បង្ក្រាបទីតាំងដែលថ្លើមពាសមេឃ
- ភ្នំពេញ
រាជធានីភ្នំពេញ ៖ រសៀលថ្ងៃទី៣០ វិច្ឆិកា នគរបាលខណ្ឌដូនពេញ ដឹកនាំដោយលោក សុខ ពេញវុធ អភិបាលខណ្ឌ និងលោកវរសេនីយ៍ឯក…
រាជធានីភ្នំពេញ ៖ រសៀលថ្ងៃទី៣០ វិច្ឆិកា នគរបាលខណ្ឌដូនពេញ ដឹកនាំដោយលោក សុខ ពេញវុធ អភិបាលខណ្ឌ និងលោកវរសេនីយ៍ឯក ទៀង ចន្ទសារ អធិការនគរបាលខណ្ឌ បានបង្ហាញមុខបុរស៦នាក់ដែលជាអ្នកផលិតផ្លាកលេខរថយន្ត និងម៉ូតូក្លែងក្លាយ ក្រោយពីកម្លាំងសមត្ថកិច្ចខណ្ឌដូនពេញ បានធ្វើប្រតិបត្តិការបង្ក្រាបកន្លែងផលិតផ្លាកលេខក្លែងក្លាយនៅចំនួន៣ទីតាំង ដែលស្ថិតនៅក្នុងសង្កាត់ចំនួន៣ គឺសង្កាត់ផ្សារថ្មីទី៣ សង្កាត់បឹងរាំង និងសង្កាត់ចតុមុខ ដោយដកហូតផ្លាកលេខរថយន្តនិងម៉ូតូក្លែងក្លាយ បានសរុបចំនួន៧០បន្ទះ រួមទាំងឧបករណ៍ប្រើប្រាស់មួយចំនួនធំទៀត ។
ប្រភពព័ត៌មានពីនគរបាលឱ្យដឹងថា បុរសទាំង៦នាក់ ដែលត្រូវបានឃាត់ខ្លួនមាន
១-ឈ្មោះ យ៉ុន ផល្លា អាយុ៥០ឆ្នាំ
២-ឈ្មោះ ណុល ណែន អាយុ៤៥ឆ្នាំ
២-ឈ្មោះ ឡន ផល្លា អាយុ៣១ឆ្នាំ
៤-ឈ្មោះ ឈូ ឈិន អាយុ៤៩ឆ្នាំ
៥-ឈ្មោះ ផេង ធិ អាយុ៣៧ឆ្នាំ
៦-ឈ្មោះថោង សំណាង អាយុ៣៣ឆ្នាំ ។
ប្រតិបត្តិការបង្ក្រាបករណីផលិតផ្លាកលេខយានយន្តក្លែងក្លាយនេះ គឺបានធ្វើឡើងក្រោយពីមានការស្រាវជ្រាវអស់រយៈពេល២សប្តាហ៍ ដោយនគរបាលខណ្ឌដូនពេញ សហការជាមួយនឹងនគរបាលប៉ុស្តិ៍សង្កាត់ផ្សារថ្មីទី៣ ប៉ុស្តិ៍បឹងរាំង និងប៉ុស្តិ៍ចតុមុខ បានចុះពិនិត្យចំនួន៧ទីតាំងជាបន្តបន្ទាប់គ្នា ។ នៅក្នុងសង្កាត់ផ្សារថ្មី៣ធ្វើការបង្ក្រាប៣ទីតាំង ចាប់ឃាត់ខ្លួនមនុស្ស២នាក់ ដកហូតបានផ្លាកលេខរថយន្តនិងម៉ូតូបានចំនួន២២បន្ទះ ក្នុងនោះមានផ្លាកលេខស៊ីវិលចំនួន១០បន្ទះ ផ្លាកលេខ ន.ប ចំនួន៣បន្ទះ ផ្លាកលេខ ខ.ម ចំនួន៥បន្ទះ ផ្លាកលេខកាសែត១បន្ទះ ម៉ាស៊ីនកុំព្យូទ័រ២គ្រឿង ម៉ាស៊ីនកាត់ស្ទីគ័រចំនួន២គ្រឿង រួមទាំងថ្នាំពណ៌ និងឧបករណ៍ប្រើប្រាស់មួយចំនួនទៀត ។
នៅសង្កាត់បឹងរាំងបានចាប់ឃាត់ខ្លួនមនុស្ស៣នាក់ ដកហូតផ្លាកលេខរថយន្តនិងម៉ូតូចំនួន២០បន្ទះ ក្នុងនោះមានផ្លាកលេខរថយន្តស៊ីវិល៣បន្ទះ ផ្លាកលេខ ន.ប ៤បន្ទះ ផ្លាកលេខខ.ម ២បន្ទះ ផ្លាកលេខម៉ូតូស៊ីវិល៨បន្ទះ ផ្លាកលេខម៉ូតូ ន.ប មួយបន្ទះ និងផ្លាកលេខ ខ.ម មួយបន្ទះ រួមទាំងថ្នាំបាញ់បន្ទះដែកស័ង្កសីមួយចំនួនទៀត ។
នៅក្នុងសង្កាត់ចតុមុខ ធ្វើការបង្ក្រាប១ទីតាំង ឃាត់ខ្លួនបានមនុស្សម្នាក់ ដកហូតបានផ្លាកលេខរថយន្ត និងម៉ូតូក្លែងក្លាយ សរុបចំនួន៣៣បន្ទះ ក្នុងនោះមានផ្លាកលេខរថយន្តស៊ីវិលចំនួន២១បន្ទះ ផ្លាកលេខរថយន្ដរដ្ឋ២បន្ទះ ផ្លាក លេខរថយន្តចង្កូតស្តាំ៣បន្ទះ ផ្លាកលេខម៉ូតូ ខ.ម ចំនួន៦បន្ទះ ផ្លាកលេខម៉ូតូស៊ីវិល១បន្ទះ និង ឧបករណ៍ប្រើប្រាស់មួយចំនួនទៀត ។
ជារួមនៅក្នុងប្រតិបត្តិការបង្ក្រាបទីតាំងផលិតផ្លាកលេខរថយន្ត និងម៉ូតូក្លែងក្លាយទាំង៧កន្លែង នៅក្នុងសង្កាត់ទាំង៣នេះបានឃាត់ខ្លួនមនុស្ស៦នាក់ ដកហូតបានផ្លាកលេខរថយន្ត ម៉ូតូ ទាំងផ្លាកលេខរដ្ឋ ស៊ីវិល នគរបាល ខេមរភូមិន្ទ សរុបចំនួន៧០បន្ទះ កុំព្យូទ័រចំនួន៧គ្រឿង ម៉ាស៊ីនកាត់ស្ទីគ័រ២គ្រឿង ថ្នាំបាញ់ បន្ទះស័ង្កសី រួមទាំងឧបករណ៍ប្រើប្រាស់ជាវត្ថុតាងពាក់ព័ន្ធមួយចំនួនធំទៀត ។ជនសង្ស័យត្រូវបានឃុំខ្លួននៅអធិការដ្ឋាននគរបាលខណ្ឌដូនពេញ ដើម្បីចាត់ការទៅតាមនីតិវិធីជាបន្តទៅទៀត ដែលចៀសមិនរួចពីមានទោសឡើយ ព្រោះជាមុខរបរទុច្ចរិត ៕
ចែករំលែកព័តមាននេះ