រាជធានីភ្នំពេញ ៖ ដើម្បីផ្តល់ឱកាសដល់រដ្ឋបាលថ្នាក់ក្រោមជាតិ ធ្វើការអភិវឌ្ឍមូលដ្ឋានរាជរដ្ឋាភិបាលបានសម្រេចទម្លាក់កញ្ចប់ថវិកាប្រមាណជាង៣ម៉ឺន៥ពាន់ដុល្លារអាមេរិកដល់ជាង៧ម៉ឺនដុល្លារ ទៅដល់ឃុំ-សង្កាត់ ចាប់ពីឆ្នាំ២០២០ដល់ឆ្នាំ២០២៣ ។ លោកឧបនាយករដ្ឋមន្ត្រី អូន ព័ន្ធមុនីរ័ត្ន…
រាជធានីភ្នំពេញ ៖ ដើម្បីផ្តល់ឱកាសដល់រដ្ឋបាលថ្នាក់ក្រោមជាតិ ធ្វើការអភិវឌ្ឍមូលដ្ឋានរាជរដ្ឋាភិបាលបានសម្រេចទម្លាក់កញ្ចប់ថវិកាប្រមាណជាង៣ម៉ឺន៥ពាន់ដុល្លារអាមេរិកដល់ជាង៧ម៉ឺនដុល្លារ ទៅដល់ឃុំ-សង្កាត់ ចាប់ពីឆ្នាំ២០២០ដល់ឆ្នាំ២០២៣ ។
លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានឲ្យ ដឹងក្នុងសម័យប្រជុំពេញអង្គរដ្ឋសភា នាព្រឹកថ្ងៃទី២៦ ខែវិច្ឆិកាថា នៅក្នុងសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១០រាជរដ្ឋាភិបាលសម្រេចទម្លាក់ថវិកាជាតិដល់ថ្នាក់រដ្ឋបាលរាជធានី-ខេត្ត និងថ្នាក់រដ្ឋបាលឃុំ-សង្កាត់នីមួយៗនឹងកើនឡើង២ដង ដោយនៅ ឆ្នាំ២០២០ពីប្រមាណ១.០៤២លានរៀល ឬស្មើនឹងប្រមាណ៣ម៉ឺន៥ពាន់ដុល្លាអាមេរិក ជាមធ្យមក្នុងមួយឆ្នាំ ទៅប្រមាណជាង៧ម៉ឺនដុល្លាអាមេរិកជាមធ្យមក្នុងមួយឆ្នាំសម្រាប់ឃុំ-សង្កាត់នីមួយៗ ។
ជាមួយគ្នានេះ លោកឧបនាយករដ្ឋមន្ត្រី ក៏បានឲ្យដឹងថា ចំណូលចរន្តថវិការបស់រដ្ឋបាលរាជធានី ខេត្ត ក្រុង ស្រុក ត្រូវបានគ្រោងចំនួន ២.២៤៣.៧៨លានរៀល មានសមាមាត្រ ស្មើនឹង៨,៨៨% នៃចំណូលចរន្តថវិការដ្ឋ ត្រូវជា១,៨៨%នៃផលិតផលជាតិសរុប(ផ.ស.ស.)មានកំណើន៦០,៣%ធៀបនឹងច្បាប់ថវិកាជាតិឆ្នាំ២០១៩ ក្នុងនោះរួមមាន ៖ ចំណូលសារពើពន្ធត្រូវបានគ្រោងចំនួន ២.០៨៦.៣០៨លានរៀល ត្រូវជា១,៧៥% នៃផ.ស.ស. មានកំណើន៥៤,៤%ធៀបនឹងច្បាប់ថវិកាជាតិឆ្នាំ២០១៩ ។ ចំណូលមិនមែនសារពើពន្ធត្រូវបានគ្រោងចំនួន១៥៧.៤៧០លានរៀល ត្រូវជា០,១៣%នៃ ផ.ស.ស. មានកំណើន២២៥,៧%ធៀបនឹងច្បាប់ថវិកាជាតិឆ្នាំ ២០១៩ ។
