ខេត្តមណ្ឌលគិរី ៖ អាកាសធាតុត្រជាក់បានគ្របដណ្តប់ទីរួមខេត្តមណ្ឌលគិរីអស់រយៈពេលប្រមាណ១ខែមកនេះ ពោលគឺចាប់តាំងពីអំឡុងដើមខែវិច្ឆិកាមក ដែលតាមចំណាំរបស់អ្នកស្រុកអាចនិយាយបានថា ឈានដល់រដូវរងារ ហើយភាពត្រជាក់នេះផងដែរ ក៏លាយឡំជាមួយខ្យល់បោកបក់យ៉ាងខ្លាំង ប៉ុន្តែទោះជាយ៉ាងណាឥទ្ធិពលនៃបំរែបំរួលអាកាសធាតុនេះ មិនបានជះឥទ្ធិពលអាក្រក់ដល់ខេត្តមណ្ឌលគិរីនោះទេ ។ ផ្ទុយទៅវិញបរិយាកាសបែបនេះ ពិតជាអំណោយផលសម្រាប់ ដំណើរកម្សាន្តរបស់អ្នកទេសចរជាខ្លាំង។
ខេត្តមណ្ឌលគិរីដែលល្បីថា ជាខេត្តនៃភាគឥសាន្តដែលមានអាកាសធាតុត្រជាក់ជាងគេនោះ បរិយាកាសត្រជាក់នេះ គឺផ្ដើមពីខែវិច្ឆិកា អូសបន្លាយទៅដល់ចុងខែមករា ហើយក្នុងអំឡុងខែធ្នូ អាកាសធាតុនឹងធ្លាក់ចុះទាបជាងគេ។ បើយើងពិនិត្យលើឧបករណ៍ស្ទង់សីតុណ្ហភាព និងស្ថានភាពជាក់ស្ដែងមួយរយៈនេះឃើញថា កម្រិតសីតុណ្ហភាពក្នុងពេលព្រឹក និងយប់ បានធ្លាក់ចុះក្នុងចន្លោះ១៨ទៅ២៣អង្សា ហើយសម្រាប់នៅពេលថ្ងៃត្រង់ សីតុណ្ហភាពមិនឡើងដល់៣០អង្សាទេ ទូទៅស្ថិតក្នុងរង្វង់២៦ទៅ២៨អង្សាប៉ុណ្ណោះ ម្ដងម្កាលក៏មានផ្សែងអ័ព្ទគ្រប់ដណ្ដប់តំបន់មួយចំនួនផងដែរក្នុងខេត្ត ។
តាមការសង្កេតជាក់ស្ដែងឃើញថា ប្រជាពលរដ្ឋទូទៅមិនថា ចាស់ មិនថាក្មេង ចាប់ផ្ដើមប្រើប្រាស់សម្លៀកបំពាក់ក្រាស់ៗ ដើម្បីស្លៀកពាក់កាត់បន្ថយភាពត្រជាក់ ហើយអាកាសធាតុបែបនេះ ក៏បានធ្វើប្រជាពលរដ្ឋ ជាពិសេសក្មេងតូចៗជួបប្រទះជាមួយនឹងអាការៈផ្ដាសាយផងដែរ ។ ចំណែកឯសីតុណ្ហភាពវិញ គេសង្កេតឃើញនៅក្នុងក្រុងសែនមនោរម្យ ស្រុកអូររាំង និងស្រុកពេជ្រាដា គឺមានភាពត្រជាក់ខ្លាំងជាងបណ្តាស្រុកផ្សេងៗទៀត។
សូមបញ្ជាក់ថា សម្រាប់ខេត្តមណ្ឌលគិរី ទោះបីជាមិនមានរងសម្ពាធណាមួយពីបញ្ហាអាកាសធាតុក្ដី ប៉ុន្តែខេត្តមណ្ឌលគិរីនៅតែមានភាពត្រជាក់ប្លែកខុសពីខេត្តផ្សេងៗក្នុងភូមិភាគឥសាន្ត ដោយសារតែខេត្តនេះមានកម្ពស់ខ្ពស់ជាងនីវ៉ូទឹកសមុទ្រជិតមួយពាន់ម៉ែត្រ ហើយលក្ខណៈបែបនេះគឺវាបង្កឲ្យមានសំណើម និងភាពត្រជាក់ ។
ជាមួយគ្នានេះដែរ ពាក់ព័ន្ធនឹងសុខភាពរបស់ប្រជាពលរដ្ឋ ជាពិសេសភ្ញៀវទេសចរណ៍ ពុំមានអ្វីដែលគួរឲ្យព្រួយបារម្ភនោះទេ នេះបើតាមការបញ្ជាក់របស់មន្ត្រីជំនាញ។ តែសម្រាប់អ្នកដើរលេង គួរត្រៀមសម្លៀកបំពាក់ក្រាស់ឲ្យបានច្រើន ចៀសវាងកើតគ្រុនផ្តាសាយ។ (កែសម្រួលដោយ ៖ បុប្ផា)
ចែករំលែកព័តមាននេះ