ក៏ប៉ុន្តែប្រទេសអាល្លឺម៉ង់មិនត្រូវបានបំផ្លាញ និងកំទេចដូចពាក្យបញ្ជារបស់គាត់ទេ ។ កង
ទ័ពសម្ព័ន្ធមិត្តបានធ្វើដំណើររុលទៅមុខបានយ៉ាងលឿនមិនទុកពេលអោយបទបញ្ជារបស់ហ៊ីត្លែរដែលថា អោយកំទេចនោះអាចសំរេចបានឡើយ ។ ម្យ៉ាងទៀតឧត្តមសេនីយ៍មួយ ចំនួន
ក៏លែងស្តាប់បញ្ជាហ៊ីត្លែរទៀតដែរ ។
ដល់ថ្ងៃទី៣០ ខែមេសា ឆ្នាំ១៩៤៥ ពេលដែលកងទ័ពរុស្ស៊ីសំរុកចូលមកសល់តែប៉ុន្មានផ្ទះទៀតប៉ុណ្ណោះពីទីបញ្ជាការក្រោមដីរបស់គាត់ ហ៊ីត្លែរអង្គុយជាមួយនាងអេវ៉ាប្រោនជានារីដែលគាត់រស់នៅជាមួយហើយមានកាំភ្លើងខ្លីច្រកគ្រាប់ស្រេចមួយដើមនៅលើតុ ។ ពេលនោះហ៊ីត្លែរបានយករូបថតម្តាយមកឱបរួចក៏លេបថ្នាំពុលមានជាតិស្យានួ ហើយតាមបញ្ជារបស់ហ៊ីត្លែរ នាងអេវ៉ាប្រោនបានយកកាំភ្លើងបាញ់ហ៊ីត្លែរចំក្បាល រួចហើយទើបនាងអេវ៉ាប្រោនបានធ្វើឲ្យខ្លួនឯងបាត់បង់ជីវិតដោយលេបថ្នាំពុលព្រមពេលជាមួយគ្នានោះទៅ ។
ហ៊ីត្លែរបានបញ្ជាទុកជាស្រេចអោយគេយកប្រេងសាំងមកស្រោចលើខ្លួនរបស់គាត់ និងនាងអេវ៉ាប្រោន ហើយដុតទាំងពីរចោល ។ហ៊ីត្លែរបាននិយាយជាមុនថា ធ្វើដូច្នេះ ដើម្បីកុំអោយពួករុស្ស៊ីយកខ្លួនគាត់ទៅដាក់តាំងដូចគេតាំងរបស់បេនីតូមូសូលីនីនៅអ៊ីតាលីកាលពីប៉ុន្មានថ្ងៃមុននេះ ។ ជីវិតរបស់ហ៊ីត្លែរក៏បានបញ្ចប់ត្រឹមនេះ ។ អាណាចក្រ១០០០ឆ្នាំដែលហ៊ីត្លែរសន្យាចំពោះប្រជាជនអាល្លឺម៉ង់នោះ ក៏រលាយសាបសូន្យទៅជាមួយគំនរផេះផង់នៃក្រុងប៊ែរឡាំងដែរ ។
ហ៊ីត្លែរបានលើកស្ទួយប្រទេសអាល្លឺម៉ង់អោយឡើងដល់អំណាចកំពូល ។ ហ៊ីត្លែរខ្លួនឯង
មានអំណាចផុតលេខ ។ ពេលហ៊ីត្លែរនិយាយម្តងៗប្រជាជាតិទាំងមូលត្រូវគេប្រមូលអោយ
ទៅគោរពធ្វើតាមហ៊ីត្លែរ ក៏ប៉ុន្តែមិនដូចមេដឹកនាំធំៗផ្សេងៗទៀតដែលធ្លាប់ល្បីល្បាយមកហើយទេហ៊ីត្លែរបានលាចាកលោកនេះឬលាចាកប្រទេសអាល្លឺម៉ង់ទៅ ដោយមិនទុកអ្វីអោយមានសភាពប្រសើរជាងពេលដែលខ្លួនលេចមុខដំបូងនៅក្នុងទំព័រប្រវត្តិសាស្ត្រនោះឡើយ ។ ប្រហែលជាមកពីទិសដៅក្នុងជីវិតរបស់ហ៊ីត្លែរវាចង្អៀតចង្អល់ពេកទេដឹង ។
គ្មានអ្វីស្រពេចស្រពិលទេ ទិសដៅជីវិតរបស់ហ៊ីត្លែរ គឺថាមានតែហ៊ីត្លែរមួយគត់ក្នុងឋានៈជាអ្នកដឹកនាំ “ពូជសាសន៍ធ្វើជាម្ចាស់គេ”របស់អាល្លឺម៉ង់ មានតែហ៊ីត្លែរម្នាក់ប៉ុណ្ណោះជាអ្នកផ្ចាញ់អ្នកគ្រប់គ្រងពិភពលោក ។
នៅទីបញ្ចប់ទិសដៅបែបនេះវាមានសភាពចង្អៀតហួសហេតុពេកមិនអាចសម្រេចជោគជ័យបានឡើយ ។ ពិភពលោកមិនសុខចិត្តនៅស្ងៀមឱបដៃអោយវត្ថុបំណងចង្អៀត ចង្អល់បែបនេះសម្រេចជោគជ័យបានឡើយ ៕
បញ្ជាក់ ៖ នេះវគ្គទី១ អាដុលហ្វ៍ ហ៊ីត្លែរ មេដឹកនាំដ៏មហាវិនាសកម្មក្នុងពិភពលោក
វគ្គទី២ ហ៊ីត្លែរប្រឈមនឹងជីវិតយុវវ័យដ៏វេទនា
វគ្គទី៣ ហ៊ីត្លែរប្រកាន់យកស្ទីលដឹកនាំដែកថែប
វគ្គទី៤ ឱកាសនាំអោយហ៊ីត្លែរក្លាយជាមេដឹកនាំអាល្លឺម៉ង់
វគ្គទី៥ ហ៊ីត្លែរលេងសន្លឹកបៀរវិបត្តិសេដ្ឋកិច្ចដើម្បីអំណាច
វគ្គទី៦ ហ៊ីត្លែរចាប់ផ្តើមក្លាយជាមេដឹកនាមផ្តាច់ការ
វគ្គទី៧ ហ៊ីត្លែរចាប់ផ្តើមផែនការឈ្លានពានអឺរ៉ុប
វគ្គទី៨ ហ៊ីត្លែរមិនលើកលែងសូម្បីតែម្តាយ និងកូនក្មេងតូចៗ
វគ្គទី៩ ទីបំផុតអំពើកាចរបស់ហ៊ីត្លែរមិនអាចឈ្នះអំពើល្អ
ចែករំលែកព័តមាននេះ