រាជធានីភ្នំពេញ៖ តួលេខសម្រាប់ការបញ្ជាទិញទៅលើសម្ភារៈធ្វើដំណើរនិងកាបូបមកពេលនេះមិនទាន់មាននោះទេ ហើយការនាំចេញក្នុងរយៈពេល៣ឆ្នាំចុងក្រោយនេះគឺពុំមានការកើនឡើងនោះទេ ។ នេះជាការលើកឡើងរបស់អគ្គលេខាធិការសមាគមរោងចក្រកាត់ដេរនៅកម្ពុជា ឬហៅកាត់ថាGMAC បានឱ្យដឹងនៅថ្ងៃទី២៥ ខែវិច្ឆិកាម្សិលមិញនេះ។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជាមានប្រសាសន៍ថា «តួលេខនៃការបញ្ជាទិញនេះយើងអត់ទាន់មានទេ ទាល់តែសួរខាងគយ។ រាល់ដងយើងយកតួលេខខាងគយ។ បើតាមយើងដឹងកាល៣ឆ្នាំកន្លងមកអត់មានកើនឡើងទេ»។ លោកបានសង្កត់ធ្ងន់ថា «កន្លងមកយើងអត់មានតួលេខជាក់ស្តែងទេទាក់ទងនិងការនាំចេញសម្ភារៈធ្វើដំណើរនិងកាបូប ប៉ុន្តែបើយើងដឹងកាលពីឆ្នាំ២០១៨នាំចេញមានទឹកប្រាក់ប្រមាណ៥៦០ លានដុល្លារអាមេរិកតែនៅឆ្នាំ២០១៩នេះយើងអត់ទាន់មានតួលេខពិតប្រាកដទេ។តាមតួលេខឆ្នាំ២០១៨កន្លងទៅសម្ភារៈធ្វើដំណើរនិងការបូបនាំចេញទៅសហរដ្ឋអាមេរិក៦៥% និង៣៥%នាំទៅទីផ្សារអឺរ៉ុប»។ លោក ខេន លូ បានលើកឡើងថា មកដល់សព្វថ្ងៃរោងចក្រកាត់ដេរដែលជាសមាជិកសមាគមផលិតសម្រាប់ធ្វើការនាំចេញសរុបមានចំនួន ៤៨៥រោងចក្រ ហើយប្រៀបទៅនឹងឆ្នាំកន្លងមកវាកើនឡើងជាង២០រោងចក្រ។រោងចក្រផលិតកាបូបបានចូលជាសមាជិកមាន៣៣រោងចក្រ។
ទាក់ទងនិវិស័យកាត់ដេរនៅកម្ពុជាថ្មីនេះ តំណាងរាជរដ្ឋាភិបាលកម្ពុជា សមាគមរោងចក្រកាត់ដេរនៅកម្ពុជានិង ការអន្តរជាតិខាងការងារ(ILO) បានចុះហត្ថលេខាលើអនុស្សរណៈនៃការយោគយល់គ្នា ស្តីពីគម្រោងរោងចក្រកាន់តែប្រសើរនៅកម្ពុជា សម្រាប់ឆ្នាំ២០២០-២០២២។ការចុះអនុស្សរណៈនេះបើតាមលោក ខេនលូ មានប្រសាសន៍ថា «យើងចុះអនុស្សរណៈរវាងរាជរដ្ឋាភិបាល សមាគមរោងចក្រកាត់ដេរនៅកម្ពុជា និងILOកាលថ្មីៗនេះ ពុំមែនគិតគូពីការបញ្ជាទិញនោះទេ យើងគ្រាន់ឱ្យការផលិតកាបូបទទួលបានការគោរពច្បាប់ការងារយើងស្របទៅនិងច្បាប់ការងារអន្តរជាតិ»។
