រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានគូសបញ្ជាក់ទៅកាន់បងប្អូនពិការ រាជរដ្ឋាភិបាលមានឆន្ទៈខ្ពស់ក្នុងការលុបបំបាត់ឧបសគ្គនានា ដើម្បីបង្កើនឱកាសការងារដល់ជនពិការ…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានគូសបញ្ជាក់ទៅកាន់បងប្អូនពិការ រាជរដ្ឋាភិបាលមានឆន្ទៈខ្ពស់ក្នុងការលុបបំបាត់ឧបសគ្គនានា ដើម្បីបង្កើនឱកាសការងារដល់ជនពិការ រួមទាំងបង្កើតនូវយុទ្ធនាការប្រើប្រាស់ភាសាលើកទឹកចិត្តដល់ជនពិការ ដោយមិនអនុញ្ញាតឲ្យប្រើពាក្យអសុរោះ ប្រមាថ មាក់ងាយ និងរើសអើង ។
សម្តេចក្រឡាហោម ស ខេង បានថ្លែងក្នុងពិធីអបអរសាទរសន្និបាតបូកសរុបការអនុវត្តផែនការយុទ្ធសាស្ត្រជាតិស្តីពីពិការភាព ២០១៤-២០១៨ និងប្រកាសជាផ្លូវការដាក់ឲ្យអនុវត្តផែនការយុទ្ធសាស្ត្រជាតិស្តីពីពិការភាព ២០១៩-២០២៣ នៅព្រឹកថ្ងៃទី៣ ខែធ្នូនេះ នៅមជ្ឈមណ្ឌលកោះពេជ្រថា រាជរដ្ឋាភិបាលដាក់ចេញនូវផែនការយុទ្ធសាស្ត្រជាតិស្តីពីពិការភាព ២០១៩-២០២៣ ក្នុងទិសដៅឈានទៅលុបបំបាត់រាល់ទម្រង់កេងប្រវ័ញ្ច និងរើសអើងលើជនមានពិការភាពដោយធ្វើយ៉ាងណាឲ្យជនពិការកាន់តែទទួលបានការគាំទ្រពីសង្គម ។
សម្ដេចបានបញ្ជាក់យ៉ាងដូច្នេះថា ៖«រាជរដ្ឋាភិបាលមានឆន្ទៈខ្ពស់ក្នុងការលុបបំបាត់ឧបសគ្គនានា ដើម្បីបង្កើនឱកាសដល់ជនមានពិការភាព រួមទាំងបង្កើតនូវយុទ្ធនាការប្រើប្រាស់ភាសាលើកទឹកចិត្តដល់ជនមានពិការភាព ដោយមិនអនុញ្ញាតឲ្យប្រើពាក្យអសុរស ក្នុងន័យប្រមាថ មាក់ងាយ និងរើសអើងជនមានពិការភាពដែលផ្ទុយនឹងច្បាប់ស្តីពីកិច្ចការពារ និងលើកកម្ពស់ សិទ្ធិជនពិការដែលបានអនុម័តប្រកាសឲ្យប្រើតាំងពីថ្ងៃទី០៣ ខែកក្កដា ឆ្នាំ២០០៩កន្លងមក» ។
ជាមួយគ្នានោះដែរ សម្ដេចឧបនាយករដ្ឋមន្ត្រីបានបន្ថែមថា រាជរដ្ឋាភិបាលបានដាក់ចេញនូវគោលនយោបាយអភិវឌ្ឍជាតិដោយបន្តប្តេជ្ញាថែរក្សាសន្តិភាព ស្ថេរភាពនយោបាយ សន្តិសុខជាតិ កំណើនសេដ្ឋកិច្ច ដោយឈរលើមូលដ្ឋាន ឯករាជ្យអធិបតេយ្យ បូរណភាពទឹកដី ប្រជាធិបតេយ្យ និងគោរពសិទ្ធិមនុស្ស ។ សម្ដេចថា សិទ្ធិរបស់ជនមានពិការភាពក៏ត្រូវបានការពារ ដោយច្បាប់ជាតិ និងអន្តរជាតិក្នុងគោលបំណងការពារសិទ្ធិសេរីភាព ការពារផលប្រយោជន៍ ទប់ស្កាត់ កាត់បន្ថយលុបបំបាត់ការរើសអើងចំពោះជនមានពិការភាព ដើម្បីធានាដល់សិទ្ធិស្មើភាពគ្នានៃសកម្មភាពក្នុងសង្គមរវាងជនមានពិការភាព និងមិនមានពិការភាព ។
សម្ដេចឧបកនាយករដ្ឋមន្ត្រីលើកឡើងទៀតថា រាជរដ្ឋាភិបាលបានចំណាយថវិការដ្ឋយ៉ាងច្រើន ដើម្បីលើកស្ទួយវិស័យពិការភាពនៅកម្ពុជាសំដៅជួយដល់ជនមានពិការភាព និងក្រុមគ្រួសារឲ្យទទួលបានគុណភាពជីវិតល្អប្រសើរគ្មានការរើសអើងទទួលបានសេវាសង្គម និងសេវាសាធារណៈប្រកបដោយគុណភាពរួមទាំងជំរុញឲ្យជនមានពិការភាពបានចូលរួមគ្រប់សកម្មភាពក្នុងសង្គម ការទទួលបានការគោរពសេចក្តីថ្លៃថ្នូរ ព្រមទាំងធ្វើបរិយាបន្នការងារពិការភាពក្នុងគ្រប់វិស័យ ៕ កែសម្រួលដោយ ៖ សុឃាក់
ចែករំលែកព័តមាននេះ