ខេត្តបន្ទាយមានជ័យ៖ បន្ទាប់ពីសមត្ថកិច្ចចម្រុះឆ្មក់ចូលទីតាំងមួយកន្លែង កាលពីរសៀលថ្ងៃទី២៧ វិច្ឆិកា ហើយរកឃើញស្រាក្លែងបន្លំម៉ាកយីហោរំលោភកម្មសិទ្ធិបញ្ញាជិត៣០០០ដប និងសម្ភារផលិតមួយចំនួនផងនោះ នៅព្រឹកថ្ងៃទី២៨ វិច្ឆិកា សមត្ថកិច្ចចម្រុះដដែល បានធ្វើការឆែកឆេរជាបន្តលើ៤ទីតាំងផ្សេងទៀត…
ខេត្តបន្ទាយមានជ័យ៖ បន្ទាប់ពីសមត្ថកិច្ចចម្រុះឆ្មក់ចូលទីតាំងមួយកន្លែង កាលពីរសៀលថ្ងៃទី២៧ វិច្ឆិកា ហើយរកឃើញស្រាក្លែងបន្លំម៉ាកយីហោរំលោភកម្មសិទ្ធិបញ្ញាជិត៣០០០ដប និងសម្ភារផលិតមួយចំនួនផងនោះ នៅព្រឹកថ្ងៃទី២៨ វិច្ឆិកា សមត្ថកិច្ចចម្រុះដដែល បានធ្វើការឆែកឆេរជាបន្តលើ៤ទីតាំងផ្សេងទៀត ដែលសមត្ថកិច្ចដាក់កម្លាំងយាមកាពារពេញ១យប់ទៅហើយ ។
ទីតាំងទាំង៤នេះ ៣ទីតាំងស្ថិតក្នុងទឹកដីកាស៊ីណូ និង១ទីតាំងទៀតស្ថិតចំណុចផ្លូវដើមពុទ្រា ក្នុងភូមិក្បាល ស្ពាន១ សង្កាត់ប៉ោយប៉ែត ក្រុងប៉ោយប៉ែតដូចគ្នា ។ មកទល់នឹងម៉ោង៣រសៀលថ្ងៃដដែល សមត្ថកិច្ចធ្វើការឆែកឆេរបានចំនួន២ទីតាំង ដោយទីតាំងទី១ស្ថិតនៅចំណុចបរិវេណអតីតទឹកដីកាស៊ីណូផ្កាយ៥ រកឃើញស្រាចម្រុះគ្មានបិទម៉ាក និងបិទម៉ាកថ្មីក្លែងក្លាយ ព្រមទាំងស្ទិកឃ័រពន្ធគយក្លែងក្លាយបិទលើដបស្រាជាច្រើនសន្ធឹកសន្ធាប់ ។
ពេលសមត្ថកិច្ចសាកសួរនិងឲ្យបង្ហាញឯកសារពាក់ព័ន្ធ តំណាងទីតាំងនោះឆ្លើយតបថាមិនមានឯកសារអ្វីឡើយ ទើបសមត្ថកិច្ចសម្រេចដកហូតវត្ថុតាងស្រាចម្រុះ១៦មុខ សរុប២២១ដប ក្នុងនេះក៏រកឃើញមីញ៉ែតឬតែមគយក្លែងបន្លំជាច្រើនទៀតផងសុទ្ធតែជាស្នាដៃជនទុច្ចរិតមុខរបរ ។ទូដែកមួយសង្ស័យផ្ទុករបស់សម្ងាត់អ្វីមួយត្រូវបានតំណាងទីតាំងឆ្លើយថាគ្មានសោចាក់ត្រូវសមត្ថកិច្ចឃ្លុំបេ និងដឹកយកទៅ ។ តាមប្រភពព័ត៌មានថា ទីតាំងខាងលើកាលពីយប់ថ្ងៃទី២៧ វិច្ឆិកា មានការលួចគាស់ជញ្ជាំងផ្នែកខាងក្រោយលួចជញ្ជូនស្រាចេញ លុះដល់ម៉ោងជាង២រំលងអធ្រាត្រ ឈានចូលព្រឹកថ្ងៃទី២៨ វិច្ឆិកា ទើបសមត្ថកិច្ចដឹង ខណៈពេលដែលទៅបត់ជើងតូចនៅផ្នែកខាងក្រោយកន្លែងកើតហេតុ ។
