ្ធភាពទិញ ។ ដោយហេតុដូចនេះទើបមនុស្សកាន់តែច្រើនងាកទៅការជួលផ្ទះសម្រាប់ស្នាក់នៅវិញ ប៉ុន្តែតើវាល្អជាងការទិញផ្ទះទេ ?
អ្នកជំនាញមួយចំនួនបានផ្តល់យោបល់មកថា អ្នកមិនគួរជួលផ្ទះស្នាក់នៅជារៀងរហូតឡើយ ព្រោះតែមូលហេតុដូចខាងក្រោមនេះ៖
១. វាជាផ្ទះអ្នកដទៃ៖
មានន័យថា អ្នកមិនមានសិទ្ធិសម្រាប់ធ្វើអ្វីបានទៅលើផ្ទះដែលអ្នកស្នាក់នៅឡើយ លុះត្រាតែអ្នកមានការអនុញ្ញាតពីម្ចាស់ផ្ទះជាមុនសិន ។ លើសពីនេះទៅទៀត រាល់ពេលមានបញ្ហាត្រូវការអ្នកជួសជុលក្នុងផ្ទះជួល ម្ចាស់ផ្ទះស្ទើរតែបាត់មុខទាំងស្រុង ឬមិនឆ្លើយតបបានទាន់ពេលវេលាសម្រាប់អ្នកឡើយ ។
២. អ្នកនឹងត្រូវចាយប្រាក់ចំណូលភាគច្រើនលើវា ៖
សម្រាប់អ្នកដែលមានចំណូលមធ្យម ការជួលផ្ទះអាចនឹងស្មើពាក់កណ្តាលនៃប្រាក់ចំណូលប្រចាំខែរបស់ពួកគេទៅហើយ ។ ប្រសិនបើអ្នកយកលុយនោះទៅបង់រំលស់ផ្ទះវិញ អ្នកនឹងមានលទ្ធភាពក្នុងការក្លាយជាម្ចាស់ផ្ទះនៅថ្ងៃមុខ ។
៣. ម្ចាស់ផ្ទះមានអំណាចជាងអ្នក៖
ម្ចាស់ផ្ទះ និងទីផ្សារជាអ្នកសម្រេចថាអ្នកត្រូវបង់ថ្លៃជួលប៉ុន្មានពេលដែលកិច្ចសន្យារបស់អ្នកផុតពេលមានសុពលភាព ។ លើសពីនេះទៅទៀត ម្ចាស់ផ្ទះក៏មានសិទ្ធិក្នុងការសម្រេចថាឈប់ជួលផ្ទះនោះឲ្យអ្នកដែរដូច្នេះអ្នកនឹងត្រូវបង្ខំចិត្តផ្លាស់ប្តូរកន្លែងស្នាក់នៅជាបន្ទាន់ ។
៤. ការជួលផ្ទះគេនៅមិនអាចជួយឲ្យអ្នកក្លាយជាអ្នកមានទេ៖
ថ្លៃជួលផ្ទះរបស់អ្នកអាចនឹងទាបជាងថ្លៃបង់រំលស់ទិញផ្ទះ ប៉ុន្តែនៅថ្ងៃអនាគត អ្នកអាចមានលទ្ធភាពក្នុងការលក់ផ្ទះដែលបានបង់រំលស់នោះនិងរកប្រាក់ចំណេញបានមកវិញថែមទៀត ។ ការជួលផ្ទះមិនអាចឲ្យអ្នករកប្រាក់ចំណេញវិញបានឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