មុននឹងរាប់អានអ្នកណាមួយយើងត្រូវស្គាល់សាវតារ ស្គាល់ប្រវត្តិមនុស្សនោះផង ហើយត្រូវប្រយ័ត្នឲ្យមែនទែនចំពោះមនុស្សប្រភេទខ្លះដែលនិយាយចាក់បណ្តោយ ចេះតែហីអើតាមជានិច្ច ព្រោះអ្នកនិយាយចាក់បណ្តោយខ្លះគេមិនមានគំនិតចង់ឲ្យយើងចម្រើននោះទេ គេមានតែត្រេកអរនៅពេលណាដែលយើងធ្លាក់ដុនដាប រងទុក្ខវេទនា ។
បាបមិត្តខ្លះគេមានចិត្តប្រឡងប្រណាំងជាមួយនឹងយើងជានិច្ច នៅពេលដែលយើងមានលំនឹង ឬកំពុងចម្រើនក្នុងការងារឬមុខរបរ គេមិនចោលយើងទេ គេតែងពឹងពាក់យើងឱបដៃឱបជើងយកចិត្តណាស់ តែនៅពេលណាដែលយើងចុះខ្សោយ ឬមានសេចក្តីប្រមាទភ្លាំងភ្លាត់នៅក្នុងការងារភ្លាម គេក៏ជួយច្រានយើងដោយពាក្យសរសើរ ដោយសម្តីបញ្ជោរក្នុងបំណងកុំឲ្យយើងមើលឃើញនូវការប្រហែសធ្វេស ឬកំហុសឆ្គងរបស់យើង ។
លុះដល់កំហុសនោះកាន់តែច្រើន កាន់តែធំទៅៗ គេក៏ដើរខ្សឹប ដើរនិយាយប្រាប់អ្នកដទៃនូវអ្វីៗដែលជាកំហុសរបស់យើង ថែមទាំងប្រឌិតរឿងអាស្រូវមិនពិតផ្សំបញ្ចូលថែមទៀតផង នោះគឺដល់ពេលដែលធាក់យើងឲ្យខ្ទាតចេញ ដើម្បីគេស៊ីដាច់កន្លែងនោះតែម្តង ព្រោះគេឃ្លានជាយូរមកហើយ ។
មិត្តប្រភេទនេះត្រូវប្រយ័ត្នឱ្យមែនទែន ដែលលោកចាត់ថាជាមិត្តពិតមានពិស ។ ដោយសាន សារិន
ចែករំលែកព័តមាននេះ