ពេលដែលអ្នកកំពុងសន្ទនាជាមួយមនុស្សម្នាក់ទៀត តើអ្នកជាភាគីដែលនិយាយច្រើនជាងគេមែនទេ?តើអ្នកមានចាំស្តាប់រឿងរ៉ាវរបស់ភាគីម្ខាងទៀតឲ្យបានចប់ជាមុនសិនមុននឹងនិយាយពីខ្លួនឯងទេ? ប្រសិនបើអ្នកឆ្លើយថាបាទ ឬចាសម្រាប់សំណួរទាំងពីរនេះនោះអ្នកនឹងមិនអាចសន្ទនាជាមួយលោកមហាសេដ្ឋី ប៊ីល ហ្គេតស៍ (Bill Gates) បានយូរឡើយ ។
កំហុសឆ្គងដែលមនុស្សភាគច្រើនប្រព្រឹត្តពេលដែលកំពុងសន្ទនាជាមួយអ្នកដទៃ ។ ហើយលោក ចន វីស (John P. Weiss) ដែលជាអ្នកនិពន្ធ និងជាងគំនូរជីវចលមួយរូបបានឲ្យដឹងថា មនុស្សភាគច្រើនចំណាយពេលដែលត្រូវស្តាប់អ្នកដទៃដើម្បីគិតពីរឿងរ៉ាវដែលយើងនឹងនិយាយប្រាប់ទៅភាគីម្ខាងទៀត ។ ការសន្ទនាទាំងនេះមិនអាចធ្វើឲ្យភាគីណាមួយសប្បាយចិត្តបន្ទាប់ពីដើរចេញទេ ។ ខាងក្រោមនេះគឺជាដំបូន្មានមួយចំនួនសម្រាប់អ្នកចង់មានការសន្ទនាដូចលោកមហាសេដ្ឋី ប៊ីល ហ្គេតស៍ បើយោងតាមលោក វីស៖
១. កុំព្រួយថា នរណាជាអ្នកត្រូវ៖
ក្នុងស្ថានការភាគច្រើន អ្នកមិនបានអ្វីមកវិញទេប្រសិនបើអ្នកបង្ហាញថាអ្នកជាអ្នកត្រូវហើយអ្នកដទៃខុស ។ ផ្ទុយមកវិញ ប្រសិនបើអ្នកចង់បញ្ចុះបញ្ចូលអ្នកដទៃឲ្យស្តាប់តាមអ្នកពីប្រធានបទអ្វីមួយ វិធីដែលល្អជាងគេគឺចាប់ផ្តើមដោយសួរសំណួរជាច្រើន និងទុកពេលឲ្យភាគីម្ខាងទៀតបកស្រាយពីទស្សនៈខណៈដែលអ្នកចាំស្តាប់ដោយប្រុងប្រយ័ត្ន ។
២. កុំគ្រប់គ្រងការសន្ទនាដោយម្នាក់ឯង៖
តើអ្នកនិយាយច្រើនពេលម្នាក់ឯង ឬទេ? អ្នកត្រូវរៀនចេះសង្កេតពីពេលវេលាដែលអ្នកចែករំលែកពីខ្លួនឯងខណៈដែលអ្នកដទៃអង្គុយចាំស្តាប់ ។ ប្រសិនបើអ្នកចង់ដឹងថាអ្នកដទៃចាប់អារម្មណ៍នឹងរឿងជីវិតអ្នកឬទេនោះ អ្នកអាចធ្វើពុធលើកទូរស័ព្ទខណៈដែលកំពុងនិយាយ និងដើរចេញប៉ុន្មាននាទីមុននឹងដើរមកវិញ ។ ប្រសិនបើមិនមាននរណាសុំឲ្យអ្នកបន្តរឿងរ៉ាវរបស់អ្នកទេនោះមានន័យថាអ្នកដទៃមិនចាប់អារម្មណ៍នឹងអ្វីដែលអ្នកចែករំលែកឡើយ ។
៣. ម្តងគេ ម្តងយើង៖
ពេលខ្លះអ្នកប្រហែលជាមានរឿងរ៉ាវស្ត្រេសដែលអ្នកចង់រអ៊ូរប្រាប់អ្នកដទៃដើម្បីឲ្យធូរស្រាលក្នុងចិត្ត ប៉ុន្តែប្រសិនបើអ្នកធ្វើដូច្នេះ អ្នកនឹងគ្រប់គ្រងការសន្ទនាជាក់ជាមិនខាន ។ ដូច្នេះវិធីដែលល្អគឺរំលឹកខ្លួនឲ្យទុកឱកាសឲ្យអ្នកដទៃនិយាយផងបន្ទាប់ពីអ្នកចែករំលែករួច ។ អ្នកក៏អាចបោះជាសំណួរទៅអ្នកដទៃវិញពេលដែលអ្នកនិយាយចប់ដែរព្រោះវាបង្ហាញថាអ្នកគិតគូរពីអ្នកដទៃដែលស្តាប់ដែរ ៕ កែសម្រួលដោយ ៖ សុឃាក់
ចែករំលែកព័តមាននេះ