រាជធានីភ្នំពេញ ៖ អតីតតារាសម្តែងជើងចាស់អ្នកនាង ម៉ៅ សុចាន់ធី បានវិលមកលេងស្រុកខ្មែរជាថ្មីម្តងទៀតហើយនៅថ្ងៃនេះ បន្ទាប់ពីអ្នកនាងបានផ្តាច់ចោលអាជីពសិល្បៈ ហើយចេញទៅរស់នៅសហរដ្ឋអាមេរិកអស់ជាច្រើនឆ្នាំមកនេះ។
ការវិលមកលេងស្រុកជាថ្មីនាពេលនេះ ត្រូវបានអ្នកនាងបង្ហាញនូវគោលបំណងដ៏សំខាន់ចំនួនពីរ ក្នុងនោះរឿងដែលសំខាន់បំផុត គឺពាក់ព័ន្ធទៅនឹងពាក្យបណ្តឹងរបស់ប្អូនស្រីរបស់នាងដែលកំពុងស្ថិតនៅក្នុងដៃព្រះរាជអជ្ញានៅឡើយ។
អ្នកនាង ម៉ៅ សុចាន់ធី បានអះអាងប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញថា ការវិលមកលេងស្រុកខ្មែរជាថ្មីនាពេលនេះ គឺក្រៅពីមកជួបស្វាមី និងបងប្អូននៅស្រុកកំណើតនោះ គឺអ្នកនាងចង់មកតាមមដានលើរឿងក្តីរបស់ប្អូនស្រីរបស់ខ្លួនផងដែរ។
អ្នកនាងបញ្ជាក់ថា ប្អូនស្រីរបស់ខ្លួនបានរងនូវភាពអយុត្តិធម៌ពាក់ព័ន្ធទៅនឹងបញ្ហាដីធ្លី ខណៈពេលការប្តឹងផ្តល់គ្នានៅតែអូសបន្លាយមិនទាន់ដោះស្រាយនៅឡើយ។ អ្នកនាងថា រហូតមកទល់ពេលនេះ រឿងក្តីប្អូនរបស់នាងកំពុងស្ថិតក្នុងដៃព្រះរាជអាជ្ញានៅឡើយ ដោយមិនទាន់បញ្ជូនដល់ដីតុលាការ ដើម្បីធ្វើការដោះស្រាយឲ្យបានចប់សព្វគ្រប់នៅឡើយទេ ក្នុងពេលដែលប្អូនស្រីរបស់នាងកំពុងរង់ចាំការដោះស្រាយដោយសមស្របឲ្យបានឆាប់ៗ។
យ៉ាងណាក៏ដោយ បើតាមអ្នកនាង ម៉ៅ សុចាន់ធី រហូតមកទល់ពេលនេះ អ្នកនាង និងប្អូនស្រីមិនទាមទារអ្វីក្រៅពីឲ្យតុលាកាត់សេចក្តីដោយយុត្តិធម៌ និងតម្លាភាពនោះឡើយ ខណៈពេលដែលប្អូនស្រីរបស់អ្នកនាង គឺជាជនរងគ្រោះមួយរូប។ អ្នកនាងជឿថា ក្រោមការដឹកនាំប្រកបដោយសុខសន្តិភាព និងការអភិវឌ្ឈន៍គ្រប់វិស័យពីសំណាក់សម្តេចតេជោនោះ គឺប្រព័ន្ធតុលាការក៏នឹងមានភាពកាន់តែល្អប្រសើរ ដោយការកាត់ក្តីដោយភាពយុត្តិធម៌។
ដោយឡែកពាក់ព័ន្ធទៅនឹងបញ្ហាគ្រួសារ នឹងសិល្បៈវិញ ត្រូវបានអ្នកនាង ម៉ៅ សុចាន់ធី លើកឡើងថា ខ្លួនកំពុងបានរៀបចំឯកដាក់ទៅកាន់ស្ថានទូតអាមេរិករួចហើយ ដើម្បីធានាស្វាមីរបស់អ្នកស្រីទៅរស់នៅអាមេរិកជុំគ្នា បន្ទាប់ពីអ្នកនាងបានរៀបការ ហើយបានប្រមាណជាងមួយឆ្នាំមកនេះ។ ការវិលមកនេះ អ្នកនាងក៏មានបំណងចង់បង្ហាញវត្តមានលើកញ្ចក់ទូរទស្សន៍នានាផងដែរ ប៉ុន្តែដោយសារតែអ្នកនាងមកមានរយៈពេលខ្លី ពោលគឺត្រឹមតែ៣សប្តាហ៍ប៉ុណ្ណោះ ហេតុនេះទំនងជាអ្នកនាងមិនមានឱកាសសម្រាប់ធ្វើរឿងនេះឡើយ។
យ៉ាងណាក៏ដោយ សម្រាប់វិស័យសិល្បៈនេះអ្នកនាងនៅតែស្រាឡាញ់ដដែល បើទោះបីជាពេលនេះអ្នកនាងមានវ័យជ្រេបន្តិចក៏ដោយ ប៉ុន្តែអ្នកនាងនៅតែមានបំណងចង់សម្តែងឡើងវិញដដែល៕ (កែសម្រួលដោយ ៖ បុប្ផា)
ចែករំលែកព័តមាននេះ