ខេត្តកំពង់ឆ្នាំង ៖ អភិបាលខេត្តកំពង់ឆ្នាំងលោក ឈួរ ច័ន្ទឌឿន បានជំរុញដល់មន្ទីរកសិកម្មរុក្ខាប្រមាញ់ និងនេសាទខេត្ត និងសហគមន៍កសិកម្មទូទាំងខេត្តកំពង់ឆ្នាំង សូមពង្រីកទីផ្សារផលិតផលកសិកម្មឲ្យមានគុណភាពល្អ មិនប៉ះពាល់សុខភាពនឹងត្រូវមានជារៀងរាល់ថ្ងៃ ដើម្បីបម្រើសេចក្តីត្រូវការរបស់ប្រជាពលរដ្ឋ ។
មានប្រសាសន៍បែបនេះនៅក្នុងវេទិកាសហគមន៍ កសិកម្មក្រោមប្រធានបទ «យុទ្ធសាស្ត្រគាំទ្រវិស័យកសិកម្ម និងទីផ្សារកសិកម្មខ្នាតតូចកាន់តែប្រសើរឡើង » ។ ពិធីនេះធ្វើឡើងនៅការិយាល័យអភិវឌ្ឍន៍កសិកម្មនៃមន្ទីរកសិកម្មរុក្ខាប្រមាញ់ និងនេសាទនៅព្រឹកថ្ងៃទី ២៦ ខែវិច្ឆិកា ដោយមានការចូលរួមពីសហគមន៍កសិកម្មចំនួន៤៨ ក្នុងខេត្ត និងមន្ត្រីរាជការ ព្រមទាំងប្រជាពលរដ្ឋជាច្រើនរូបទៀត ។
លោកអភិបាលខេត្តកំពង់ឆ្នាំងក៏បានសំណូមពរដល់សហគមន៍កសិកម្មទាំងអស់ដែលបានចូលរួមនៅថ្ងៃនេះ សូមបង្ហាញ និងផ្លាស់ប្តូរយោបល់ចែករំលែកបទពិសធន៍ពីគ្នាទៅវិញទៅមក ដើម្បីឲ្យផលិតផលកសិកម្មរបស់ខ្លួនទទួលបានទិន្នផលខ្ពស់មានគុណភាពល្អ និងមានតម្លៃខ្ពស់នៅក្នុងទីផ្សារ និងត្រូវបានអតិថិជនគាំទ្រចូលចិត្តទិញយកទៅបរិភោគ ។ ជាមួយគ្នានេះ លោកអភិបាលខេត្តកំពង់ឆ្នាំងក៏បានស្ងើចសសើរដល់សហគមន៍ កសិកម្មទាំងអស់ដែលបានខិតខំពង្រីកសហគមន៍កសិកម្មរបស់ខ្លួន ដើម្បីឲ្យមានគុណភាព សុខភាព ដោយជៀសវាងការប្រាស់ជីគីមីជាដើម ។
ក្រៅពីបន្លែត្រីសាច់ដំណាំស្រូវររបស់បងប្អូនសហគមន៍ក៏មិនត្រូវបានប្រើប្រាស់ជីគីមីផងដែរ ដែលធ្វើឲ្យបងប្អូនប្រជាពលរដ្ឋមានទំនប់ចិត្ត និងមកទិញជារៀងរាល់ចុងសប្តាហ៍ ដែលដាក់លក់នៅក្នុងមុខការិយាល័យអភិវឌ្ឍន៍កសិកម្មនៃមន្ទីរកសិកម្មនៅទួលក្រឡាញ់យើងនេះ ។
លោក ងិន ហ៊ុន ប្រធានមន្ទីរកសិកម្មខេត្ត រុក្ខាប្រម៉ាញ់ និងនេសាទ ខេត្តកំពង់ឆ្នាំង បានលើកឡើងថា គោលបំណងធំក្នុងវេទិកានេះ គឺទី១ចង់ឲ្យសហគមន៍ប្រឹក្សាយោបល់ចែករំលែកបទពិសោធន៍ពីគ្នាស្វែងរកយុទ្ធសាស្ត្រជាមួយគ្នា ជាពិសេសផ្តោតទៅលើការផលិតមានដើមទុនទាប ដើម្បីជួយកសិករបង្កើនប្រាក់ចំណូលឲ្យកាន់តែប្រសើរឡើង ។ ទី២ បង្កើនការយល់ដឹងពីអត្តភាពរបស់សហគមន៍ដោយឲ្យសហគមន៍ដែលមានស្នាដៃធ្វើបទបង្ហាញអំពីបទពិសោធន៍ជាយុទ្ធសាស្ត្ររបស់ខ្លួន ។ ទី៣ ធ្វើយ៉ាងណាឲ្យទីផ្សារសហគមន៍កសិកម្មនៅក្នុងខេត្តមានដំណើរការទៅយ៉ាងរលូន មានទំនិញលក់ពេញក្នុង១សប្តាហ៍តែម្តង ។
ព្រោះរយៈកន្លមកនៅក្នុង១សប្តាហ៍យើងមានផលិតផលលក់តែ៣ថ្ងៃ គឺថ្ងៃសុក្រ សៅរ៍ និងអាទិត្យ តែប៉ុណ្ណោះ ។ ហើយប្រហែលជានៅដើមឆ្នាំ២០២០ យើង និងអាចរៀបចំឲ្យផ្សារសហគមន៍នេះមានស្តង់ដារលក់ដូរត្រឹមត្រូវ មានទូត្រជាក់សម្រាប់ដាក់បន្លែងត្រីសាច់ រក្សាគុណភាឲ្យបានល្អផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