រាជធានីភ្នំពេញ ៖ កំណាត់ផ្លូវលំស្ថិតនៅក្នុងភូមិបាក់ខែង សង្កាត់ព្រែកលៀប ខណ្ឌជ្រោយចង្វារ ត្រូវបានកាត់ផ្តាច់បិទចរាចរណ៍អស់ប្រមាណកន្លះខែមកហើយ បន្ទាប់ពីខ្លោងទ្វារស្ពានព្រែកតាស៊ុន ត្រង់ចំណុចស្ពានទី៤ ដែលជាអំណោយរបស់ប្រទេសបារាំងត្រូវបានរថយន្តដឹកដីបើកទាក់បាក់ប្រុងនឹងធ្លាក់ តែជាប់ដោយសារជន្ទល់ប៉ុណ្ណោះ…
រាជធានីភ្នំពេញ ៖ កំណាត់ផ្លូវលំស្ថិតនៅក្នុងភូមិបាក់ខែង សង្កាត់ព្រែកលៀប ខណ្ឌជ្រោយចង្វារ ត្រូវបានកាត់ផ្តាច់បិទចរាចរណ៍អស់ប្រមាណកន្លះខែមកហើយ បន្ទាប់ពីខ្លោងទ្វារស្ពានព្រែកតាស៊ុន ត្រង់ចំណុចស្ពានទី៤ ដែលជាអំណោយរបស់ប្រទេសបារាំងត្រូវបានរថយន្តដឹកដីបើកទាក់បាក់ប្រុងនឹងធ្លាក់ តែជាប់ដោយសារជន្ទល់ប៉ុណ្ណោះ ។ ទន្ទឹមបិទផ្លូវនេះដែរ ប្រជាពលរដ្ឋ ដែលរស់នៅក្បែនោះ និងធ្វើដំណើរអាស្រ័យស្ពាននោះក៏បានបង្ហោះសារតាមបណ្តាញសង្គមរិះគន់ដល់អាជ្ញាធរសង្កាត់និងខណ្ឌ ជ្រោយចង្វារ មិនបានយកចិត្តទុកដាក់ជួសជុលដើម្បីអោយបានឆ្លងកាត់វិញ ទុកអោយពួកគាត់ជិះវាង។
តាមប្រជាពលរដ្ឋបានអោយដឹងថា រយៈពេលប្រមាណជិត១ខែមកហើយ ដែលខ្លោងទ្វារស្ពានព្រែកតាស៊ុននេះ ត្រូវបានរថយន្តដឹកឥដ្ឋធ្វើដំណើរក្នុងទិសដៅពីត្បូងទៅជើង បើកទាក់ បណ្តាលអោយបាក់ស្ទើរតែធ្លាក់ ដោយសារតែខ្លាចគ្រោះថ្នាក់ ភូមិ សង្កាត់ រួមទាំងប្រជាពលរដ្ឋក៏បាននាំគ្នាយកដើមស្លាមកទល់ ព្រមទាំងយកធាងដូងមកដាក់ឃាំងហាមធ្វើចរាចរណ៍ ។
តាមប្រភពព័ត៌មានអោយដឹងថា បន្ទាប់ពីបង្កអោយបាក់ខ្លោងទ្វារ ប្រជាពលរដ្ឋក៏បានថតស្លាកលេខ រថយន្តបង្ក ហើយរាយការណ៍ទៅនគរបាលអោយជួយរករថយន្តហើយក៏ស្ងាត់រហូត ។ ដោយឡែក អាជ្ញាធរភូមិ ក៏បានរាយការណ៍ទៅរដ្ឋបាលខណ្ឌជ្រោយចង្វារ ហើយខណ្ឌក៏បានរាយការណ៍ទៅសាលារាជធានីភ្នំពេញ ដែលជាម្ចាស់ការក៏ស្ងាត់រហូត ដោយទុកអោយខ្លោងទ្វារដែលបាក់បែកនៅចោល មិនអាចធ្វើដំណើរឆ្លងកាត់បាន ។ ដោយសារតែមិនអើពើ ទើបប្រជាពលរដ្ឋក៏បានបង្ហោះសារនៅលើបណ្តាញសង្គមរិះដល់អាជ្ញាធរ សង្កាត់ និងខណ្ឌជ្រោយចង្វារផងដែរ ។
លោកព្រាប មុន្នី ចៅសង្កាតព្រែកលៀបបានអោយដឹងថា ស្ពានព្រែកតាស៊ុន ត្រូវបានរថយន្តដឹកឥដ្ឋ ពាក់ស្លាកលេខ ភ្នំពេញ ៣B-៦១៦១ បើកទាក់បាក់កាលពីវេលាយប់ថ្ងៃទី១៦ ខែវិច្ឆិកា ឆ្នាំ២០១៩ ។ បន្ទាប់ពីរថយន្តបង្កអោយបាក់ខ្លោងទ្វារ លោកបានក៏បានរាយការណ៍ទៅសាលាខណ្ឌភ្លាមៗ ដើម្បីមានវិធានការជួសជុលទៅតាមរចនាបថដើម ព្រោះសង្កាត់មិនមានលទ្ធភាព ហើយម្យ៉ាងទៀត មិនអាចវាយខ្លោងទ្វារ នោះចោលខុសពីទម្រង់ដើមបានឡើយ ។
លោកចៅសង្កាត់បានអោយដឹងទៀតថា ដោយសាតែមានការគិតគូរ លោកឃ្លាំង ហួត អភិបាលខណ្ឌជ្រោយចង្វារ ក៍បានណែនាំ អោយសង្កាត់រកជាងជួសជុលខ្លោងទ្វារនោះដើម្បីបើកអោយធ្វើចរាចរណ៍ឡើងវិញ ដោយលោកអភិបាលជាអ្នកចេញលុយ ។ លោកចៅសង្កាត់ក៏បានអោយដឹងថា ស្ពាននេះត្រូវបានរថយន្តបើកទាក់ បណ្តាលឱ្យបាក់ចំនួន៣លើកមកហើយគិតទាំងលើកនេះ។
គួរបញ្ជាក់បញ្ចាក់ថា ស្ពាន់ព្រែកតាស៊ុនបានដំណើរការសាងសង់កាលពីខែមេសា ឆ្នាំ ២០០២ ក្នុងរយៈពេល៣ខែ ដែលជាអំណោយរបស់ប្រទេសបារាំង ហើយសាលាក្រុងភ្នំពេញជាម្ចាស់ការ ។ ស្ពាននោះ បង្កាន់ដៃទាំងសងខាង និងក្បាលស្ពានមានសណ្ឋានដូចជាទូក ដោយឆ្លងកាត់ព្រែកតាស៊ុន ។ ចំណែកខ្លោងទ្វារមានកំពស់តែ២ម៉ែត្រកន្លះ ជាហេតុធ្វើអោយរថយន្តបើកទាក់បាក់ជាច្រើនលើកមកហើយ៕ (កែសម្រួលដោយ ៖ ធីតា)
ចែករំលែកព័តមាននេះ