ខេត្តកំពង់ឆ្នាំង៖ ទន្ទឹមនឹងភាពជោគជ័យក្នុងការដាំបន្លែក្នុងទឹកដែលគ្មានសារធាតុជាតិគីមី ហើយទទួលបានការគាំទ្រច្រើនពីអតិថិជននោះ កសិករនៅខេត្តកំពង់ឆ្នាំងថែមទាំងបានចែលរំលែកនូវបទពិសោធជោគជ័យរបស់ខ្លួនដល់កសិករឯទៀតផងដែរ ។ វិធីសាស្ត្រនៃការដាំបន្លែលើទឹក ដែលតាមភាសាបច្ចេកទេសហៅថា ហៃត្រូប៉ូនិក (Hydroponic) បច្ចុប្បន្នត្រូវគេសង្កេតឃើញថាមានអ្នកចាប់យកមុខរបរនេះជាបន្តបន្ទាប់ ព្រោះទទួលស្គាល់ថាជាវិធីសាស្ត្រមួយពិតជាធ្វើឲ្យបន្លែរបស់ខ្លួនគ្មានសារធាតុគីមី ហើយអតិថិជនមានជំនឿទុកចិត្តដោយបានទិញយកទៅទទួលទានគ្រប់ៗគ្នា ។
នៅក្នុងឱកាសដាក់តាំងផលិតផលដំណាំកសិកម្មគ្មានជាតិគីមី ដែលរៀបចំដោយមន្ទីរកសិកម្ម រុក្ខាប្រមាញ់និងនេសាទ ខេត្តកំពង់ឆ្នាំង កាលពីដើមសប្តាហ៍កន្លងទៅនេះ លោក ចាប វិបុល ដែលជាម្ចាស់កសិដ្ឋានដាំបន្លែលើទឹក ក៏បាននាំយកផលិតផលរបស់ខ្លួនមកដាក់តាំងលក់ដូចគេដែរ ហើយក៏ត្រូវបានអតិថិជនគាំទ្រ និងស្ងើចសរសើរគ្រប់ៗគ្នាទៀតផង ។
យុវជនឈ្មោះ ជ័យ វាសនា ដែលជាមេការមើលការខុសត្រូវក្នុងកសិដ្ឋានដាំបន្លែលើទឹក ដែលមានទីតាំងនៅភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង បានឱ្យដឹងថា ការដាំបន្លែលើទឹករបស់លោក ចាប វិបុល គឺចាប់ផ្ដើមដំណើរការនៅខែកក្កដា និងបានចាប់ផ្ដើមដាំបន្លែនៅខែសីហា ឆ្នាំ ២០១៩ បើគិតមកដលើពេលនេះទទួលផល ២លើករួចមកហើយ ។
ជ័យ វាសនា ឱ្យដឹងទៀតថា លោក ចាប វិបុលជានិស្សិតមួយរូបធ្លាប់ទទួលការ បណ្តុះបណ្តាលនៅក្រៅប្រទេសលើផ្នែកកសិកម្ម រយៈពេលវែង ដោយទទួលបានសញ្ញាប័ត្រទៀតផង ។ ចំពោះការរៀបកសិដ្ឋាន និងឧបករណ៍មួយចំនួន គឺបាននាំមកពីក្រៅប្រទេស ដោយក្នុងកសិដ្ឋានមានទំហំធំល្មម បែបនេះ គឺបានចំណាយដើមទុនជាង ១ម៉ឺនដុល្លាឯណោះ ។
ថ្វីបើថ្លៃបន្តិចមែន ប៉ុន្តែលទ្ធផលគឺទទួលបានល្អប្រសើរ ហើយបើគិតមកដល់ពេលនេះគឺទទួលបានផល ២លើករួចមកហើយ ។ ការដាំបន្លែលើទឹកបែបនេះជួបការលំបាកខ្លះៗដែរ ដូចជាទឹកត្រូវវាស់កម្រិត ប៉េ-ហាស់ (P-H) ត្រឹមត្រូវទៅតាមស្ដង់ដា ហើយក្នុង ១ ថ្ងៃត្រូវវាស់ ២ ទៅ ៣ ដងដែរ ។ ជាងនេះទៅទៀតការដាំបន្លែលើទឹកនៅកសិដ្ឋានមានបំពាក់ដោយបច្ចេកទេសទំនើប ដូចជាក្នុង ១៥ នាទីម្ដងមានការបាញ់ទឹកដោយស្វយ័ប្រវត្តិសាចស្រោចពីលើបន្លែក្នុងកសិដ្ឋានដែលហ៊ុំព័ទ្ធដោយស្បៃយ៉ាងជិត ការពារសត្វល្អិត ដើម្បីឱ្យមានសីតុណ្ហភាពក្តៅសមល្មម ។
យុវជន ជ័យ វាសនា ដែលមេការកសិដ្ឋានរូបនេះបានបញ្ជាក់ទៀតថា បច្ចុប្បន្នមានអតិថិជនគាំទ្រជាច្រើនដោយបានមកទិញបន្លែពីកសិដ្ឋានដោយផ្ទាល់នៅទីនេះ និងមួយផ្នែកទៀតបានបញ្ជូនតាមភោជនីយដ្ឋាននានាក្នុងខេត្ត និងក៏មានបោះដុំទៅក្រៅខេត្តខ្លះដែរ ។ អតិថិជនទាំងនោះបានដឹងថា៖ បន្លែទៅទីនេះគ្មានសារធាតុគីមី សូម្បីតែបន្តិចមិនធ្វើឱ្យមិនប៉ះពាល់ដល់សុខភាព ៕
ចែករំលែកព័តមាននេះ