សម្រាប់ពេលនេះ រថយន្តម៉ាក GAC Eno.146 គ្រាន់តែជារថយន្ត Prototype ដែលមិនទាន់ដាក់ផលិតជាផ្លូវការនៅឡើយ តែវាហាក់ដូចជាក្រុមហ៊ុនផលិតរថយន្តចិន មានបំណងដាក់យានយន្តអគ្គិសនី ដែលអាចដឹកអ្នកដំណើរបាន៦នាក់ និង ប្រើប្រាស់ថាមពលអគ្គិសនី ទៅក្នុងចង្វាក់ផលិតកម្មនៅថ្ងៃណាមួយពេលខាងមុខ ។
ការដាក់បង្ហាញជាផ្លូវការរបស់ខ្លួននៅឯពិព័រណ៍រថយន្តក្វាងចូវឆ្នាំនេះ រថយន្ត GAC Eno. 146 មានទ្វារមិនធម្មតា ដែលខុសដាច់ពីរថយន្តធម្មតា ដូចអ្នកបានឃើញក្នុងរូបស្រាប់ ហើយសូម្បីតែកញ្ចក់មើលចំហៀងក្រោយ ក៏មានលក្ខណៈខុសប្លែកដែរ ។ គេឌីហ្សាញវាឱ្យមានគម្របកង់ទាំងបួន ដែលមានលក្ខណៈមិនដូចរថយន្តផ្សេងៗទៀត រួមជាមួយនឹងគូថវែងខុសពីគេ ។
ការឌីហ្សាញរបស់វា មានការគិតគូរទៅដល់បច្ចេកវិទ្យាការពារការចាញ់ខ្យល់ ដែលមានលក្ខណៈស្រដៀងទៅនឹងរថយន្ត Bugatti Chiron Super Sport 300+ ដែលជារថយន្តលឿនជាងគេលើលោក ក្រោយបំបែកកំណត់ត្រាល្បឿនលឿនជាង ៣០០ម៉ាយក្នុងមួយម៉ោង ។ ក្រុមហ៊ុនចិន BAC គ្រោងនឹងធ្វើឱ្យរថយន្តរបស់ខ្លួន ប្រសើរជាង Bugatti ខាងផ្នែកទប់មិនឱ្យចាញ់ខ្យល់នេះ ។
រថយន្តរបស់ក្រុមហ៊ុនចិននេះ មានកម្រិតចាញ់ខ្យល់ត្រឹមតែ ០.១៤៦ ប៉ុណ្ណោះ ខណៈដែល Bugatti Chiron មានកម្រិត ០.៣៥ ដែលធ្វើឱ្យវាខ្លាំងជាង Bugatti ដែលមានតម្លៃ៤០ម៉ឺនដុល្លារទៅទៀត ។ ក្រុមហ៊ុន GAC បានអះអាងថា រថយន្តចិននេះគឺជារថយន្តក្នុងចំណោមរថយន្តចាញ់ខ្យល់តិចជាងគេលើលោក ។
ក្រុមហ៊ុន GAC មានគោលបំណងចង់ឱ្យរថយន្តរបស់ខ្លួនទាំងអស់ក្លាយទៅជារថយន្តអគ្គិសនីនៅឆ្នាំ២០២៥ ដែលក្តីប្រាថ្នានេះក៏ជារបស់ក្រុមហ៊ុនផ្សេងៗទៀតដែរ ។ គេបានចាត់ទុករថយន្ត Eno.146 គួរតែជារថយន្តកម្រ។ គេនៅមិនទាន់ប្រាប់ពីពេលវេលាត្រូវផលិតវាជាផ្លូវការសម្រាប់លក់នៅឡើយទេ ។
គេនៅមិនទាន់ប្រាកដថា រថយន្តដែលនឹងផលិតជាផ្លូវការ អាចដូចទៅនឹងរថយន្ត Prototype នេះនៅឡើយទេ។ ដូចនេះ យើងមិនគួរធ្វើការប្រៀបធៀបទៅនឹងរថយន្ត Bugatti Chiron ដែលមានដាក់លក់នៅទីផ្សាររួចហើយនោះទេ តែគេអាចសន្និដ្ឋានបានថា ក្រុមហ៊ុនរថយន្តចិននេះ មានក្តីប្រាថ្នាធំមែនទែន។ គេក៏បានឃើញថា ការឌីហ្សាញរបស់រថយន្តនេះ មានភាពខុសដាច់ពីគេ ដែលនេះអាចហៅបានថា វាជាពេលដែលចិនឈប់ល្បីរឿងចម្លងម៉ូដពីគេទៀតហើយ ៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