កងទ័ពរបស់គាត់នៅអ៊ីតាលីបានដណ្តើមបានជ័យជំនះមួយហើយមួយទៀត ។ ក្រោយមកដោយប្រឆាំងនឹងបទបញ្ជាចេញពីទីក្រុងប៉ារីស ណាប៉ូឡេអុង វាយប្រឆាំងបកនឹងសត្រូវដ៏ខ្លាំងបំផុត របស់បារាំង នៅទ្វីបអ៊ឺរ៉ុប គឺប្រទេសអូទ្រីស ។ នៅក្នុងដំណើររុលទៅមុខលឿនដូចផ្លេកបន្ទោរ…
កងទ័ពរបស់គាត់នៅអ៊ីតាលីបានដណ្តើមបានជ័យជំនះមួយហើយមួយទៀត ។ ក្រោយមកដោយប្រឆាំងនឹងបទបញ្ជាចេញពីទីក្រុងប៉ារីស ណាប៉ូឡេអុង វាយប្រឆាំងបកនឹងសត្រូវដ៏ខ្លាំងបំផុត
របស់បារាំង នៅទ្វីបអ៊ឺរ៉ុប គឺប្រទេសអូទ្រីស ។ នៅក្នុងដំណើររុលទៅមុខលឿនដូចផ្លេកបន្ទោរ គាត់
បានឆ្លងកាត់ជួរភ្នំអាល់ (Alps ) ហើយរុលចូលទីក្រុង វីយែន របស់អូទ្រីស ចំងាយ៩៦គីឡូម៉ែត្រ ។ ពួកអូទ្រីសដែលប្រឈមមុខនឹងការពិតដែលស្ទើរតែបរាជ័យនៅក្នុងសមរភូមិបានស្នើសុំឲ្យមានកិច្ចព្រមព្រៀងឈប់បាញ់ ។
នៅក្នុងសន្ធិសញ្ញា Campo Formio ដែលគាត់តែងឡើងដោយ ណាប៉ូឡេ អុង ពួកគេបានយល់ព្រមប្រគល់ទឹកដីបែលហ្សិច រ៉ាញលែនដ៍ និងកោះមួយចំនួននៅឯនាយសមុទ្រ ប្រទេសក្រិចឲ្យមកស្ថិតក្រោមការត្រួតត្រារបស់បារាំង ។ ណាប៉ូឡេអុង បានបញ្ជូនទ្រព្យសម្បិត្ត និងលុយដែលរឹបអូសបានមកពីសង្គ្រាមមកកាន់ក្រុងប៉ារីស ។ ទន្ទឹមពេលនោះ គាត់បានបង្កើតរដ្ឋាភិបាលអ៊ីតាលី ខាងជើងដោយអនុវត្តតាមគំនិតសេរីភាពបដិវត្តបារាំង ។ តែអំឡុងពេលមួយរាត្រីសោះ គាត់បានមានឈ្មោះបោះសម្លេងពេញទ្វីបអ៊ឺរ៉ុប និងសូម្បីនៅអាមេរិកក៏ល្បីឈ្មោះណាប៉ូឡេអុងដែរ ។ មានតែប្រទេសអង់គ្លេសប៉ុណ្ណោះដែលនៅ តែប្រឆាំងជំទាស់នឹងអំណាចបារាំងនៅក្នុងទ្វីបនេះ ។ ដំបូងណាប៉ូឡេអុង គិតចង់ឈ្លានពានដៃសមុទ្រ Channel របស់អង់គ្លេស ប៉ុន្តែពិនិត្យដោយផ្ទាល់ទៅលើតំបន់សមុទ្រ Channel នោះ គាត់ក៏បោះបង់គំនិតព្រោះយល់ឃើញថា កងទ័ពអង់គ្លេសមានកម្លាំងខ្លាំងណាស់មិនអាចឈ្លានពានបានឡើយ ។
ផ្ទុយទៅវិញគាត់បានបើកយុទ្ធនាការមួយនៅប្រទេសអេហ្ស៊ីប ។ នៅទីនោះគាត់អាចបង្កើតមូលដ្ឋានគ្រឹះសម្រាប់អំណាចបារាំងនៅសមុទ្រមេឌីទែរ៉ាណេ ហើយទន្ទឹមពេលជាមួយគ្នានេះ គាត់ផ្តាច់ផ្លូវជំនួញដ៏សំខាន់របស់អង់គ្លេសទៅកាន់ឥណ្ឌា ។ នៅនិទាឃរដូវក្នុងឆ្នាំ១៧៩៨ គាត់បានឈ្លានពានប្រទេសអេហ្ស៊ីប ។ មេដឹកនាំបារាំងមួយចំនួនដែលក្នុងនោះក៏មានតាល់ឡឺរ៉ង់ផងដែរបានលួចសប្បាយក្នុងចិត្តដោយឃើញ ណាប៉ូឡេអុង ដ៏មានប្រជាប្រិយភាពនិងមហិច្ចតាខ្ពស់ចេញឆ្ងាយពីប៉ារីស ព្រោះគេខ្លាចណាប៉ូឡេអុងដណ្តើមអំណាច ។
