តើអ្នកតែងតែមានអារម្មណ៍ថាមិនមានថវិកាចាយវាយគ្រប់គ្រាន់មិនថា អ្នកប្តូរការងារប៉ុណ្ណាមែនទេ? ឬមួយក៏អ្នកមានអារម្មណ៍ថាខ្លួនប្រៀបដូចជាបរាជ័យទាក់ទិននឹងការគ្រប់គ្រងលុយ ឬការសម្រេចគោលដៅណាមួយក្នុងជីវិត?
វាជារឿងទូទៅទេដែលមនុស្សមានអារម្មណ៍ដូចនេះ ជាពិសេសនៅពេលដែលពួកគេចូលទៅកាន់ប្រព័ន្ធសង្គមនិងមើលឃើញមិត្តភក្តិ ឬអ្នកដទៃរស់នៅជីវិតឡូយឆាយខណៈដែលអ្នកត្រូវអង្គុយធ្វើការ ឬគ្រប់គ្រងអាជីវកម្មខ្លួនជារៀងរាល់ថ្ងៃ ។ ប៉ុន្តែវាមិនជួយអ្នកឡើយប្រសិនបើអ្នករក្សាទស្សនៈនេះ និងបន្តច្រណែនចង់បានជីវិតរបស់អ្នកដទៃ ។ ផ្ទុយមកវិញ មានពាក្យពេចន៍របស់អ្នកជោគជ័យខ្លះអាចជំរុញទឹកចិត្តអ្នកឲ្យសម្រេចគោលដៅរបស់អ្នកថែមទៀតផង ។ខាងក្រោមេនះ គឺជាប្រសាសន៍របស់លោកមហាសេដ្ឋី វ៉ារេន បាហ្វេ (Warren Buffett) ដែលអាចផ្លាស់ប្តូរជីវិតរបស់អ្នកបាន៖
១. អ្នកអង្គុយនៅក្រោមម្លប់នៅថ្ងៃនេះ ព្រោះនរណាម្នាក់ដាំដើមឈើមួយពីមុនមក៖
ភាពជោគជ័យមិនអាចកើតមានឡើងដោយឯកឯងបានទេ ។ អ្នកដែលជោគជ័យតែងតែត្រូវខិតខំអស់រយៈពេលជាយូរឆ្នាំ និងជួបប្រទះការបរាជ័យជាច្រើន ។ ភាពជោគជ័យនៅថ្ងៃនេះគឺជាការវិនិយោគរបស់មនុស្សម្នាក់តាំងពីយូរមកហើយទៅលើការសន្សំលុយ ការអប់រំ ការងារ និងមនុស្សដែលអាចជួយឲ្យខ្លួនអភិវឌ្ឍន៍បាន ។
២. ប្រសិនបើអ្នកអាចរកលុយពេលអ្នកកំពុងគេងបានទេ នោះអ្នកនឹងធ្វើការរហូតដល់ស្លាប់៖
អ្នកនឹងមិនអាចមានឯករាជ្យភាពផ្នែកហិរញ្ញវត្ថុ និងអាចសម្រេចគោលដៅក្នុងជីវិតបានទាំងស្រុងឡើយប្រសិនបើអ្នកត្រូវធ្វើការដើម្បីរកលុយ ។ ដោយហេតុដូចនេះទើបអ្នកត្រូវរកវិធីយកលុយមកធ្វើការឲ្យអ្នកវិញ ហើយអ្នកនឹងមានពេលវេលាដើម្បីធ្វើអ្វីមានន័យសម្រាប់ជីវិត ។
៣. បើអ្នកទិញអ្វីដែលអ្នកមិនត្រូវការ អ្នកនឹងត្រូវលក់អ្វីដែលអ្នកត្រូវការ៖
មនុស្សជាច្រើនចូលចិត្តទិញរបស់ដែលខ្លួនមិនត្រូវការចាំបាច់ ជាពិសេសទំនិញដែលមានការលក់បញ្ចុះតម្លៃជាដើម ។ ដោយហេតុដូចនេះទើបប្រាក់ខែរបស់ពួកគេមិនដែលនៅសល់ក្នុងគណនីឬហោប៉ៅ ហើយនៅពេលដែលមានអាសន្នចាំបាច់ត្រូវការលុយនោះ ពួកគេមានតែលក់របស់ដែលខ្លួនត្រូវការវិញឬដើរខ្ចីលុយអ្នកដទៃប៉ុណ្ណោះ ។
៤. ខ្ញុំតែងតែគិតថាខ្ញុំនឹងក្លាយជាអ្នកមាន៖
លោក បាហ្វេ តែងតែនិយាយប្រាប់ខ្លួនឯងជារៀងរាល់ថ្ងៃថាលោកនឹងក្លាយជាអ្នកមាន ហើយលោកជឿជាក់ថាលោកអាចធ្វើបាន ។ ទស្សនៈទាំងនេះបានជួយឲ្យលោកមើលរំលងគំនិតរបស់អ្នកដទៃដែលមិនចង់ឲ្យលោកល្អ និងជួយឲ្យលោកផ្តោតស្មារតីទៅលើការសម្រេចគោលដៅដែលលោកមាន ៕ កែសម្រួលដោយ ៖ សុឃាក់
ចែករំលែកព័តមាននេះ