អំពើសម្លាប់សត្វបើទុកជាមិនឃើញទោសក្នុងជាតិនោះ ក៏គង់នឹងមានទោសក្នុងជាតិខាងមុខឲ្យរងទុក្ខក្នុងអបាយភូមិមាននរកជាដើមមិនខានឡើយ លុះរួចអំពីនោះមក ក៏មកកើតជាមនុស្សអាយុខ្លី និងមានរោគច្រើន ។
ព្រោះហេតុនោះបានជាអំពើដែលសម្លាប់សត្វ លោកឲ្យឈ្មោះថា បាប ជាអំពើអាក្រក់មិនគួរធ្វើ។ អ្នកប្រាជ្ញទាំងឡាយដែលជឿកម្ម និងផលរបស់កម្ម លោកមិនសម្លាប់សត្វដោយខ្លួនឯង និងមិនប្រើគេឲ្យសម្លាប់ឡើយ ព្រោះមានកម្មធ្ងន់ណាស់ ។
លើសពីនេះទៀតលោកបានទាំងបបួលអ្នកដទៃ ដែលជឿតាមពាក្យសម្ដីរបស់លោកឲ្យឈប់សម្លាប់ និងនិយាយទូន្មានគេឲ្យមានចិត្តមេត្តាប្រណីសត្វនិងមនុស្សថែមទៀត។ មិនគ្រាន់តែមានចិត្តមេត្តាប៉ុណ្ណោះ បានទាំងឲ្យទានទាំងឡាយ មានបាយនិងទឹកជាដើមដើម្បីជួយស្រោចស្រង់ជីវិតរបស់មនុស្សនិងសត្វឥតរើសមុខឲ្យបានសុខទៀតផង ។ ដោយសាន សារិន
ចែករំលែកព័តមាននេះ