វាមានអាយុកាលជាងមួយទសវត្សរ៍ហើយចាប់តាំងពីរថយន្ត Lexus LX ដ៏ប្រណីត មានការរចនាថ្មី ហើយមិនថារថយន្តប្រភេទ SUV ធំនិងសមត្ថភាពខ្ពស់ប៉ុណ្ណានោះទេ ភាពដដែលៗចាំផ្តើមធ្វើឱ្យយើងស៊ាំភ្នែកហើយ។ ប៉ុន្តែ យើងប្រហែលជាមិនចាំបាច់រង់ចាំយូរជាងនេះសម្រាប់ម៉ូដែលថ្មីពីត្រកូល LX នោះទែ ដោយសារតែមានរបាយការណ៍ពី Lexus Enthusiast បង្ហាញថាកាលបរិច្ឆេទនៃការបង្ហាញខ្លួនរថយន្ត LX ថ្មី នឹងធ្វើឡើងនៅឆ្នាំ ២០២១។ នោះមានន័យថាម៉ូដែលបច្ចុប្បន្ន នឹងអាចនៅមានដង្ហើមយ៉ាងហោចណាស់មួយឆ្នាំទៀត។
ទស្សនាវដ្តីជប៉ុនដែលមានឈ្មោះថា Mag-X បានបញ្ចេញរូបរាងរថយន្តស៊េរីថ្មីនេះ បន្តិចបន្តួចប៉ុណ្ណោះ ដែលធ្វើឱ្យយើងពិបាកនឹងទាញសេចក្តីសន្និដ្ឋានពីរូបរាងរបស់វា។ អ្វីដែលយើងអាចមើលឃើញ គឺផ្នែកខាងក្រោយដែលបានរចនាថ្មី និង មានអំពូលក្រោយ (Taillights) វែងលាតសន្ធឹងវែងអន្លាយ។ គេរចនាម៉ូដបំពង់ស៊ីម៉ាំងទាំងពីរ ឱ្យកាន់តែមានភាពស្ព័រជាងមុន។ តែសម្រាប់ភ្នែកអ្នកពូកែមើលរថយន្តវិញ គេបាននិយាយថា វាមានការឌីហ្សាញស្រដៀងទៅនឹងរថយន្តតម្លៃថោកជាងហ្នឹង Mitsubishi Outlander។
ទស្សនាវដ្តី Mag-X បន្តអះអាងថា LX ស៊េរីថ្មីនេះ នឹងប្រើប្រាស់តួថ្មីស្រឡាង ជាមួយនឹងម៉ាស៊ីន V6 Twin Turbo ដែលខ្ចីពីរថយន្តត្រកូល LS។ នេះគឺមានន័យថា កម្លាំង ៤១៦ សេះនិងកម្លាំងបង្វិល ៤៤២ ផោន-ហ្វីត ដែលនេះគឺជាការធ្វើឱ្យល្អជាងមុនទៅលើម៉ូដែលបច្ចុប្បន្ន។ នៅពេលនេះ LX570 មានម៉ាស៊ីន ៥.៧ លីត្រ V8 គ្មាន Turbo។ វាមានកម្លាំងត្រឹមតែ ៣៨៣ សេះ និងកម្លាំងបង្វិលត្រឹមតែ ៤០២ ផោន-ហ្វីត។ ដោយគេគ្រោងនឹងប្រើប្រាស់ម៉ាស៊ីន V6 ការស៊ីសាំងរបស់រថយន្ត LX ស៊េរីថ្មី ក៏ត្រូវបានរំពឹងថាថយចុះដែរ។
គួរបញ្ជាក់ផងដែរថា នេះប្រហែលជាមិនមែនម៉ូដែលតែមួយរបស់ LX ដែលនឹងចេញលក់នោះទេ ព្រោះកាលពីប៉ុន្មានខែមុន ក៏មានការចុះផ្សាយថា Lexus នឹងបញ្ចេញលក់រថយន្ត Lexus LX600 ដែលមានម៉ាស៊ីនកាន់តែធំជាង LX570។
ចែករំលែកព័តមាននេះ