រាជធានីភ្នំពេញ ៖ ក្នុងគោលដៅជំរុញការអភិវឌ្ឍនៅតាមតំបន់ជនបទជាពិសេសទៅលើវិស័យថាមពល រដ្ឋាភិបាលសហព័ន្ធអាល្លឺម៉ង់ តាមរយៈស្ថានទូតអាល្លឺម៉ង់ប្រចាំកម្ពុជា បានសម្រេចផ្ដល់ឥណទានហិរញ្ញវត្ថុចំនួន ៦៧,១លានអឺរ៉ូ ឬ ប្រមាណនឹង ៧៤លានដុល្លារអាមេរិក ដើម្បីអោយកម្ពុជាយកថវិកានេះប្រើប្រាស់តាមគោលដៅរបស់ខ្លួន ។
យោងតាមសេចក្តីប្រកាសរបស់ក្រសួងសេដ្ឋកិច្ចនិងហិរញ្ញវត្ថុកម្ពុជានៅថ្ងៃទី២៨ វិច្ឆិកា ២០១៩នេះ ទឹកប្រាក់ប្រមាណ៧៤លានដុល្លារអាមេរិកនេះ ត្រូវអនុវត្តន៍ទៅលើគម្រោងធំៗពីរ ទី១ ទឹកប្រាក់ប្រមាណ ៣០លានអឺរ៉ូ ជាឥណទានសម្បទាន និង២លានអឺរ៉ូទៀតជាហិរញ្ញប្បទានឥតសំណង សម្រាប់ប្រើប្រាស់លើគម្រោងប្រសិទ្ធភាពថាមពល សម្រាប់ការផ្គត់ផ្គង់អគ្គិសនី ជនបទ ។ ទឹកប្រាក់៣០លានអឺរ៉ូនេះ នឹងត្រូវបានផ្ដល់តាមរយៈធនាគារអភិវឌ្ឍន៍ជនបទអាល្លឺម៉ង់ ។ គម្រោងមួយទៀតដែលអាល្លឺម៉ង់យល់ព្រមផ្ដល់ឥណទានជូនកម្ពុជានោះគឺ សម្រាប់អភិវឌ្ឍន៍ហេដ្ឋារចនាសម្ព័ន្ធជនបទនៅកម្ពុជា ដែលគម្រោងនេះ មានទឹកប្រាក់ប្រមាណ៣០លានអឺរ៉ូដែរ ហើយទឹកប្រាក់៥,១លានអឺរ៉ូទៀតនោះ គឺសកម្រាប់គាំទ្រការធ្វើហិរញ្ញប្បទានលើគម្រោងជាក់លាក់មួយចំនួនទៀត របស់រាជរដ្ឋាភិបាលកម្ពុជា ដែលគិតថាចាំបាច់ ។
ថ្លែងនៅក្នុងពិធីចុះហត្ថលេខាលើកិច្ចព្រមព្រៀងទាំងពីរនេះកាលពីព្រឹកថ្ងៃទី ២៨ វិច្ឆិកា លោកអូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុមានប្រសាសន៍ថា រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ គឺជាដៃគូរអភិវឌ្ឍន៍ប្រទេសអឺរ៉ុបទី២បន្ទាប់ពីរដ្ឋាភិបាលនៃសាធារណរដ្ឋបារាំង ដែលបានផ្ដល់ឥណទានសម្បទានដល់កម្ពុជា ដើម្បីរួមចំណែកក្នុងការគាំទ្រគោលនយោបាយអភិវឌ្ឍន៍ និងវិស័យអាទិភាពនានារបស់រាជរដ្ឋាផីបាលកម្ពុជា ។
លោករដ្ឋមន្ត្រីបានបន្តថា «ការបើកទ្វារឥណទានពីដៃគុរទ្វេរភាគីថ្មីៗបន្ថែមទៀត ជាពិសេសពីមានការអភិវឌ្ឍខ្ពស់នៃទ្វីបអឺរ៉ុប ដូចជាសាធារណរដ្ឋសហព័ន្ធអាល្លឺម៉ង់ និងសាធារណរដ្ឋបារាំងបានឆ្លុះបញ្ចាំងយ៉ាងច្បាស់ថា ដៃគូរអភិវឌ្ឍន៍សំខាន់ៗរបស់កម្ពុជា មានជំនឿមុតមាំថាកម្ពុជាកំពុងដើរនៅលើផ្លូវត្រូវ លើយុទ្ធសាស្ត្រនិងគោលនយោបាយគ្រប់គ្រងបំណុលសាធារណៈរដ្ឋរបស់ខ្លួន ប្រកបដោយភាពជឿជាក់ និងសមត្ថភាពគ្រប់គ្រាន់និងរឹងមាំ ។ លោកបានបន្តថា តាមរយៈការផ្ដល់ឥណទានសម្បទានរបស់ប្រទេសអាល្លឺម៉ង់ នៅពេលនេះ បានឆ្លុះបញ្ចាំងពីកិច្ចសហប្រតិបត្តិការជាមិត្តភាពរវាងកម្ពុជា និងអាល្លឺម៉ង់ ក្នុងការជួយគាំទ្រដល់កិច្ចអភិវឌ្ឍន៍សង្គម និងសេដ្ឋកិច្ចនៅកម្ពុជា ដោយភាគីមិត្តប្រកាន់ខ្ជាប់នូវគោលនយោបាយផ្ដល់ឥណទានសម្បទានរបស់ខ្លួន ឆ្លើតតបទៅនឹងសេចក្តីត្រូវការជាអាទិភាពរបស់កម្ពុជា និងបានបង្ហាញអោយឃើញនូវការជឿទុកចិត្តនិងការវាយតម្លៃខ្ពស់របស់អាល្លឺម៉ង់ក្នុងការចូលរួមយុទ្ធសាស្ត្រជាតិរបស់កម្ពុជា ។
យោងតាមប្រសាសន៍លោកហាវ រតនៈ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានថវិកានៃក្រសួងសេដ្ឋកិច្ចនិងហិរញ្ញវត្ថុ ក្នុងសន្និសីទសារព័ត៌មាននោះផងដែរ បានបញ្ជាក់ថា ក្រសួងចំនួនបួន ដែលមានការចំណាយលើការវិនិយោគសាធារណៈច្រើន ក្នុងនោះក៏មានក្រសួងអភិវឌ្ឍន៍ជនបទ ក្រសួងសាធារណៈការនិងដឹកជញ្ជូន ក្រសួងធនធានទឹក និងឧត្តុនិយម និង ក្រសួងកសិកម្មរុក្ខាប្រមាញ់និងនេសាទ ។
លោកបានបញ្ជាក់ថា «ការចំណាយទៅលើក្រសួងទាំងអស់នោះ គឺសុទ្ធតែបានផលមកវិញ សម្រាប់ប្រជាពលរដ្ឋដោយផ្ទាល់និងប្រយ៉ោលដូចជាការកសាងប្រឡាយ ហេដ្ឋរចនាសម្ព័ន្ធស្ពានស្ពានថ្នល់ ជាដើម ដែលសុទ្ធតែចាំបាច់ក្នុងការតភ្ជាប់តំបន់ជនបទទៅទីប្រជុំជន និងបង្កើនផលិតភាពដល់ប្រជាពលរដ្ឋក្នុងតំបន់ជនបទផងដែរ » ៕ កែសម្រួលដោយ ៖ សុឃាក់
ចែករំលែកព័តមាននេះ