រាជធានីភ្នំពេញ ៖ ព្រះមហាក្សត្រព្រះបាទសម្តេចព្រះបរមនាថនរោត្តម សីហមុនី មានព្រះ បន្ធូលថា រាជរដ្ឋាភិបាលបានបើកឱកាសគ្រប់យ៉ាងដល់អ្នកពិការភាព រួមមានសេរីភាពទទួលព័ត៌មាន សិទ្ធិធ្វើនយោបាយ…ជាដើម ។ នេះបើយោងព្រះសាររបស់ព្រះអង្គ ។
យោងតាមព្រះសាររបស់ព្រះមហាក្សត្រ នៅថ្ងៃទី២៧ ខែវិច្ឆិកានេះ ក្នុងឱកាសប្រារព្ធពិធីប្រកាសដាក់ឱ្យប្រើប្រាស់ជាផ្លូវការផែនការយុទ្ធសាស្ត្រជាតិស្តីពីពិការភាព ២០១៩-២០២៣ និងទិវាជនមានពិការភាព កម្ពុជាលើកទី២១ និងអន្តរជាតិលើកទី៣៧ នៅថ្ងៃទី០៣ ខែធ្នូ ឆ្នាំ២០១៩ ក្រោមប្រធានបទ «លុបបំបាត់ឧបសគ្គរារាំងជនមានពិការភាព ដើម្បីសង្គមមួយប្រកបដោយបរិយាបន្ន ដែលរៀបចំឡើងដោយក្រុមប្រឹក្សាសកម្មភាពជនមានពិការភាព និងក្រសួងសង្គមកិច្ច អតីតយុទ្ធជន និងយុវនីតិ សម្បទា បានលើកឡើងយ៉ាងដូច្នេះថា ៖«ស្ថិតក្នុងឱកាសដ៏ឧត្តុង្គឧត្តមនេះ ខ្ញុំព្រះករុណា ខ្ញុំសូមផ្តាំផ្ញើនូវការសួរសុខទុក្ខប្រកបដោយក្តីនឹករលឹកស្រឡាញ់ជាទីបំផុតពីសំណាក់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល និងក្នុងនាម ខ្ញុំព្រះករុណា ខ្ញុំផ្ទាល់ជូនចំពោះបងប្អូន ក្មួយៗមានពិការភាពគ្រប់រូប និងគ្រប់ក្រុមគ្រួសារ សូមមានសុខភាពល្អ សុភមង្គល និងសូមឧទ្ទិសទិវាជនមានពិការភាព នាថ្ងៃទី០៣ ខែធ្នូ ឆ្នាំ២០១៩ ឱ្យស្ថិតនៅជាប្រយោជន៍ដ៏ឧត្តុង្គឧត្តមរបស់ជនមានពិការភាព » ។
ព្រះរាជសារគូសបញ្ជាក់ថា សព្វថ្ងៃនេះក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជាសម្តេចជោ ហ៊ុន សែន ប្រធានកិត្តិយសក្រុមប្រឹក្សាសកម្មភាពជនពិការបានធ្វើឱ្យជីវភាពរស់នៅរបស់ជនមានពិការភាពមានភាពប្រសើរឡើងតាមរយៈការលើកកម្ពស់កំណើនការងារនិងអាជីពសមស្របព្រមទាំងការពង្រឹងភាពជាម្ចាស់ការដោយលើកទឹកចិត្តដល់ជនមានពិការភាពមានមុខរបរផ្ទាល់ខ្លួន សំដៅកាត់បន្ថយភាពក្រីក្រនៅក្នុងសង្គមសមិទ្ធផលរយៈពេល៥ឆ្នាំនៃការអនុវត្តផែនការយុទ្ធសាស្ត្រជាតិស្តីពីពិការភាព ២០១៤-២០១៨ នាពេលកន្លងមកបានធ្វើឱ្យជនមានពិការភាពទទួលបានទាំងសេវាសុខភាព ប្រកបដោយគុណភាព និងសមធម៌ព្រមទាំងការស្តារលទ្ធភាព ពលកម្មកាយ សម្បទា និងសតិបញ្ញាបានល្អប្រសើរ» ។
ព្រះអង្គរបន្ថែមមានព្រះពន្ធួលក្នុងព្រះរាជសារទៀតថា រាជរដ្ឋាភិបាលបានលើកកម្ពស់ការចូលរួមរបស់ជនមានពិការភាព ដើម្បីសម្តែងមតិទទួលព័ត៌មាន និងចូលរួមជីវភាពនយោបាយត្រូវបានលើកទឹកចិត្តទាំងនៅកម្រិតថ្នាក់ជាតិ និងអន្តរជាតិរួមទាំងការធានាបាននូវសកម្មភា ពសង្គម វប្បធម៌ សាសនា កីឡា សិល្បៈ ការសម្រាកតម្លៃ ដែលធ្វើឱ្យជនមានពិការភាពទទួលបានការអភិវឌ្ឍន៍ឥតឈប់ឈរពីរាជរដ្ឋាភិបាល ។
សមិទ្ធផលធំៗខាងលើនេះបានសបញ្ជាក់អំពីឆន្ទៈ និងការប្តេជ្ញាចិត្តរបស់រាជរដ្ឋាភិបាលសំដៅបម្រើឱ្យបុព្វហេតុដ៏ថ្លៃថ្លា របស់ជនមានពិការភាពកម្ពុជា ។ ព្រះអង្គបានព្រះបន្ទូលបញ្ជាក់ថា៖«ខ្ញុំព្រះករុណា ខ្ញុំសូមធ្វើការលើកទឹកចិត្តបន្ថែមទៀត ដើម្បីបន្តសកម្មភាពដ៏ល្អប្រពៃថ្លៃថ្លានេះនិងសូមអំពាវនាវដល់បងប្អូនជនរួមជាតិទាំងអស់បន្តការគាំទ្រដល់សកម្មភាពនានារបស់ជនមានពិការភាព ដើម្បីលុបបំបាត់ឧបសគ្គរារាំងឈានទៅពង្រឹងភាពជាម្ចាស់ការឱ្យបានរឹងមាំ ក្នុងទិសដៅសម្រេចបាននូវការលើកកម្ពស់ និងការពា រសិទ្ធិរបស់ជនមានពិការភាព» ។
ព្រះរាជសារបន្ថែមថា ជាថ្មីម្តងទៀតខ្ញុំព្រះករុណា ខ្ញុំសូមថ្លែងការកោតសរសើរចំពោះរាជរដ្ឋាភិបាលកម្ពុជា ក្រោមការដឹកនាំដ៏ឆ្នើមរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាសកម្មភាពជនមានពិការភាព និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលតែងតែផ្តល់សេចក្តីអាណិតស្រឡាញ់សន្តោសប្រណីចំពោះជនមានពិការភាព ដែលជួបទុក្ខលំបាកនាពេលកន្លងមក ។ ខ្ញុំព្រះករុណា ខ្ញុំសូមអរគុណចំពោះសហគមន៍ជាតិ និងអន្តរជាតិដែលមានទឹកចិត្តបា នផ្តល់ការគាំទ្រទាំងផ្នែកស្មារតី សម្ភារៈ និងថវិកាដ៏ច្រើនដើម្បីជួយឱ្យវិស័យពិការភាព ក្នុងព្រះរាជាណាចក្រកម្ពុជាទទួលបានជោគជ័យ ៕
ចែករំលែកព័តមាននេះ