រាជធានីភ្នំពេញ ៖ ឯកអគ្គរដ្ឋទូតសហភាពអឺរ៉ុបបានកោតសរសើរចំពោះកម្ពុជាថា កំពុងតែដើរផ្លូវត្រូវក្នុងការអភិវឌ្ឍប្រកបដោយចីរភាព ។ យោងតាមបណ្តាញសង្គមហ្វេស ប៊ុក សម្តេចតេជោបានឲ្យដឹងថា ក្នុងជំនួបពិភាក្សាជាមួយទ្វេភាគី សម្តេចតេជោ ហ៊ុន សែន នាយករដ្ឋមន្ត្រី នាព្រឹកថ្ងៃទី០២ ធ្នូ ឆ្នាំ២០១៩ លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបថ្មីប្រចាំកម្ពុជាបានសម្តែងនូវការភ្ញាក់ផ្អើល និងអបអរសាទរយ៉ាងខ្លាំងចំពោះការអភិវឌ្ឍរបស់កម្ពុជា ។
លោកជំទាវបានមានបានបញ្ជាក់ថា ៖«កម្ពុជាយើងមានការអភិវឌ្ឍ និងកំពុងដើរលើផ្លូវត្រូវក្នុងការជំរុញការអភិវឌ្ឍប្រកបដោយចីរភាពលើបញ្ហាប្រែប្រួលអាកាសធាតុ ការថែរក្សាគ្រប់គ្រងធនធានធម្មជាតិ និងការអភិវឌ្ឍពាណិជ្ជកម្មប្រកបដោយចីរភាព» ។ លោកជំទាវបានគូសបញ្ជាក់ថា«ទាំងនេះ គឺទទួលបានមកពីសុខសន្តិភាព និងស្ថិរភាពដែលកម្ពុជាទទួលបានហើយសុខសន្តិភាព ស្ថិរភាពនេះទៀតសោធ គឺជាមូលដ្ឋានចាំបាច់បំផុតសម្រាប់អនាគតកម្ពុជាយើងសម្រាប់ការអភិវឌ្ឍប្រកបដោយចីរភាពក៏ដូចជា សម្រាប់យុវជនជំនាន់ក្រោយរបស់កម្ពុជាផងដែរ» ។
ក្នុងន័យនេះលោកជំទាវបានបញ្ជាក់ថា «លោកជំទាវពិតជាមានមោទនភាពណាស់ ចំពោះកម្ពុជានឹងបន្តជាដៃគូជួយកម្ពុជាយើង ដើម្បីគាំទ្រដល់ការអភិវឌ្ឍកម្ពុជាប្រកបដោយចីរភាពជាភាព ។ ជាការឆ្លើយតបសម្ដេចតេជោនាយករដ្ឋមន្ត្រីបានសម្តែងនូវការអបអរសាទរជូនចំពោះលោកជំទាវ Carmen ដែលបានត្រូវតែងតាំងជាអគ្គរដ្ឋទូតសហគមន៍អឺរ៉ុបប្រចាំនៅព្រះរាជាណាចក្រកម្ពុជា ។
សម្តេចតេជោក៏បានថ្លែងអំណរគុណនូវការមើលឃើញពីសុខសន្តិភាព និងស្ថិរភាពកម្ពុជា ដែលលោកជំទាវបានលើកឡើង ព្រោះអ្វីដែលលោកជំទាវបានលើកឡើង គឺជាមូលដ្ឋានមួយដែលកម្ពុជា និងសហគមន៍អឺរុបអាចបន្តធ្វើការរួមគ្នាពង្រឹងទំនាក់ទំនងឲ្យកាន់តែរឹងមាំថែមទៀត ។ សម្ដេចតេជោបានថ្លែងអំណរគុណជូនដល់សហគមន៍អឺរ៉ុបដែលបានជួយដល់កម្ពុជា ជាពិសេសក្នុងការកាត់ទោសអតីតថ្នាក់ដឹកនាំកំពូលៗខ្មែរក្រហម និងបានជួយដល់កម្ពុជាជាច្រើនដែរលើវិស័យដទៃទៀត ។
ទន្ទឹមនឹងនេះសម្តេចតេជោនាយករដ្ឋមន្ត្រីបានមានប្រសាសន៍ថា យើងគប្បីណាឈរលើមូលដ្ឋានត្រឹមត្រូវនូវរាល់កិច្ចការងារដែលយើងបានសហការគ្នាកន្លងមក និងស្វែងរកនូវអ្វីដែលយើងអាចសហការធ្វើការរួមគ្នាបន្តទៀត ក្នុងភាពជាដៃគូរផង និងក្នុងកិច្ចពង្រឹងពង្រីកទំនាក់ទំនងរវាងសហគមន៍អឺរ៉ុប និងកម្ពុជាផង ។ សម្តេចតេជោនាយករដ្ឋមន្ត្រីបានជូនពរលោកជំទាវ Carmen Moreno សូមទទួលបាននូវសុខភាពល្អ និងជោគជ័យក្នុងបេសកកម្មថ្មីនេះ ៕ កែសម្រួលដោយ ៖ សុឃាក់
ចែករំលែកព័តមាននេះ