ខេត្តប៉ៃលិន ៖ បើតាមរបាយការណ៍ពីសមត្ថកិច្ចនគរបាលក្រុងប៉ៃលិនបានឲ្យដឹងថា មួយរយៈនេះមានប្រជាពលរដ្ឋរាយការណ៍មកសមត្ថកិច្ចថា មានករណីមនុស្សប្រុសស្រីល្បែងស៊ីសងក្នុងតាមភូមិ ទើបកម្លាំងនគរបាលចុះទៅបង្ក្រាបភ្លាមៗតែម្តង។ ជាក់ស្តែង កម្លាំងសមត្ថកិច្ចបានចុះបង្ក្រាបករណីលេងល្បែងស៊ីសងដោយខុសច្បាប់បានចំនួន២ករណីផ្សេងគ្នាក្នុងថ្ងៃតែមួយ និងឃាត់ខ្លួនអ្នកលេងល្បែងសរុបចំនួន១២នាក់ ។
ករណីទី១-កាលពីវេលាម៉ោង១រសៀលថ្ងៃទី២៨ ខែវិច្ឆិកា ឆ្នាំ២០១៩ សមត្ថកិច្ចបានចុះបង្ក្រាបករណីល្បែងស៊ីសងខុសច្បាប់នៅចំណុចផ្ទះរបស់ឈ្មោះ ជួ វិបុត្រ ភេទប្រុស អាយុ៤៣ឆ្នាំ មុខរបរលក់ដូរ ស្ថិតក្នុងភូមិទួលល្វា សង្កាត់ទួលល្វា ក្រុងប៉ៃលិន ខេត្តប៉ៃលិន ព្រមទាំងឃាត់ខ្លួនអ្នកលេងល្បែង និងម្ចាស់ផ្ទះបានចំនួន៤នាក់ផងដែរ ។ រីឯវត្ថុតាងដកហូតបានរួមមាន កន្ទេលចំនួន២, បៀមួយហ៊ូ, ចានជ័រចំនួន២ និងលុយលើកម្រាលចំនួន២៣.៥០០រៀល ។
ក្រុមអ្នកលេងល្បែងដែលត្រូវសមត្ថកិច្ចចាប់ឃាត់ខ្លួនរួមមាន ១-ឈ្មោះ សឿន ខុន ភេទស្រី អាយុ៦០នាក់ មុខរបរមេផ្ទះ រស់នៅភូមិទួលស្រឡៅ សង្កាត់ទួលល្វា ក្រុងប៉ៃលិន ខេត្តប៉ៃលិន ២-ឈ្មោះ រ៉េន ម៉ៅ ភេទស្រី អាយុ៤០ឆ្នាំ មុខរបរកសិករ រស់នៅភូមិអូរតាពុកក្រោម សង្កាត់ទួលល្វា ៣-ឈ្មោះ លី ភ័ស្ស ភេទស្រី អាយុ៣៥ឆ្នាំ មុខរបរមេផ្ទះ រស់នៅភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ៤-ឈ្មោះ ជួ វិបុត្រ ជាម្ចាស់ផ្ទះ ភេទប្រុស អាយុ៤៣ឆ្នាំ មុខរបរលក់ដូរ រស់នៅភូមិទួលល្វា សង្កាត់ទួលល្វា ក្រុងប៉ៃលិន ។
ចំណែកករណីទី២-កាលពីវេលាម៉ោង១និង៥០នាទីរសៀលថ្ងៃទី២៨ ខែវិច្ឆិកា ឆ្នាំ២០១៩ កម្លាំងជំនាញផ្នែកព្រហ្មទណ្ឌនៃអធិការដ្ឋាននគរបាលក្រុងប៉ៃលិនបានសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ប៉ៃលិន ចុះបង្ក្រាបករណីលេងល្បែងស៊ីសងខុសច្បាប់ នៅចំណុចក្នុងចំការតាង៉ែន ស្ថិតក្នុងភូមិអូរតាប្រាង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដោយឃាត់ខ្លួនអ្នកលេងល្បែងចំនួន៨នាក់ និងដកហូតវត្ថុតាងរួមមាន បៀចំនួន២ហ៊ូ, ប្រាក់១២០.០០០រៀល និងសម្ភារៈសម្រាប់លេងល្បែងមួយចំនួនទៀត ។
ក្រុមអ្នកលេងល្បែងចំនួន៨នាក់ខាងលើរួមមាន ១-ឈ្មោះ ណា រដ្ឋ ភេទស្រី អាយុ៥០ឆ្នាំ មុខរបរមេផ្ទះ រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ២-ឈ្មោះ អ៊ុំ សេង ភេទស្រី អាយុ៥៥ឆ្នាំ មុខរបរមេផ្ទះ រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ៣- ឈ្មោះ សៅ ធុច ភេទស្រី អាយុ៤៩ឆ្នាំ មុខរបរមេផ្ទះ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ៤-ឈ្មោះ សូត្រ សឿន ភេទស្រី អាយុ២៩ឆ្នាំ មុខរបរមេផ្ទះ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ៥-ឈ្មោះ ឃឹម សារ៉ាត់ ភេទស្រី អាយុ៤០ឆ្នាំ មុខរបរមេផ្ទះ រស់នៅភូមិអូរស្ងួត សង្កាត់បរយ៉ាខា ក្រុងប៉ៃលិន ៦-ឈ្មោះ អេង គឹមលាភ ភេទស្រី អាយុ៣២ឆ្នាំ មុខរបរមេផ្ទះ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ៧- ឈ្មោះ លីម ម៉ី ភេទស្រី អាយុ៤០ឆ្នាំ មុខរបរមេផ្ទះ រស់នៅភូមិវត្ត សង្កាត់ប៉ៃលិន ក្រុងប៉ៃលិន និង៨-ឈ្មោះ ចាក់ ស្រី ភេទស្រី អាយុ៦១ឆ្នាំ មុខរបរមេផ្ទះ រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ។
បច្ចុប្បន្ន ក្រុមអ្នកលេងល្បែងទាំង១២នាក់ខាងលើ ត្រូវបានសមត្ថកិច្ចអនុវត្តតាមនីតិវិធីដោយធ្វើការអប់រំ និងធ្វើកិច្ចសន្យា ដោយមានអ្នកធានាត្រឹមត្រូវផងដែរ ទើបអនុញ្ញាតឱ្យត្រឡប់ទៅផ្ទះវិញ ៕ (កែសម្រួលដោយ ៖ ធីតា)
ចែករំលែកព័តមាននេះ