ស្រាដែលជនសង្ស័យក្នុងហាងនេះ ជញ្ជូនចេញរួចដឹកតាមរថយន្ត១គ្រឿង ម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខបាត់ដំបង2B.3344នោះ ត្រូវសមត្ថកិច្ចប្រើនីតិវិធីឲ្យយកត្រឡប់មកទីតាំងដើមវិញហើយពេលឆែកឆេរឃើញសុទ្ធតែស្រាជាច្រើនដប ។ យ៉ាងណាក៏ដោយតំណាងទីតាំងនិងគូកនទាំងអស់៣នាក់ ត្រូវបានសមត្ថកិច្ចឃាត់ខ្លួនយកទៅសាកសួរនិងយកទាំងរថយន្តដឹកជញ្ជូនរំដោះស្រានោះផងដែរ ។
ជនសង្ស័យទាំង៣នាក់រួមមាន១-ឈ្មោះ សាន្ត សុត្ថាវុធ ភេទប្រុស អាយុ៤១ឆ្នាំ (តំណាងទីតាំង) ២-ឈ្មោះ គឹង ឆេងស្រុី ភេទប្រុស អាយុ៣៧ឆ្នាំ និង៣-ឈ្មោះ ពន្លឺ ចន្ត្រា ភេទប្រុស អាយុ៣៤ឆ្នាំ ។ ជនសង្ស័យត្រូវសមត្ថកិច្ចនាំចូលរថយន្តខាងលើ ដោយសមត្ថកិច្ចជាអ្នកបើកបរ ឯសមត្ថកិច្ចខ្លះទៀតជិះអមជនសង្ស័យទាំងនេះ ខណៈស្រាខ្លះដែលសង្ស័យថាជាផលិតផលក្លែងក្លាយ មិនទាន់រឹបអូសអស់ត្រូវសមត្ថកិច្ចរក្សាទុកនៅកន្លែងកើតហេតុដដែលដោយបិទឃ្លុំបេទ្វារមិនឲ្យនរណាចេញចូលឡើយ ។
ដោយឡែក ទីតាំង២ទៀត នៅក្នុងទឹកដីកាស៊ីណូផារ៉ាម៉ែក សមត្ថកិច្ចត្រួតពិនិត្យបានតែមួយទីតាំងទេ គឺហាងប៉ារីសវីស្គីហ្សប រកឃើញស្រាក្លែងបន្លំម៉ាកយីហោ៤១ដប ខណៈទីតាំងមួយទៀតដែលនៅក្បែរនោះជាប់សោមិនអាចចូលត្រួតពិនិត្យបាន ។ ចំណែកទីតាំងទី4ចំណុចផ្លូវដើមពុទ្រាជិតបារ៉ាស់ នគរបាលអន្តោប្រវេសន៍ច្រកចេញចូលកាស៊ីណូមកទល់ម៉ោងជិត៤រសៀលនេះ សមត្ថកិច្ចមិនទាន់ចូលត្រួតពិនិត្យបាននៅឡើយទេ ដោយសារគ្មានសោចាក់ដូចទីតាំងទី៣ដែរ ។
គួរបញ្ជាក់ថា យោងការសាកសួរមន្ត្រីសមត្ថកិច្ចចម្រុះប្រាប់ថាប្រតិបត្តិការឆែកឆេរទីតាំងផលិតនិងលក់ស្រាជាបន្តបន្ទាប់នេះយោងលើក្រុមហ៊ុននាំចូលផ្តាច់មុខគេដាក់ពាក្យបណ្តឹងហើយសមត្ថកិច្ចអះអាងថា មុនឈានដល់ការឆ្មក់ចូលគឺសមត្ថកិច្ចបានតាមដានអស់រយៈពេលជាច្រើនខែផងដែរ ។នៅថ្ងៃទី២៧ វិច្ឆិកា ទីតាំងលួចលាក់ធ្វើស្រាក្លែងបន្លំយីហោឬក្លែងក្លាយរំលោភកម្មសិទ្ធបញ្ញាកាលពីរសៀលថ្ងៃទី២៧ វិច្ឆិកា សមត្ថកិច្ចចម្រុះនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយនគរបាលជំនាញនៃស្នងការដ្ឋាននគរបាលខេត្តបន្ទាយមានជ័យ និងក្រុងប៉ោយប៉ែតបានឃាត់ខ្លួនមនុស្ស២នាក់រកឃើញស្រាចម្រុះជិត៣០០០ដប និងសម្ភារវេចខ្ចប់ជាច្រើនទៀត ។