ភ្លាមនោះគាត់បានដណ្តើមកាន់កាប់កោះម៉ាល់ត៍ នៅសមុទ្រមេឌីទែរ៉ាណេ ។ ក្រោយមកគាត់បាន
ដណ្តើមបាន អាឡិកហ្សង់ឌ្រីដែលជាទីក្រុងចាស់របស់ប្រទេសអេហ្ស៊ីប ។ ទីបញ្ចប់នៅក្នុងសមរ
ភូមិពីរ៉ាមីត គាត់បានវាយរុញច្រានអ្នកការពារក្រុងឡឺគែរឲ្យត្រលប់ទៅកាន់វាលខ្សាច់ ហើយដណ្តើមកាន់កាប់ទាំងស្រុងភាគខាងជើងនៃប្រទេសអេហ្ស៊ីប ។ នៅពេលដែលការប្រយុទ្ធគ្នាបានបញ្ចប់គាត់បានរួសរាន់សង់សាលា និងមន្ទីរទេព្យសម្រាប់ប្រជាជនអេហ្ស៊ីប ។ គាត់បានធ្វើទំនើបភាវូបនីយកម្មរដ្ឋាភិបាលចាប់ផ្តើគំរោងធារាសាស្ត្រ និងដាក់ផែនការសាងព្រែកជីកស៊ុយអែតដ៏ធំដែលភ្ជាប់សមុទ្រមេឌីទែរ៉ាណេទៅកាន់សមុទ្រក្រហម និងមហាសមុទ្រឥណ្ឌាដ៏ធំល្វឹងល្វើយព្រមទាំងមហាសាគរប៉ាស៊ីហ្វិក ។
ណាប៉ូឡេអុងធ្វើរដ្ឋប្រហារនិងបង្កើតរដ្ឋាភិបាលថ្មី
តែទោះជាយ៉ាងណាក្តីការ បរាជ័យដ៏ធំមួយបានតាមពីក្រោយស្រមោលយុទ្ធនាការលើទឹកដីអេហ្ស៊ីបរបស់ណាប៉ូឡេអុង ។ កងនាវាអង់គ្លេសដែលដឹកនាំដោយឧត្តមសេនីយ៍ឯក អូរ៉ាត្យូ ណែល សុន បានវាយកំទេចកងទ័ពជើងទឹកបារាំង ដែលបានឈរជើងនៅអាប៊ូគាកៀរបៃ ជិតម៉ាត់ទន្លេនីល ។ ដោយគ្មាននាវាដើម្បីជួយង្គ្រោះកងទ័របស់ណាប៉ូឡេអុង ទោះជាមានឧត្តមភាពជាងកងទ័ពអង់ គ្លេសមិនអាចគេចខ្លួនចេញពីអេហ្ស៊ីប ឬក៏កំលាំងជំនួសបានឡើយ ។ ណាប៉ូឡេអុងបានចាប់ផ្តើមធ្វើ ការវាយប្រហារលើប្រទេសស៊ីរីទៀតដោយសង្ឃឹមបើកច្រកឆ្ពោះទៅទិសខាងជើង តែត្រូវអង់គ្លេសរារាំង ។
ក្នុងពេលដែលណាប៉ូឡេអុងជួបការលំបាកបែបនេះទួរគី រួមជាមួយអង់គ្លេសរុស្ស៊ី និងអូទ្រីស
បង្កើតសម្ព័ន្ធមិត្តប្រឆាំងការឈ្លានពានរបស់បារាំង ។ អ៊ីតាលីក៏បានងាកចេញពីការគ្រប់គ្រងរបស់បារាំងផងដែរ ។ ណាប៉ូឡេអុង ក៏បានសិ្ថតនៅក្នុងស្ថានភាពឯកោដ៏ធ្ងន់ធ្ងរមួយ ។ គាត់ក៏បានសម្រេច ចិត្តធ្វើការងារចាំបាច់ជាបន្ទាន់មួយ ។ ដោយចោលកងទ័ពរបស់គាត់នៅក្នុងប្រទេសអេហ្ស៊ីប ណាប៉ូឡេអុងបានលួចរត់មកកាន់ក្រុងប៉ារីសដោយគេចរួចខ្លួនទាំងប្រផិតប្រផើយពីការចាប់របស់នាវា អង់គ្លេសពីរគ្រឿង ។ នៅពេលមកដល់ប៉ារីសគាត់បានរួមគំនិតជាមួយទាល់ឡឺរ៉ង់ដ៍ រ៉ូហ្សេឌុយកូសនិងអេម៉ានុយអែលស៊ីយែស ដើម្បីធ្វើរដ្ឋប្រហារមួយក្នុងបំណងដណ្តើមអំណាចកាន់កាប់រដ្ឋាភិបាលបារាំង ។ រឿងនេះនឹងមានផ្សាយជូននៅវគ្គបន្តទៀត ៕
បញ្ជាក់ ៖ វគ្គទី១ ណាប៉ូឡេអុង អធិរាជបារាំងប្រកបដោយមហិច្ឆតាខ្ពស់
ចែករំលែកព័តមាននេះ