លោកឧបនាយករដ្ឋមន្ត្រីបន្ថែមថា ចំណាយថវិការាជធានី ខេត្ត ក្រុង ស្រុក និងឃុំ សង្កាត់ ត្រូវបានគ្រោងចំនួន៣.៣២៩.២៣៦លានរៀល មានសមាមាត្រស្មើនឹង១០,០%នៃចំណាយថវិការដ្ឋសរុប ត្រូវជា២,៨០%នៃ ផ.ស.ស. មានកំណើន៥១,៤%ធៀបនឹងច្បាប់ថវិកាជាតិឆ្នាំ២០១៩ ក្នុងនោះ ៖ ក-ចំណាយចរន្តត្រូវបានគ្រោងចំនួន ២.៨៦៦.៨៨០លានរៀល មានសមាមាត្រស្មើនឹង១៤,៥%នៃចំណាយចរន្តថវិការដ្ឋសរុប ត្រូវជា២,៤១%នៃ ផ.ស.ស, មានកំណើន៥២,៥%ធៀបនឹងច្បាប់ថវិកាជាតិឆ្នាំ២០១៩
ការកើនឡើងនេះ មួយផ្នែកគឺបណ្តាលមកពីមានការដំឡើងប្រាក់បំណាច់ជូនដល់ជំទប់ទី១ ទី២ ចៅសង្កាត់រងទី១ ទី២ និងសមាជិកក្រុមប្រឹក្សាឃុំ-សង្កាត់ ព្រមទាំងមន្ត្រីភូមិ ដោយចាប់អនុវត្តពីខែមេសា ឆ្នាំ២០២០ ។ ដូចនេះ ប្រាក់បំណាច់របស់ក្រុមប្រឹក្សារាជធានី ខេត្ត និងក្រុង ស្រុក ខណ្ឌ ក៏ដូចជាក្រុមប្រឹក្សាឃុំ សង្កាត់ និងមន្ត្រីភូមិ នឹងត្រូវបានផ្តល់ជូនដូចខាងក្រោម៖
+ក្រុមប្រឹក្សារាជធានី ខេត្ត ទទួលបានប្រាក់បំណាច់ ៖
-ប្រធានក្រុមប្រឹក្សារាជធានី ខេត្ត នឹងទទួលបានចំនួន១ ៤៤០ ០០០រៀលរៀល ។
-ប្រាក់បំណាច់សមាជិកក្រុមប្រឹក្សារាជធានី ខេត្ត នឹងទទួលបានចំនួន១ ១៣៥ ០០០រៀល។
+ក្រុមប្រឹក្សាក្រុង ស្រុក ខណ្ឌ ៖
-ប្រាក់បំណាច់ប្រធានក្រុមប្រឹក្សាក្រុង ស្រុក ខណ្ឌ នឹងទទួលបានចំនួន១.១៥៥.០០០រៀល
-ប្រាក់បំណាច់សមាជិកក្រុមប្រឹក្សាក្រុង ស្រុក
ខណ្ឌ នឹងទទួលបានចំនួន៩១០. ០០០រៀល ។
+ក្រុមប្រឹក្សាឃុំ សង្កាត់ ៖
-ប្រាក់បំណាច់មេឃុំ ចៅសង្កាត់ នឹងទទួលបានចំនួន១.១១០.០០០រៀល ។
-ប្រាក់បំណាច់ជំទប់ទី១ ទី២ ចៅសង្កាត់រងទី១ ទី២ នឹងត្រូវបានដំឡើងពី៨៥០.០០០រៀល
នៅឆ្នាំ២០១៩ ដល់ចំនួន៨៧០.០០០រៀល នៅឆ្នាំ២០២០ ។
-ប្រាក់បំណាច់សមាជិកក្រុមប្រឹក្សាឃុំ សង្កាត់នឹងត្រូវបានដំឡើងពី៧៤០.០០០រៀលនៅឆ្នាំ២០១៩ ដល់៧៦០.០០០រៀល នៅឆ្នាំ២០២០។
-ប្រាក់បំណាច់មេភូមិនឹងត្រូវបានដំឡើងពី៤០០.០០០រៀល នៅឆ្នាំ២០១៩ ដល់៤៣០.០០០រៀល នៅឆ្នាំ២០២០ ។
-ប្រាក់បំណាច់អនុប្រធានភូមិ នឹងត្រូវបានដំឡើងពី២៨០.០០០រៀល នៅឆ្នាំ២០១៩ ដល់៣១០.០០០រៀល នៅឆ្នាំ២០២០ ។
-ប្រាក់បំណាច់សមាជិកភូមិនឹងត្រូវបានដំឡើងពី២៥០.០០០រៀល នៅឆ្នាំ២០១៩ ដល់២៨០.០០០រៀល នៅឆ្នាំ២០២០ ៕
ចែករំលែកព័តមាននេះ