ជនសង្ស័យដែលសមត្ថកិច្ចឃាត់ខ្លួនរួមមានឈ្មោះ ថៃ ម៉ាឡា ភេទប្រុស ជាម្ចាស់ទីតាំងនិងឈ្មោះ សេន សាន់ ភេទប្រុស អាយុ១៨ឆ្នាំ ជាកម្មករ ។ សមត្ថកិច្ចរឹបអូសបានស្រាក្រហមក្លែងបន្លំម៉ាកសញ្ញាpenfolds Bin2 Bin8 Bin707 Bin128 Bin407 Bin389 ចំនួន២៤៨កេស ស្មើនឹង១៤៨៨ដប ស្រាក្រហម៨៨ ចំនួន១៣២កេស ស្មើនឹង១៥៨៤ដប សំបកប្រអប់ចំនួន៩៣ដុំ ស្មើនឹង៩៣០កេស ស្ទិឃ័រ៥២ដុំ ស្មើនឹង៥២០០សន្លឹក និងសំបកកេស៤០០ដុំ ស្មើនឹង១០០០០កេស ក្លែងកម្មសិទ្ធិបញ្ញា ។
ករណីឆ្មក់ចូលបង្ក្រាបទីតាំងខាងលើសមត្ថកិច្ចអះអាងថា បានតាមដានអស់ជាច្រើនខែមកហើយៗក៏មានក្រុមហ៊ុននាំចូលផ្តាច់មុខបានដាក់ពាក្យបណ្តឹង ។ ក្នុងប្រតិបត្តិការនេះមានវត្តមានតំណាងក្រុមហ៊ុន មានសិទ្ធិនាំចូលផ្តាច់មុខមួយចំនួនរួមទាំងក្រុមហ៊ុនអ៊ែតវូដផង ។ ទាំងជនសង្ស័យនិងវត្ថុតាងក្រោយបិទបញ្ចប់ការឆែកឆេរសមត្ថកិច្ចបានបញ្ជូនទៅការិយាល័យជំនាញនៃស្នងការដ្ឋាននគរបាលខេត្តដើម្បីសាកសួរនិងបន្តនីតិវិធី ។
សូមបញ្ជាក់ថាស្រាដែលចាត់ទុកថាក្លែងបន្លំម៉ាកនេះមានប្រភេទស្រាក្រហម និងស្រាលាយសូដា ប្រភេទវីស្គី ។ ឱ ! អ្នកនិយមស្រាក្រហម ស្រាវីស្គីទាំងឡាយអើយ…បើជនទុច្ចរិតបន្លំផលិតក្លែងក្លាយយ៉ាងនេះ តើគួរប្រថុយផឹកបន្តទៀតឬអត់ ?ចំណែកអ្នកច្បាប់ខ្លះដែលចោលស្រាធុននេះមិនបាន ដែលផឹកចូលក្នុងរាងកាយច្រើនមកហើយ តើត្រូវផ្តន្ទាទោសឱ្យសងសុខភាពកម្រិតណាទៅ ?
ព័ត៌មានចុងក្រោយ
ដោយសារទីតាំងទី៤ សង្ស័យថា ជារបស់ឈ្មោះ ថៃ ម៉ាឡា ហៅតុលា ជាម្ចាស់ទីតាំងដែលសមត្ថកិច្ចបង្ក្រាបកាលពីថ្ងៃទី២៧ វិច្ឆិកាហើយទីតាំងនេះជាប់សោផង លោកព្រះរាជអាជ្ញាបញ្ជាឲ្យយកជនសង្ស័យខាងលើពីស្នងការដ្ឋាននគរបាលខេត្តមកសាកសួរ តែពេលទៅដល់ទីតាំងទី៤នេះ ឈ្មោះខាងលើអះអាងថាទីតាំងនេះខ្លួនបានសាងទៅឲ្យគេលក់បន្ត៣ទៅ៤ខែហើយ ។ ដោយសារម្ចាស់ថ្មីមិនចេញមុខ លោកព្រះរាជ អាជ្ញាបញ្ជាឲ្យសមត្ថកិច្ចហៅជាងធ្វើសោបើកទ្វារដើម្បីត្រួតពិនិត្យតែម្តង ។
លទ្ធផល ដោយមានការចូលរួមពីតំណាងក្រុមហ៊ុននាំចូលផ្តាច់មុខ ដូចជាផឹនហ្វូលនិងអ៊ែតវូដ ទីតាំងមួយនេះរកឃើញស្រាក្លែងបន្លំយីហោជាច្រើនប្រភេទក្នុងនោះរួមមានស្រាចម្រុះម៉ាក១១៧ដប ស្រាក្រហម penfolds222ដប ។គួរបញ្ជាក់ថា លើដបស្រាទាំងនេះមានបិទមីញ៉ែតឬតែមគយក្លែងបន្លំ ភាគច្រើនខណៈមន្ត្រីគយនិងរដ្ឋាករប្រើពិលដើម្បីឆ្លុះមើលតាមដបនីមួយៗ ៕
ចែករំលែកព័តមាននេះ