លោក ងុយ រិទ្ធ អនុរដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថាគម្រោងរោងចក្រកាន់តែប្រសើរនេះ នឹងចាប់ផ្តើមអនុវត្តន៍នៅខែមករាឆ្នាំ២០២០ដល់ចុងឆ្នាំ២០២២។គោលបំណងសំខាន់នៃគម្រោងនេះគឺដើម្បីពង្រឹងលក្ខខណ្ឌការងារល្អប្រសើរ ដែលជាចំណុចស្នូលក្នុងការធានានូវការអនុវត្តសិទ្ធិសេរីភាពនៃអង្គការវិជ្ជាជីវៈលក្ខខណ្ឌការងារ ទំនាក់ទំនងវិជ្ជាជីវៈដែលជាគោលនយោបាយស្នូលរបស់រាជរដ្ឋាភិបាលកម្ពុជាដែលបានអនុវត្តតាំងពីឆ្នាំ១៩៩៩ ក្នុងពេលដែលរាជរដ្ឋាភិបាលកម្ពុជាបានចុះកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ក្នុងការផ្សារភ្ជាប់លក្ខខណ្ឌការងារទៅនឹងបទដ្ឋានការងារអន្តរជាតិ។
លោកបានបន្តថា គម្រោងនេះនឹងបន្តឃ្លំមើលលក្ខខណ្ឌការងារនៅកម្ពុជា ដែលជាគម្រោងវាយតម្លៃដោយឯករាជ្យសម្រាប់អ្នកបញ្ជាទិញទាំងឡាយពីកម្ពុជា ដែលគេប្រើប្រាស់របាយការណ៍ក្នុងគម្រោងនេះ ក្នុងការផ្តល់ការបញ្ជាទិញពីកម្ពុជា ដោយគេយល់ឃើញថាប្រទេសកម្ពុជាអនុវត្តបានល្អនូវស្តង់ដារការងារលក្ខណៈអន្តរជាតិ ដែលយើងធ្លាប់អនុវត្តដោយជោគជ័យជាង២០ឆ្នាំទៅនេះ។
បើតាមលោក អនុរដ្ឋលេខាធិការ បានឲ្យដឹងថា « សម្រាប់គម្រោងលើកនេះយើង បានពង្រីកទៅលើបទដ្ឋានការងារអន្តរជាតិឱ្យស្របតាមច្បាប់ការងាររបស់យើងនេះទៅលើវិស័យដែលគេហៅថាសម្ភារៈធ្វើដំណើរនិងកាបូប។អនុស្សរណៈនេះបានគ្របដណ្តប់ទៅលើបណ្តារោងចក្រ សហគ្រាសទាំងឡាយណាដែលផលិតសម្រាប់នាំចេញនៅសម្ភារៈធ្វើដំណើរនិងកាបូបទាំងនេះ ធ្វើការអនុវត្តឱ្យបានត្រឹមត្រូវទៅលើច្បាប់ស្តីពីការងារនៃព្រះរាជាណាចក្រកម្ពុជាក៏ដូចជាស្របទៅនិងបទដ្ឋានស្តង់ដាអន្តរជាតិ»។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថ្មីៗនេះថា «គោលនយោបាយផ្សារភ្ជាប់ពាណិជ្ជកម្មជាមួយបទដ្ឋានការងារយើងបានបង្កើតនូវទំនុកទុកចិត្តដល់អ្នកបញ្ជាទិញម៉ាកយីហោល្បីៗក្នុងការដាក់បន្ថែមការបញ្ជាទិញផលិតផល សម្លៀកបំពាក់ និងវាយនភ័ណ្ឌនៅកម្ពុជាពីមួយឆ្នាំ ទៅមួយឆ្នាំកាន់តែច្រើនឡើង។ ជាក់ស្តែងការនាំចេញរបស់កម្ពុជាក្រោមប្រព័ន្ធអនុគ្រោះទៅកាន់ទីផ្សារបរទេសនៅឆ្នាំ២០០១មានទឹកប្រាក់១.១៨៨លានដុល្លារអាមេរិកកើនរហូតដល់ទឹកប្រាក់សរុប១២.៨៩៥លានដុល្លារអាមេរិកនៅឆ្នាំ២០១៨កន្លងទៅនេះ។ ការនាំចេញផលិតផលសម្លៀកបំពាក់និងវាយនភ័ណមានកំណើនគួរឱ្យកត់សម្គាល់ដែលកាលពីឆ្នាំ២០០១មានទឹកប្រាក់ត្រឹមតែ៨២៨លានដុល្លារអាមេរិក បានកើនឡើងដល់៧.៧៧៦លានដុល្លារអាមេរិកនៅឆ្នាំ២០១៨»៕ កែសម្រួលដោយ ៖ សុឃាក់
ចែករំលែកព័តមាននេះ